އާރަށުގެ މައްސަލައިގައި ރައީސް ޔާމީންގެ ޝަރީއަތެއް މިއަދު

އެމްއެމްޕީއާރުސީ މެދުވެރިކޮށް ވ. އާރަށް ކުއްޔަށް ދިނުމުގައި ހިނގާފައިވާ މުއާމަލާތާ ގުޅިގެން ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ މައްޗަށް އުފުލާފައިވާ ދައުވާގެ އަޑުއެހުމެއް މިއަދު ބޭއްވުމަށް ނިންމައިފިއެވެ.

މި މައްސަލައިގައި މިއަދަށް ތާވަލުކޮށްފައިވަނީ ހެކި ބަސް ނެގުން ކަމަށްވާއިރު، މިއަދުގެ ޝަރީއަތް ބޭއްވުމަށް ތާވަލުކޮށްފައިވަނީ މިއަދު 11:00ގައެވެ.

އާރަށު މައްސަލައިގައި ދައުވާ އުފުލާފައިވަނީ ކުރީގެ ރައިސް ޔާމީންގެ މައްޗަށާއި، ޔޫސުފް ނަޢީމްގެ މައްޗަށެވެ. އެ މައްސަލައިގައި ޔާމީންގެ މައްޗަށް އުފުލައިފައިވަނީ މަނީލޯންޑަރިންގެ ދައުވާ އާއި ރިޝްވަތު ގަބޫލުކުރުމުގެ ދައުވާއެވެ. ޔޫސުފް ނައީމްގެ މައްޗަށް ވަނީ ރިޝްވަތު ދިނުމުގެ ދައުވާ އުފުލާފައެވެ.

އެ މައްސަލައިގައި ކްރިމިނަލް ކޯޓުގައި މިދިޔަ ބުރާސްފަތި ދުވަހު ބޭއްވި ހެކިބަސް ނެގުމުގެ އަޑުއެހުމުގައި، ވަނީ، ރައީސް ޔާމީންގެ މޯބައިލް ފޯނުގެ ފޮރިންސިކް ރިޕޯޓް ތައްޔާރުކުރި ފުލުހުންގެ ފޮރިންސިކް ސާވިސް ޑިޖިޓަލް އެވިޑެންސް ލެބޯޓްރީގައި ޑިޖިޓަލް އެވިޑެންސް އެގްޒެމިނަރަކަށް މަސައްކަތް ކުރައްވާ އަބްދުالله ޝިފާޒުގެ ހެކިބަސް ނަގައިފައެވެ.

އެދުވަހު އެ މައްސަލައިގާ ޝަރީއަތުން ތާވަލް ކުރީ ދެ ހެކިވެރިންގެ ހެކިބަސް ނެގުމަށެވެ. އެކަމަކު ހެކިބަސް ނެގުން ދިގުލައިގެން ދިއުމުގެ ސަބަބުން އެ ދުވަހަހަށް ތާވަލްކުރި ދެވަނަ ހެކިވެރިޔާ ހާޒިރުނުކޮށް ޝަރީއަތް ނިންމާލީއެވެ.