ފަރެސްމާތޮޑާގައި މަސް ފެކްޓްރީއެއް ތަރައްޤީކޮށްދިނުމަށް އެރަށު މަސްވެރިން އެދިއްޖެ

ފަރެސްމާތޮޑާގައި މަސް ފެކްޓްރީއެއް ތަރައްޤީކޮށްދިނުމަށް އެރަށުގެ މަސްވެރިން އެދިއްޖެއެވެ.

އެރަށު މަސްވެރިންގެ މިގޮތަށް އެދިފައިވަނީ މަސްވެރިންގެ ކަންބޮޑުވުންތައް އޮޅުން ފިލުވުމަށް އިއްޔެ ރައްޔިތުންގެ މަޖިލީހުގެ އިޤްތިސާދީ ކޮމެޓީއިން ފަރެސްމާތޮޑާއަށް ޒިޔާރަތް ކުރުމުންނެވެ.

އިޤްތިޞާދީ ކޮމިޓީއިން ދެކުނަށް ކުރި ދަތުރުގައިވަނީ ކޫއްޑޫއަށް ޒިޔާރަތްކޮށް، ކޫއްޑޫ ފިޝަރީސް ކޮމްޕްލެކްސްގެ ބޭފުޅުންނާއިވެސް ބައްދަލުކޮށްފައެވެ.

އިގްތިސާދީ ކޮމިޓީއާއި މަސްވެރިންނާއެކު ބޭއްވި މި ބައްދަލުވުމުގައި އެރަށުގެ ގިނަ އަދަދެއްގެ މަސްވެރިން ވަނީ ބައިވެރިވެފައެވެ. އެގޮތުން މަސްވެރިންވަނީ އެމީހުންގެ ހުރި ކަންބޮޑުވުންތައްވެސް މި ބައްދަލުވުމުގައި ޙިއްސާކޮށްފައެވެ.

މަސްވެރިންގެ އެންމެ ބޮޑު އެދުމަކަށްވީ މަސް ކިރޭނެ ފަސޭހަ އިންތިޒާމްތަކެއް ހަމަޖެހިގެންދިޔުމެވެ. އެގޮތުން އެރަށުގައި މަސް ފެކްޓްރީއެއް ތަރައްޤީކޮށްދިނުމަށް މަސްވެރިން ވަނީ އެދިފައެވެ. އެ ސަރަޙައްްދަކީ މަސްވެރިކަން ރަނގަޅު ހިސާބަކަށްވާތީ އެރަށުގައި މަސް ފެކްޓްރީއެއް ތަރައްޤީކުރުން ވެގެންދާނީ މަސްވެރިންނަށް މަސް ކިރުވުމަށް ވަރަށް ބޮޑަށް ލުޔަކަށް ވާނެކަމަށް ފަރެސްމާތޮޑާ މަސްވެރިން ވަނީ ފާހަގަކޮށްފައެވެ.

މަސްވެރިން ޙިއްސާކުރި ޚިޔާލުތަކަަކީ ރަނގަޅު ޚިޔާލުތަކެއް ކަމަށް ފާހަގަކޮށް އިގްތިސާދީ ކޮމިޓީން ވަނީ އެކަމަށް އެކޮމިޓީގެ ފުރިހަމަ އެއްބާރުލުން ދެއްވާނެ ކަމަށް ވިދާޅުވެފައެވެ.