ރާއްޖޭގެ ރީތިކަން ދައްކާލުމަށް ބައިނަލްއަޤުވާމީ ފޮޓޯގްރަފީ މުބާރާތެއް: އެއްވަނައަށް 50,000 ރުފިޔާ!

ވިޒިޓް މޯލްޑިވްސް ކޯޕަރޭޝަން (ވީއެމްސީ) އިން "ދިސް އިޒް މައި މޯލްޑިވްސް" ގެ ނަމުގައި ބައިނަލްއަޤުވާމީ ފޮޓޯގްރަފީ މުބާރާތެއް ރަސްމީކޮށް އިފްތިތާޙުކޮށްފިއެވެ. މި މުބާރާތަކީ ކޮންޓެންޓް ކްރިއޭޝަން ދާއިރާގައި މަސައްކަތްކުރާ ފަންނުވެރިންގެ ލޮލުން ފެންނަ ރާއްޖޭގެ ގުދުރަތީ ރީތިކަމާއި ތަފާތު މަންޒަރުތައް ދުނިޔެއަށް ދައްކާލުމަށް ހުޅުވާލި ފުރުޞަތެކެވެ.

މި މުބާރާތް އިއުލާންކޮށްފައިވަނީ ދައުލަތުގެ މީޑިއާގައި ބޭއްވި ހާއްސަ ރަސްމިއްޔާތެއްގައި، ރާއްޖޭގެ އުފެއްދުންތެރިންނަށް ޚާއްޞަ ޑިޖިޓަލް މާކެޓް ޕްލޭސް "ކްރިއެޓޯލް" އިފްތިތާޙު ކުރުމުގެ ތެރެއިންނެވެ. މި މުބާރާތުގައި ބައިވެރިވާ ފަރާތްތަކުން ހުށަހަޅަންޖެހެނީ ރާއްޖޭގެ ރަށްތަކާއި، ސަޤާފަތާއި، ތިމާވެށީގެ އިތުރުން ދިވެހިންގެ ދިރިއުޅުން ރަމްޒުކޮށްދޭ އަމިއްލަ ފޮޓޯތަކެވެ.

ވީއެމްސީން ބުނި ގޮތުގައި، މި މުބާރާތަކީ ހުރިހާ ފަންތިއެއްގެ ފޮޓޯގްރާފަރުންނަށްވެސް ބައިވެރިވެވޭ ގޮތަށް ހުޅުވާލާފައިވާ މުބާރާތެކެވެ. މުބާރާތުން އެއްވަނައަށް ހޮވޭ ފަރާތަކަށް 50,000 ރުފިޔާގެ ނަގުދު ފައިސާގެ އިނާމެއް ދިނުމަށް ވަނީ ނިންމާފައެވެ. މުބާރާތަށް ހުށަހަޅާ ފޮޓޯތަކަކީ ރާއްޖޭގައި ނަގާފައިވާ އަމިއްލަ އުފެއްދުންތަކަށް ވާންޖެހޭނެއެވެ.

މި މުބާރާތަށް ހުށަހަޅާ ފޮޓޯތަކުގެ ކޮޕީރައިޓް ފޮޓޯގްރަފަރަށް އޮތް ނަމަވެސް، ރާއްޖެ އިޝްތިހާރު ކުރުމަށާއި ރަސްމީ އެކި ބޭނުންތަކުގައި އެ ފޮޓޯތައް ބޭނުންކުރުމުގެ ހުއްދަ ވީއެމްސީއަށް ލިބޭނެއެވެ. މުބާރާތް ކުރިއަށް ދާނީ 1 ޖުލައި އިން ފެށިގެން 30 ސެޕްޓެމްބަރުގެ ނިޔަލަށެވެ.

މި މުބާރާތުގެ މައިގަނޑު އެއް މަގްޞަދަކީ އަލަށް ތައާރަފްކުރި "ކްރިއެޓޯލް" ޕްލެޓްފޯމް މެދުވެރިކޮށް ފަންނުވެރިންނަށް އިތުރު ފުރުޞަތުތައް ފަހިކޮށްދިނުމެވެ. މިއީ ރާއްޖޭގެ ވިޝުއަލް އަދި ސަޤާފީ އުފެއްދުންތަކަށް ޚާއްޞަކޮށްގެން ތަރައްޤީކޮށްފައިވާ ޤައުމީ ޑިޖިޓަލް މާކެޓް ޕްލޭސްއެކެވެ.

މި ޕްލެޓްފޯމްގެ ސަބަބުން އުފެއްދުންތެރިންނާއި، ފަތުރުވެރިކަމުގެ ވިޔަފާރިތަކާއި، ސަރުކާރުގެ މުއައްސަސާތަކުގެ އިތުރުން ބޭރުގެ މިޝަންތަކާ ގުޅުވައިދީ، ދިވެހި ފަންނުވެރިންގެ މަސައްކަތްތައް މާކެޓްކުރުމަށް ފަސޭހަވެގެންދާނެ ކަމަށް ވީއެމްސީން އުންމީދު ކުރެއެވެ