ލާއޯސްގެ ފެންބޮޑުވެފައިވާ ކޭވެއްގެ ތެރޭގައި ހަފުތާއެއް ވަންދެން ތާށިވެފައި ތިބި 5 މީހުން ފެނިއްޖެ؛ ނެރެން ޖެހޭ މަގުގެ ފުޅާމިނުގައި ހުރީ 60 ސެންޓިމީޓަރ!

މެދުތެރޭ ލާއޯސްގެ ފެންބޮޑުވެފައިވާ ކޭވް ނުވަތަ ހޮހަޅައެެއްގެ ތެރޭގައި ތާށިވެ، އެއްވެސް އަލިކަމެއް ނެތް އަނދިރީގައި ހަފްތާއަކަށްވުރެ ގިނަ ދުވަސް ހޭދަކުރި ހަތް މީހުންގެ ތެރެއިން ފަސް މީހަކު ދިރިތިއްބާ ފެނިއްޖެއެވެ. ބައިނަލްއަގުވާމީ އެހީތެރިކަމާއެކު ކުރިއަށްދާ މި ރެސްކިއު އޮޕަރޭޝަނުގައި މިހާރު މަސައްކަތް ކުރަމުންދަނީ ސަލާމަތްވި މީހުން ބޭރަށް ނެރުމަށާއި، ގެއްލިފައިވާ އަނެއް ދެ މީހުން ހޯދުމަށެވެ.

ކޭވް ޑައިވަރުންގެ ޓީމަކަށް މި ފަސް މީހުން ފެނިފައިވަނީ 27 މޭ 2026 ވީ ބުދަ ދުވަހުގެ މެންދުރުފަހުގެ ވަގުތެއްގައެވެ. އެ މީހުން ފެނުނީ މައިނުގެ ފުން ހިސާބެއްގައި އޮތް ކަޅުކުލައިގެ މަޑުގަނޑެއްގެ މަތީގައި ތިއްބައެވެ. ސަލާމަތްވި މީހުން ތިބީ ވަރަށް ބޮޑަށް ބަލިވެ، ބަނޑުހައިވެފައި ނަމަވެސް، އެމީހުންގެ ސިއްހީ ހާލަތު ރަނގަޅު ކަމަށް ރިޕޯޓުތައް ބުނެއެވެ. ރެސްކިއު ގްރޫޕްތަކުން އާންމުކުރި ވީޑިއޯތަކުން ފެންނަ ގޮތުގައި، ޑައިވަރުން އެމީހުންނަށް ކާބޯތަކެއްޗާއި މެޑިކަލް އެހީތެރިކަން ފޯރުކޮށްދިނުމުން އެމީހުން ތިބީ ވަރަށް ބޮޑަށް އުފާވެފައެވެ.

މި ހާދިސާ ހިނގަން މެދުވެރިވީ މޭ 19، 2026 ގައި ޒައިސޮމްބޫން ޕްރޮވިންސްގެ ފަރުބަދަމަތީ ހިސާބެއްގައި ހުރި މި ކޭވް ނުވަަތަ ހޮހަޅައަށް ހަތް މީހުންގެ ގްރޫޕެއް ވަނުމުންނެވެ. އެމީހުން އެތަނަށް ވަނީ ވަލުޖަނަވާރު ހޯދުމަށާއި ރަން ހޯދުމަށެވެ. ނަމަވެސް ބޯކޮށް ވާރޭ ވެހުމުގެ ސަބަބުން ކުއްލިއަކަށް ފެންބޮޑުވެ، ބިންގަނޑު ކަނޑައިގެން ގޮސް ހޮހަޅައިގެ ދޮރު ބަންދުވީއެވެ. މިކަމުގެ ސަބަބުން އެ ގްރޫޕް ތާށިވީ ބިމުގެ 300 މީޓަރު އަޑީގައެވެ. މި ހާދިސާގައި އެކަކު ވަނީ ކޭވްގެ ދޮރު ބަންދުވުމުގެ ކުރިން ސަލާމަތްވެ، ކަމާބެހޭ ފަރާތްތަކަށް މައުލޫމާތު ދީފައެވެ.

ކޭވްއަށް ވަނުމަށް ރެސްކިޔުޓީމް މަސައްކަތް ކުރަނީ.....ފޮޓޯ:ގާޑިއަން

ސަލާމަތްވި މީހުން ފެނުނު ނަމަވެސް، އެމީހުން ބޭރަށް ނެރުމުގެ މަސައްކަތަކީ އެންމެ ނުރައްކާތެރި މަރުހަލާ ކަމަށް މާހިރުން ބުނެއެވެ. ކުރިން ރަން ނަގާ މައިނެއްގެ ގޮތުގައި ބޭނުންކުރި މިތަނުގެ ބައެއް މަގުތަކަކީ އެންމެ 50 ނުވަތަ 60 ސެންޓިމީޓަރުގެ ހަނި މަގުތަކެކެވެ. 2018 ވަނަ އަހަރު ތައިލެންޑުގެ ކޭވް ރެސްކިއުގައި ބައިވެރިވި ފިންލޭންޑުގެ ޑައިވަރު މިކޯ ޕާސީ ބުނިގޮތުގައި، މި ހަނި މަގުތަކުން ތަމްރީނު ލިބިފައިނުވާ މީހުން ޑައިވް ކުރުވައިގެން ނެރުމަކީ ރައްކާތެރި ކަމެއް ނޫނެވެ.

އެހެންކަމުން، ރެސްކިއު ޓީމުތަކުން މިހާރު މަސައްކަތް ކުރަމުންދަނީ ހޮހަޅައިގެ ތެރޭގައި ހުރި ފެން ހިއްކާލުމަށެވެ. މި މަގްސަދުގައި ބޮޑެތި ޕަންޕުތަކާއި ޖަނަރޭޓަރުތައް ޖަންގަލީގެ ތެރެއިން 4 ކިލޯމީޓަރުގެ ދުރުމިނަށް އުފުލައި، ފެން ހިއްކުމުގެ މަސައްކަތް ދަނީ ކުރަމުންނެވެ. އުންމީދަކީ ފެން ހިއްކާލުމުން އެމީހުންނަށް އަމިއްލައަށް ހިނގާފައި ނުވަތަ ފިރުކިފައި ބޭރަށް ނިކުމެވޭނެ ގޮތް ހެދުމެވެ.

ގެއްލިފައިވާ އަނެއް ދެ މީހުންގެ ހަބަރެއް އަދި ނުވެއެވެ. ސަލާމަތްވި ފަސް މީހުން ބުނިގޮތުގައި އެމީހުންނަށް އަނެއް ދެ މީހުންނަކީ ކޮންބައެއްކަން ނޭނގެއެވެ. އެހެންކަމުން ބެލެވެނީ އެ ދެ މީހުންނަކީ މާ ކުރިން އެ ކޭވަށް ވަދެފައިވާ ބައެއް ކަމަށެވެ. ލާއޯސް، ތައިލެންޑް އަދި ބައިނަލްއަގުވާމީ 100 އަށްވުރެ ގިނަ ރެސްކިއު މަސައްކަތްތެރިން ދަނީ އެމީހުން ހޯދުމަށް ކޭވްގެ ފުން ހިސާބުތަކަށް ދަތުރުކުރަމުންނެވެ.