ޕޭޕަލް ފަދަ ފިންޓެކް ޚިދުމަތްތަކަށް ސައިބަރ ސެކިއުރިޓީ ދިނުމަށް ރާއްޖެ އޮތީ ތައްޔާރަށް: ވަޒީރު އިޙްސާން

ޕޭޕަލް ފަދަ ބައިނަލްއަގުވާމީ ފިންޓެކް ސޮލިއުޝަންތައް ރާއްޖެއަށް ތަޢާރަފުކުރާއިރު، އެފަދަ ޚިދުމަތްތަކަށް ޤައުމީ ފެންވަރުގައި ދޭންޖެހޭ ސައިބަރ ސެކިއުރިޓީގެ ރައްކާތެރިކަން ފޯރުކޮށްދިނުމަށް ދިވެހި ސަރުކާރުގެ އިދާރާތައް ފުރިހަމައަށް ތައްޔާރުވެފައިވާ ކަމަށް ދާޚިލީ ސަލާމަތާއި މަސައްކަތްތެރިކަމާއި ފަންނިއްޔާތާބެހޭ ވަޒީރު ޢަލީ އިޙްސާން ވިދާޅުވެއްޖެއެވެ.

"ޓްރޭޑް ޑެސްކް" ޕޮޑްކާސްޓުގައި ވާހަކަދައްކަވަމުން ވަޒީރު އިޙްސާން ވިދާޅުވީ، ސަރުކާރުގެ "މޯލްޑިވްސް 2.0" ސިޔާސަތު ތަންފީޒުކުރުމުގައި އެންމެ މުހިންމު އެއް އަމާޒަކީ ރާއްޖޭގެ ސައިބަރ ސެކިއުރިޓީގެ ފެންވަރު މަތިކުރުން ކަމަށެވެ. އަދި ރާއްޖޭގެ ސައިބަރ ސްޕޭސްއަކީ ޕޭޕަލް ފަދަ ބޮޑެތި ފިންޓެކް ޚިދުމަތްތައް އަންނައިރު، ސަލާމަތާއި ރައްކާތެރިކަން ކަށަވަރުވެފައިވާ ނެޓްވަރކް ސްޕޭސްއަކަށް ހެދުމަކީ ސަރުކާރުން ވަރަށް ބޮޑު އިސްކަމެއް ދެއްވައިގެން ކުރައްވަމުން ގެންދަވާ މަސައްކަތެއްކަން ވަޒީރު ފާހަގަކުރެއްވިއެވެ.

މި ދާއިރާއިން ކުރެވެމުންދާ މަސައްކަތްތަކުގެ ތަފްސީލު ހިއްސާކުރައްވަމުން ވަޒީރު ވިދާޅުވީ، މޯލްޑިވްސް 2.0 ގެ މިންގަނޑުތަކާ އެއްގޮތަށް ޤާނޫނީ އޮނިގަނޑު އެކުލަވާލައި، ސައިބަރ ސެކިއުރިޓީއާ ބެހޭ ޚާއްޞަ ޤާނޫނެއް ވުޖޫދުކުރުމުގެ މަސައްކަތް މިހާރު ފައްޓަވާފައިވާ ކަމަށެވެ. އެ ޤާނޫނު އައުމުގެ ކުރިންވެސް، ރައްކާތެރިކަން ކަށަވަރުކުރުމަށްޓަކައި ސައިބަރ ސެކިއުރިޓީ އެޖެންސީއެއް ޤާއިމުކޮށް، ސައިބަރ އޮޕަރޭޝަން ސެންޓަރަކާއި ފުލުހުންގެ ތެރޭގައި ސެކިއުރިޓީ އޮޕަރޭޝަން ސެންޓަރެއް މިހާރު ވަނީ އުފައްދާފައެވެ.

"އެފަރާތްތަކަށް ރާއްޖޭގެ ނޭޝަނަލް ލެވަލްގައި ދޭންޖެހޭ ސައިބަރ ސެކިއުރިޓީ ސަރވިސްތަކާއި އަދި އެ ފަރާތްތަކަށް އެހީތެރިކަމެއް ބޭނުންވާ ހާލަތުގައި ސައިބަރ ސައިޑުން ދޭންޖެހޭ އެހީތެރިކަން ދޭން މިހާރު މިނިސްޓްރީއާއި މިނިސްޓްރީއާ ގުޅިފައިވާ އިދާރާތަކުން ވަނީ ތައްޔާރުވެފައި،" ވަޒީރު އިޙްސާން ވިދާޅުވިއެވެ.

ވަޒީރު އިތުރަށް ވިދާޅުވީ، ރާއްޖޭގައި ނެޓްވަރކް ސޮލިއުޝަންސް ދޭ ފަރާތްތަކާއި، ޓެލެކޮމިއުނިކޭޝަން ޚިދުމަތްދޭ އޮޕަރޭޓަރުންނާއި، ފިންޓެކް ޚިދުމަތްދޭ ފަރާތްތަކުން ހިފަހައްޓަންޖެހޭ މިންގަނޑުތައް މިނިސްޓްރީން މިހާރު ކަނޑައަޅާފައިވާ ކަމަށެވެ. އަދި އެފަދަ ފަރާތްތަކުން އެ މިންގަނޑުތަކަށް އަމަލުކުރޭތޯ ބެލުމަށްޓަކައި އޮޑިޓް ކުރުމުގެ ނިޒާމެއްވެސް ކުރިއަށްދާނެ ކަމަށް އެމަނިކުފާނު ވިދާޅުވިއެވެ.

ޕޭޕަލް ފަދަ ޚިދުމަތްތަކާއެކު ދިވެހި ވިޔަފާރިވެރިންނާއި އުފެއްދުންތެރި ކްރިއޭޓަރުންނަށް ބައިނަލްއަގުވާމީ މާކެޓަށް ވަނުމުގެ ފުރުސަތު ބޮޑުވެގެންދާނެކަން ފާހަގަކުރައްވައި، އެ ފުރުސަތުގެ ބޭނުން ހިފައި ދިވެހިންގެ ހުނަރުތައް ދުނިޔެއަށް ދައްކާލުމަށް ރާއްޖޭގެ ޒުވާނުންނަށް ވަޒީރު ވަނީ ގޮވާލައްވާފައެވެ. ސަރުކާރުގެ އަމާޒަކީ ޒަމާނީ ފަންނިއްޔާތުގެ އެހީގައި ދިވެހި އިޤްތިޞާދު ފުޅާކޮށް، ރައްކާތެރި ޑިޖިޓަލް މާޙައުލެއް ޤާއިމުކޮށްދިނުމެވެ.