މި ހިނގާ އޮގަސްޓު މަހުގެ ފުރަތަމަ އަށް ދުވަހުގެ ތެރޭގައި ރާއްޖެއަށް ބައިލައްކައަށްވުރެ ގިނަ ފަތުރުވެރިން ޒިޔާރަތްކޮށް، ފަތުރުވެރިކަމުގެ ދާއިރާއިން އުއްމީދީ ކުރިއެރުމެއް ހޯދައިފިއެވެ. ފަތުރުވެރިކަމާ ބެހޭ ވުޒާރާގެ އެންމެ ފަހުގެ ތަފާސްހިސާބުތައް ދައްކާގޮތުން، މި މުއްދަތުގައި ރާއްޖެއަށް ޖުމްލަ 55,834 ފަތުރުވެރިން ޒިޔާރަތްކޮށްފައިވެއެވެ. މިއީ މިދިޔަ އަހަރުގެ މި މުއްދަތުގައި ޒިޔާރަތްކުރި 52,275 ފަތުރުވެރިންނާ އަޅާބަލާއިރު %5.6 އިތުރު އަދަދެކެވެ.
މިމަހުގެ ތަފާސްހިސާބުތަކުން ކުރިއެރުން ފެންނަން ފަށާފައި މިވަނީ، މެދުއިރުމަތީގެ ހަމަނުޖެހުންތަކާ ގުޅިގެން މިއަހަރުގެ މާރިޗު މަހުން ފެށިގެން ރާއްޖެއަށް ޒިޔާރަތްކުރާ ފަތުރުވެރިންގެ އަދަދުތަކަށް ހީނަރުކަމެއް އައިސްފައި ވަނިކޮށެވެ. ތަފާސްހިސާބުތަކަށް ބަލާއިރު، މޭ މަހު %1.7 ގެ ކުރިއެރުމެއް ލިބުނު ނަމަވެސް، ޖޫން މަހު %12 އަދި ޖުލައި މަހު %1.9 ވަނީ ދަށްވެފައެވެ. ނަމަވެސް އޮގަސްޓު މަސް ފެށިގެން އައީ މި ދާއިރާއަށް އާ އުއްމީދުތަކެއް ގެނެސްދެމުންނެވެ.
މިމަހުގެ މިހާތަނަށް އައި ފަތުރުވެރިންގެ އަދަދުތަކަށް ބަލާއިރު، އެވްރެޖްކޮށް ކޮންމެ ދުވަހަކު 6,000 އަށްވުރެ ގިނަ ފަތުރުވެރިން ރާއްޖެއަށް އައިސްފައިވެއެވެ. މި މުއްދަތުގައި އެންމެ ގިނަ އަދަދަކަށް ފަތުރުވެރިން ޒިޔާރަތްކޮށްފައިވަނީ މިދިޔަ ހޮނިހިރު ދުވަހުއެވެ. އެދުވަހު އެކަނިވެސް 7,879 ފަތުރުވެރިން ވަނީ ރާއްޖެއަށް އައިސްފައެވެ.
ޚިޔާލު
އެންމެ ފުރަތަމަ ޚިޔާލު ދެއްވާ.