އިނގިރޭސި ޕްރިމިއާ ލީގުގައި ވޭތުވެދިޔަ 22 އަހަަރަަށް ވުރެ ގިނަ ދުވަހު އާސެނަލްއިން ކުރަމުން އައި އިންތިޒާރަށް ނިމުމެއް އަތުވެއްޖެއެވެ. 22 އަހަރުގެ މެދުކެނޑުމަކަށްފަހު އާސެނަލްއިން އިނގިރޭސި ޕްރިމިއާ ލީގުގެ ތަށި ކާމިޔާބުކޮށް، މުޅި ލަންޑަން އުފާވެރިކަމުން ގުގުމާލައިފިއެވެ.
އާސެނަލްއަށް ލީގު ކާމިޔާބުވުން ކަށަވަރުވީ ރޭ ކުޅުނު މެޗުގައި، ތާވަލުގެ ދެވަނައިގައި އޮތް މެންޗެސްޓަރ ސިޓީއާއި ބޯންމައުތު ބައްދަލުކުރި މެޗު 1-1 އިން އެއްވަރުވުމާ ގުޅިގެންނެވެ. މި ނަތީޖާއާއެކު، ސިޓީއަށް ބާކީ އޮތް މެޗުން މޮޅުވި ނަމަވެސް، އެއްވަނައިގައި އޮތް އާސެނަލްއާ އަރާ ހަމަކުރުމުގެ ފުރުސަތު ވަނީ ބަންދުވެފައެވެ.
މިއީ 2003/2004 ވަނަ އަހަރުގެ ސީޒަނުގައި އާސެން ވެންގާގެ އިރުޝާދުގެ ދަށުން، އެއްވެސް މެޗަކުން ބަލިނުވެ "އިންވިންސިބަލްސް" ގެ ގޮތުގައި އާސެނަލްއިން ލީގު ހޯދި ފަހުން މި ޝަރަފުވެރި ތަށި އެ ކްލަބަށް ލިބުނު ފުރަތަމަ ފަހަރެވެ. އާސެނަލްގެ ތާރީޚަށް ބަލާއިރު، އެޓީމުން އެންމެ ފުރަތަމަ ޕްރިމިއާ ލީގު ކާމިޔާބުކުރީ 1998 ވަނަ އަހަރުއެވެ. އޭގެ ފަހުން 2002 ވަނަ އަހަރުވެސް އެޓީމުން ތަށި އުފުލާލިއެވެ. މީގެ އިތުރުން، ޕްރިމިއާ ލީގު އިފްތިތާޙު ކުރުމުގެ ކުރިން އާސެނަލްއިން ވަނީ އިނގިރޭސިވިލާތުގެ އެއްވަނަ ޑިވިޝަންގެ ލީގު 10 ފަހަރު ކާމިޔާބުކޮށްފައެވެ.
ޚިޔާލު
އެންމެ ފުރަތަމަ ޚިޔާލު ދެއްވާ.