ގދ. ފަރެސްމާތޮޑާގައި ވައިރަލް ހުން ފެތުރޭ މިންވަރު އިންތިހާއަށް އިތުރުވެ، އެ ރަށުގެ އާބާދީގެ ދެބައިކުޅަ އެއްބައި މީހުން ބަލިވެފައިވާ ކަމަށް ބުނެ 'ސަން އޮންލައިން' އިން ފަތުރާފައިވަނީ ހަގީގަތާ ހިލާފު ދޮގު މައުލޫމާތެއް ކަމަށް އެ ރަށު ކައުންސިލްގެ ރައީސް އަހްމަދު އިމްތިޔާޒު ވިދާޅުވެއްޖެއެވެ.
ކައުންސިލް ރައީސް ފޭސްބުކްގައި ކުރެއްވި ޕޯސްޓެއްގައި ވިދާޅުވީ، ސަން އޮންލައިންގައި އެ ރަށުގެ 1100 މީހުންގެ އާބާދީގެ ތެރެއިން ދެބައިކުޅަ އެއްބަޔަށް ބަލިޖެހިފައިވާ ކަމަށް ލިޔެފައިވީ ނަމަވެސް، އެއީ ސައްހަ މައުލޫމާތެއް ނޫން ކަމަށެވެ. އިމްތިޔާޒު ވިދާޅުވީ ފަރެސްމާތޮޑާގެ ހަގީގީ އާބާދީއަކީ 1870 ކަމަށާއި، ބަލިމަޑުކަމުގައި އެންމެ ބާރުބޮޑުވި ތިން ދުވަހުވެސް ފަރުވާ ހޯދާފައިވަނީ އާބާދީގެ ކުޑަ އިންސައްތައެއް ކަމަށެވެ.
ސިއްހީ މަރުކަޒުގެ ތަފާސްހިސާބުތަކާ ހަވާލާދީ ކައުންސިލް ރައީސް ވިދާޅުވީ، ބަލި އެންމެ ބޮޑަށް ފެތުރުނު މި މަހުގެ 8، 9 އަދި 10 ވަނަ ދުވަހު ޑޮކްޓަރަށް ދެއްކީ ޖުމްލަ 147 މީހުން ކަމަށެވެ. މީގެ ތެރެއިން އެޑްމިޓްކޮށްގެން ފަރުވާ ދީފައިވަނީ 27 މީހުންނަށެވެ. މިއަދުގެ ހާލަތަށް ބަލާއިރު އެޑްމިޓްކޮށްފައި ތިބީ އެންމެ 3 މީހުން ކަމަށާއި، ޑޮކްޓަރަށް ދައްކާ މީހުންގެ އަދަދު މިހާރު ވަރަށް ބޮޑަށް މަދުވެފައިވާ ކަމަށް އޭނާ ފާހަގަކުރެއްވިއެވެ.
ޚިޔާލު
އެންމެ ފުރަތަމަ ޚިޔާލު ދެއްވާ.