ރާއްޖޭގައި މަތީ ތައުލީމް ދޭ ބައެއް މަރުކަޒުތަކަށް ހުއްދަ ދީފައިވާ މިންގަނޑުތަކާ ހިލާފަށް އަމަލުކުރަމުން ދާ ނަމަ ފިޔަވަޅު އަޅާނެ ކަމަށް މޯލްޑިވްސް ކޮލިފިކޭޝަންސް އޮތޯރިޓީ (އެމްކިއުއޭ) އިން ބުނެފިއެވެ.
އެމްކިއުއޭ އިން ބުނެފައިވަނީ މަތީ ތައުލީމް ދޭ ބައެއް މަރުކަޒުތަކުގައި އެ އޮތޯރިޓީން ހުއްދަ ދީފައިވާ ބައެއް ޕްރޮގްރާމްތައް ހިންގުމުގައި، ހުއްދަ ދީފައިވާ މިންގަނޑުތަކާއި ޕްރޮގްރާމް އެކްރެޑިޓޭޝަން ގަވާއިދާ ހިލާފަށް، އަމަލުކުރަމުން ދާ ކަމަށް ބުނެ އާންމު ފަރާތްތަކުން ޝަކުވާ ހުށަހަޅަމުންދާ ކަމަށާއި އެގޮތަށް އަމަލުކުރާނަމަ ފިޔަވަޅު އަޅާނެ ކަމަށެވެ.
މީގެ އިތުރުން އެފަދަ އަމަލަކީ ގަވާއިދު ނަންބަރު: 2022/R-77 'ޕްރޮގްރާމް އެކްރެޑިޓޭޝަން ގަވާއިދު' އާ ހިލާފު އަމަލެއް ކަމަށް ވަނީ ބުނެފައެވެ. އެހެންކަމުން މަތީ ތައުލީމާއި ތަމްރީނުގެ ގާނޫނާއި، ޕްރޮގްރާމް އެކްރެޑިޓޭޝަން ގަވާއިދާ އެއްގޮތަށް ފިޔަވަޅު އަޅަމުންދާނެ ކަމަށް އެއޮތޯރިޓީން ވަނީ އަންގާފައެވެ.
އެއޮތޯރިޓީއަށް ލިބިފައިވާ ޝަކުވާ ތަކުގެ ތެރޭގައި އީ-ލާނިން ޑެލިވަރީ މޮޑަލިޓީގައި ހިންގުމުގެ ހުއްދަ ދީފައި ނުވާ ޕްރޮގްރާމްތައް އީ-ލާނިން ޑެލިވަރީ މޮޑަލިޓީގައި ހިންގުން ހިމެނެއެވެ. އެހެންކަމުން ޕްރޮގްރާމް އެކްރެޑިޓޭޝަން ގަވާއިދާ ހިލާފަށް ހިންގާ ޕްރޮގްރާމްތައް ބަލައި ނުގަންނާނެ ކަމަށް ވެސް އެމްކިއުއޭއިން ބުނެއެވެ.
ރާއްޖޭގައި މަތީ ތައުލީމް ހިދުމަތް ފޯރުކޮށްދޭ މަރުކަޒު ތަކާއި ކޮލެޖުތަށް އަންނަނީ ދުވަހެއް ދުވަހެއް އިތުރުވަމުންނެވެ. މި މަރުކަޒުތަކުން ދަސްވެނިވާ ކުދިން މިފަދަ ކަންތައްތަކަށް ސަމާލުވުމަށް އެއޮތޯރިޓީން ވަނީ އަންގާފައެވެ.
މޯލްޑިވްސް ކޮލިފިކޭޝަންސް އޮތޯރިޓީން ހާމަކޮށްފައިވާ ގޮތުގައި އީ-ލަރނިންގ ގައިޑްލައިން ގެ ބޭނުމަކީ ފެންވަރު ކަށަވަރު ކުރުމާއެކު އީ-ލަރނިންގ ޑެލިވަރީ މޮޑަލިޓީ ގެ ތެރެއިން ޕްރޮގްރާމްތައް ގެންދާނޭ ގޮތްތަކާއި އީ-ލަރނިންގ އަށް ކިޔަވައިދިނުމަށް އެދި މަރުކަޒުތަކުން އެދޭ އިރު ކޮންމެހެން ހުންނަން ޖެހޭ ކަންކަން ބަޔާންކޮށްފައިވާ މުހިންމު ގައިޑްލައިނެކެވެ.
ޚިޔާލު
އެންމެ ފުރަތަމަ ޚިޔާލު ދެއްވާ.