ފީފާ ވޯލްޑް ކަޕްގެ ގްރޫޕް 'އެޗް' ގައި ރޭ ކޭޕް ވާޑް އާއި ސައުދީ އަރަބިއްޔާ ބައްދަލުކުރި ފޯރިގަދަ މެޗު 0-0 އިން އެއްވަރުވެ، ކޭޕް ވާޑް މުބާރާތުގެ ދެވަނަ ބުރަށް (ގަދަ 32 އަށް) ދަތުރުކޮށް ތާރީޚީ ކާމިޔާބީއެއް ހޯދައިފިއެވެ.
ހިއުސްޓަން ސްޓޭޑިއަމްގައި ކުޅުނު މި މެޗުން ލިބުނު ޕޮއިންޓާއެކު، ކޭޕް ވާޑަށް ވަނީ ގްރޫޕްގެ ދެވަނަ މަގާމު ލިބިފައެވެ. އެ ޓީމަށް ތިން ޕޮއިންޓާއެކު ދެވަނަ ލިބުނީ، ގްރޫޕްގެ އަނެއް މެޗުގައި ޔޫރަޕްގެ ޗެމްޕިއަން ސްޕެއިން އަތުން އުރުގުއޭ ބަލިވުމާ ގުޅިގެންނެވެ. މި އުފާވެރި ކާމިޔާބީއާއެކު، އަންނަ ޖުލައި މަހުގެ 3 ވަނަ ދުވަހު މިއާމީ ސްޓޭޑިއަމްގައި ކޭޕް ވާޑް ބައްދަލުކުރާނީ އެންމެ ފަހުގެ ޗެމްޕިއަން އާޖެންޓީނާއާއެވެ.
މެޗުގެ ކުރީކޮޅު ދެ ޓީމުގެ ފަރާތުންވެސް ފެނުނީ ފަރުވާތެރި ކުޅުމެކެވެ. ނަމަވެސް މެޗުގެ 17 ވަނަ މިނެޓުގައި ސައުދީގެ ކެޕްޓަން ސާލިމް އަލް ދައުސަރީ ފޮނުވާލި ނުރައްކާތެރި ހަމަލާއެއް ކޭޕް ވާޑްގެ ވެގްނާ ޕީނާ ވަނީ ހުށިޔާރުކަމާއެކު ދިފާއުކޮށްފައެވެ. މިއީ މިފަހަރުގެ ވޯލްޑް ކަޕްގައި މެޗެއްގެ ތެރޭގައި އެންމެ ލަހުން ފޮނުވާލެވުނު ފުރަތަމަ ހަމަލާއެވެ.
މެޗުގެ ދެވަނަ ހާފުގައި ކޭޕް ވާޑުން ކުޅުން ރަނގަޅުކޮށް ގިނަ ހަމަލާތަކެއް އުފެއްދިއެވެ. އެގޮތުން ޖާމީރޯ މޮންޓޭރޯ އާއި ކެވިން ޕީނާ ފޮނުވާލި ހަމަލާތައް ފާހަގަކޮށްލެވެއެވެ. އަނެއްކޮޅުން ސައުދީގެ މުހައްމަދު އަބޫ އަލް ޝަމާތު ފޮނުވާލި ހަމަލާއެއް ކޭޕް ވާޑްގެ ތަޖުރިބާކާރު ގޯލްކީޕަރު ވޮޒީނިއާ ވަނީ ދިފާއުކޮށްފައެވެ.
މި މެޗުގައި ކޭޕް ވާޑްގެ އުމުރުން 40 އަހަރުން މަތީގެ ކީޕަރު ވޮޒީނިއާ ދެއްކި މޮޅު ކުޅުމާއެކު، އޭނާ ވެފައިވަނީ 40 އަހަރު ފުރުނު ފަހުން ވޯލްޑް ކަޕެއްގެ އެކަކަށް ވުރެ ގިނަ މެޗުގައި ބައިކޮޅަށް ލަނޑެއް ވަނަނުދީ ހިފެހެއްޓި ތިންވަނަ ކީޕަރަށެވެ.
ވޯލްޑް ކަޕްގައި އަލަށް ވާދަކުރާ ކޭޕް ވާޑުން ވަނީ ގްރޫޕް ސްޓޭޖުގެ ތިން މެޗުންވެސް ބަލިނުވެ ސަލާމަތްވެފައެވެ. މިއީ 2002 ވަނަ އަހަރު ސެނެގާލް އިން ހެދި ރެކޯޑަށްފަހު، އަލަށް ވާދަކުރާ ޓީމަކުން މިފަދަ ނަތީޖާއެއް ނެރުނު ފުރަތަމަ ފަހަރެވެ. އަދި މިއީ 2010 ވަނަ އަހަރަށްފަހު އަލަށް ވާދަކުރާ ޓީމެއް މުބާރާތުގެ ދެވަނަ ބުރަށް ދަތުރުކުރި ފުރަތަމަ ފަހަރުވެސް މެއެވެ.
މެޗަށްފަހު ކޭޕް ވާޑްގެ ސަޕޯޓަރުން ވަނީ ދަނޑުތެރޭގައާއި ބޭރުގައި ބޮޑު އުފާފާޅުކުރުމެއް ބާއްވާފައެވެ. މިއާ ޚިލާފަށް ސައުދީ އަރަބިއްޔާއަށް ވަނީ ޖެހިޖެހިގެން ހަވަނަ ފަހަރަށް ވޯލްޑް ކަޕްގެ ގްރޫޕް މަރުހަލާއިން ކަޓައިގެން ދިއުމުގެ ހިތާމައާ ކުރިމަތިލާން ޖެހިފައެވެ.
ޚިޔާލު
އެންމެ ފުރަތަމަ ޚިޔާލު ދެއްވާ.