ޑައިވް މާސްޓަރ ލެވެލްއަށް ކިޔަވައިދޭ ކޯހެއް ޔޫމެޓް ސްކޫބާއިން ތިނަދޫގައި ފަށަނީ

ިޑައިވިންގ ދާއިރާއިން ޑައިވްމާސްޓަރ ލެވެލްއަށް ކިޔަވައިދޭ ކޯހެއް ޔޫމެޓް ސްކޫބާއިން ގދ.ތިނަދޫގައި ފަށަން ތައްޔާރުވެއްޖެއެވެ.

ހުވަދޫ ނިއުސްއަށް މައުލުމާތު ދެމުން ޔޫމެޓުން ބުނާގޮތުގައި މިކޯހަކީ މިނިސްޓްރީ އޮފް އިކޮނޮމިކް ޑިވެލޮޕްމެންޓުން ކުރިއަށް ގެންދާ ކޮވިޑް 19 އިންކަމްސަޕޯޓް "އަޕްސްކިލިންގ އެންޑް ޓެރެއިނިންގ ޕްރޮގްރާމް"  ޕްރޮޖެކްޓްގެ ދަށުން އެމިނިސްޓްރީ އާއި ޔޫމެޓް ސްކޫބާރ ގުޅިގެން ހިންގާ ކޯހެއް ކަމަށެވެ. އަދި ކޯހުގެ ކިޔެވުމުގެ ކޯސް ފީ އަދި ކިޔެވުމެ އެއްވެސް ޚަރަދެއް ޕްރޮގްރާމްގެ ބައިވެރިން ދައްކާކަށް ނުޖެހޭނެ ކަމަށާއި މިޕްރޮގްރާމްގެ ބައިވެރިންނަށް އެލަވަންސްގެ ގޮތުގައި 5،000.00 (ފަސްހާސް ރުފިޔާ) އާއި ހަމައަށް މަހަކު ދިނުމަށް ވެސް ހަމަޖެހިފައިވާ ކަމަށް ޔޫމެޓުން ވަނީ މައުލޫމާތު ދީފައެވެ.

މިއީ ގދ.ތިނަދޫގައި ޑައިވްމާސްޓަރ ލެވެލްއަށް ކިޔަވަދޭ ފުރަތަމަ ކޯހެވެ. މިޕްރޮގްރާމްގެ މަގުސަދަކީ، ދިވެހި ރާއްޖޭގައި ކޮވިޑް-19 އާ ގުޅިގެން އާމްދަނީއަށް ނުރަނގަޅު އަސަރުކޮށްފައިވާ ފަރާތްތަކަށް ވަޒީފާގެ ބާޒާރަށް ނުކުމެ، ވަޒީފާގެ ފުރުސަތު ހޯދުމަށް މަގުފަހިކޮށްދިނުމެވެ.

އުމުރުން 16 އަހަރާއި 65 އަހަރާ ދެމެދުގެ ފަރާތްތަކަށް ބައިވެރިވެވޭ މިކޯހުގައި 18 އަހަރު ނުފުރޭ ފަރާތްތަކަށް ބައިވެރި ވެވޭނީ ބެލެނި ވެރިއެއްގެ ހުއްދައާއި އެކުއެވެ.  ކޯސް ފުރިހަމަކުރާ ފަރާތްތަކަށް ރިސޯޓް އަދި ޑައިވް ސެންޓަރ ތަކުން މިދާއިރާއިން ވަޒީފާލިބުމުގެ ފުރުސަތު މިޕްރޮގްރާމްގެ ފުރިހަމަކުރާ ފަރާތްތަކަށް ފަހިވެގެންދާނެއެވެ.

މި ޕްރޮގްރާމްގައި ބައިވެރިވުމަށް އެދި އެޕްލިކޭޝަން ހުށަހަޅަންޖެހެނީ މިނިސްޓްރީގެ ޖޮބް ސެންޓަރު ޕޯޓަލް މެދުވެރިކޮށް އޮންލައިންކޮށެވެ. އެޕްލިކޭޝަން ހުށަހަޅާނެ ގޮތުގެ ތަފްސީލް ޖޮބްސެންޓަރ ވެބްސައިޓުންނާއި އަދި ޔޫމެޓް ސްކޫބާއިން ލިބޭނެއެވެ.

ޔޫމެޓް ސްކޫބާއަކީ އެންޑީ އެލްގައި ރަޖިސްޓްރީ ވެފައިވާ 5 ތަރީގެ ޑައިވް ސްކޫލެކެވެ.  ޑައިވިންގ ދާއިރާއިން ކުރިއަށް ދިއުމަށް ޝައުގުވެރިވާ ހުވަދު އަތޮޅު ދެކުނު، އަދި އުތުރުބުރީ ފަރާތްތަކަށް ޚާއްސަ އިސްކަމެއް ދޭނެ ކަމަށް މިޕްރޮގްރާމް ހުވަދު އަތޮޅުގައި ފުރަތަމަ ފަށާ ޔޫމެޓް ސްކޫބާ ޑައިވް ސްކޫލުން މަޢުލޫމާތުދެއެވެ.