ޚާއްސަ އެހީއަށް ބޭނުންވާ ފިރިހެނަކާއެކު ޖިންސީ އަމަލު ހިންގި މީހެއްގެ މައްޗަށް ކުށް ސާބިތުވެ، އޭނާ 18 އަހަރަށް ޖަލަށް ލުމަށް ކޯޓުން ހުކުމްކޮށްފިއެވެ. މި މައްސަލައިގައި ކުށް ސާބިތުވެ ހުކުމް އައިސްފައިވަނީ ފުވައްމުލައް ސިޓީ، ފުނާދު، ނަވާ، އުމުރުން 58 އަހަރުގެ ޢަބްދުﷲ ވަޙީދު މޫސާގެ މައްޗަށެވެ. ދިވެހި ފުލުހުންގެ ޚިދުމަތުން ވިދާޅުވި ގޮތުގައި، ޢަބްދުﷲ ވަޙީދު މޫސާގެ މައްޗަށް ދަޢުވާ އުފުލާފައިވަނީ ކުޑަކުދިންނަށް ޖިންސީ ގޯނާކުރާ މީހުންނާމެދު ޚާއްސަ އުސޫލުތަކަކަށް އަމަލު ކުރުމުގެ ޤާނޫނުގެ ދަށުންނެވެ. އޭނާގެ މައްޗަށް ސާބިތުވެފައިވަނީ ޚާއްސަ އެހީއަށް ބޭނުންވާ ފިރިހެނަކަށް ޖިންސީ އަމަލު ހިންގިކަމުގެ ކުށެވެ. މި މައްސަލައިގައި ހުށަހެޅުނު ހެކިތަކަށާއި ޤާނޫނީ ބަހުސްތަކަށް ބެލުމަށްފަހު، ކޯޓުން މި ހުކުމް އިއްވާފައިވަނީ މި ހިނގާ ނޮވެމްބަރު މަހުގެ 19 ވަނަ ދުވަހުއެވެ. ކޯޓުގެ ހުކުމުގައި ޢަބްދުﷲ ވަޙީދު މޫސާ 18 އަހަރަށް ޖަލަށްލުމަށް ކަނޑައެޅި ނަމަވެސް، ޖިނާޢީ އިޖުރާޢަތުގެ ޤާނޫނުގެ ދަށުން އޭނާ ބަންދުގައި ހޭދަކުރި މުއްދަތު ވަނީ ހުކުމުން އުނިކޮށްފައެވެ. އެގޮތުން، މި މައްސަލައާ ގުޅިގެން އޭނާ ބަންދުގައި ހުރި 1 އަހަރާއި، 7 މަހާއި، 9 ދުވަސް ހުކުމުގެ މުއްދަތުން އުނިކުރުމުން، ދެން އޭނާ ތަންފީޒު ކުރަންޖެހޭނީ 16 އަހަރާއި، 4 މަހާއި، 21 ދުވަހުގެ ޖަލު އަދަބެއް ކަމަށް ކޯޓުން ވަނީ ކަނޑައަޅާފައެވެ. ފުލުހުން ފާހަގަކުރެއްވި ގޮތުގައި، މިއީ ޚާއްސަ އެހީއަށް ބޭނުންވާ ފަރާތްތަކަށް ޖިންސީ ގޯނާކުރުމުގެ މައްސަލަތައް ހުއްޓުވައި، ކުށްވެރިން އިންސާފުގެ ކުރިމައްޗަށް ގެނައުމަށް ކުރަމުންދާ މަސައްކަތުގެ ތެރެއިން ލިބުނު ކާމިޔާބީއެކެވެ. އަދި މިފަދަ ކުށްތަކުން ނާޒުކު ފަރާތްތައް ރައްކާތެރިކުރުމަށް ކުރަންޖެހޭ މަސައްކަތްތައް ފަސްޖެހުމެއްނެތި ކުރިއަށް ގެންދާނެ ކަމުގެ ޔަޤީންކަން ފުލުހުން ވަނީ ދެއްވާފައެވެ.

\