އެމް.އެން.ޔޫގެ 15 ޓީމެއް އަތޮޅުތެރެޔަށް ދަތުރު ފަށައިފި

ފަހި އެމްއެންޔޫ ޕްރޮގްރާމް ކުރިއަށް ގެންދިޔުމަށް ޤައުމީ ޔުނިވަރސިޓީ (އެމް.އެން.ޔޫ)ގެ 15 ޓީމެއް އަތޮޅުތެރެޔަށް ދަތުރު ފަށައިފިއެވެ.

މިމަހު 21 ގެ ނިޔަލަށް ކުރުމަށް ހަމަޖެހިފައިވާ މިދަތުރުތަކުގައި 15 ޓީމަކުން ރާއްޖޭގެ އެކިކަންކޮޅުތަކުގައި ހަރަކާތްތެރިވާނެ ކަމަށާއި ގްރޭޑް 8 ން މަތީގެ ދަރިވަރުންނަށް ކެރިއަރ ގައިޑެންސް ދިނުމުގެ އިތުރުން ދަރިވަރުންނަށް ސްޓަޑީ ސްކިލްސް އަދި ޓީޗަރުންނަށް ޕްރޮފެޝަނަލް ޑިވެލޮޕްމަންޓް ސެޝަންސް ހިންގުމާއި ބެލެނިވެރިންނާއި ރަށުގެ މުޖުތަމަޢު އަށް ހޭލުންތެރިކަމުގެ ޕްރޮގްރާމްތައް ހިންގުމަށް ހަމަޖެހިފައިވާކަމަށް އެމްއެންޔޫއިން ހާމަކޮށްފައިވެއެވެ.

އެގޮތުން އަތޮޅުތަކަށް ދަތުރުކުރާ މިޓީމްތައް 69 ސްކޫލަކަށް ޒިޔާރަތްކުރުމަށް ވަނީ ހަމަޖެހިފައެވެ. ސްކޫލްތަކުގެ އިތުރުން ޒިޔާރަތްކުރާ ކޮންމެ ރަށެއްގެ ކައުންސިލާއި އަންހެނުންގެ ކޮމިޓީއާއި ބައްދަލުކޮށް އެމް.އެން.ޔޫއާ ގުޅިގެން އިތުރަށް ކުރެވިދާނެ ކަންތައްތަކާއި ބެހޭގޮތުން މަޝްވަރާ ކުރެވިގެންދާނެ ކަމަށް އެޔުނިވާސިޓީން ބުނެފައިވެއެވެ.

ފަހި އެމް.އެން.ޔޫ ފަށާފައިވަނީ މިދިޔަ ނޮވެމްބަރމަހު 2 ވަނަ ދުވަހުގައެވެ. މިފަދަ ޕްރޮގްރާމެއް އުފެއްދުމުގެ މައިގަނޑު މަޤްސަދަކީ ޕަބްލިކަށް އަދި ޚާއްޞަކޮށް މާދަމާގެ ލީޑަރުން ކަމުގައިވާ ސްކޫލްތަކުގެދަރިވަރުންނަށް ދިވެހިރާއްޖޭގެ ޤައުމީ ޔުނިވަރސިޓީ އެމްއެންޔޫގެ ތަޞައްވަރާއި ޔުނިވަރސިޓީން ދެވޭ ޚިދްމަތްތަކާއި ފުރުޞަތުތަކާއި ހުރި ވަޞީލަތްތަކާއި ދަރިވަރުންނަށް އުފާވެރި މާހައުލެއް ޤާއިމްކޮށް ދޭން ޔުނިވަރސިޓީން ކުރާ މަސައްކަތްތައް ތަޢާރަފްކޮށްދިނުމެވެ. އަދި ސްކޫލް ދަރިވަރުންނަށް ކެރިއަރ ގައިޑަންސް ދިނުމެވެ.

ފަހި އެމްއެންޔޫ ޕްރޮގްރާމަކީ ޔުނިވަރސިޓީގެ ތަޞައްވަރާއި އެއްގޮތަށް ޔުނިވަރސިޓީން ނިކުންނަ ދަރިވަރުންނަކީ ފުޅާ ދާއިރާއެއްގައި ވިސްނާ ސިކުނޑި ހުޅުވިފައިތިބި ބިނާ ކުރުވަނިވި ޚިދުމަތްތެރި، އަނެކުންނާއި ދޭތެރޭ ވިސްނާ، އަމިއްލަ އަށް އިސްނަގައިގެން ޤައުމު ބިނާ ކުރާނެ ޚިދުމަތަތެރި ދަރިންތަކެއް އުފެއްދުމުގެ އަމާޒުގައި ހިންގާ ޕްރޮގްރާމެކެވެ.