ރިވެލި އެވޯޑު 2026 އަށް ހުށަހެޅުމުގެ ފުރުސަތު ހުޅުވާލައިފި

ނުކުޅެދުންތެރިކަން ހުންނަ ފަރާތްތަކާއި އެ ދާއިރާގައި މަސައްކަތްކުރާ ފަރާތްތަކުގެ އަގުވަޒަންކުރުމުގެ ގޮތުން ދޭ "ރިވެލި އެވޯޑު 2026" އަށް ކުރިމަތިލުމުގެ ފުރުސަތު މިނިސްޓްރީ އޮފް ހެލްތު އެންޑް ފެމިލީ އެންޑް ސޯޝަލް ސާވިސަސް އިން މިއަދު ހުޅުވާލައިފިއެވެ.

މި އެވޯޑަކީ ހާއްސަ އެހީއަށް ބޭނުންވާ މީހުންގެ ހުނަރާއި ގާބިލުކަން ފާހަގަކޮށް، މުޖުތަމައުގައި އެފަރާތްތަކުގެ ބައިވެރިވުން އިތުރުކުރުމަށް ދެވޭ މުހިންމު އެވޯޑެކެވެ. މި އަހަރު އެވޯޑު ދިނުމަށް ހަމަޖެހިފައިވަނީ މައިގަނޑު ހަ ދާއިރާއަކުންނެވެ. އޭގެ ތެރޭގައި ހާއްސަ އެހީއަށް ބޭނުންވާ ތިން ފަރާތަކަށާއި، ރާއްޖެއަށް ރީތި ނަމާއި ކާމިޔާބީ ހޯދައިދޭ ފަރާތްތަކުގެ އިތުރުން، ތައުލީމު ފޯރުކޮށްދިނުމުގެ ދާއިރާއިން ސަރުކާރު އަދި އަމިއްލަ ދެ ފަރާތަކަށް އެވޯޑު ދިނުމަށް ވަނީ ނިންމާފައެވެ.

މީގެ އިތުރުން، ހިދުމަތް ދިނުމަށް މަސައްކަތްކުރާ އަމިއްލަ ޖަމިއްޔާއަކަށާއި، ފަންނީ އަދި ފަރުދީގޮތުން އެހީތެރިކަން ފޯރުކޮށްދިނުމުގެ ދާއިރާއިން އެއް ފަރާތަކަށް އަދި އިގްތިސާދީ ގޮތުން ބާރުވެރިކުރުމަށް އެހީތެރިވާ ސަރުކާރު އަދި އަމިއްލަ ދެ ކުންފުންޏަކަށް އެވޯޑު ދިނުމަށް ވަނީ ހަމަޖެހިފައެވެ. މި އެވޯޑަށް އަމިއްލައަށް ނަން ހުށަހެޅުމުގެ ފުރުސަތާއި، އެހެން ފަރާތަކުން ނޮމިނޭޓް ކުރުމުގެ ފުރުސަތު ވެސް ވަނީ ހުޅުވާލެވިފައެވެ.

އެވޯޑަށް ކުރިމަތިލާ ފަރާތްތަކުން ފުރިހަމަ ކުރާ އެޕްލިކޭޝަން ފޯމާއެކު، ވަނަވަރު، އައިޑީ ކާޑު ކޮޕީ، މަސައްކަތުގެ ސައްހަކަން އަންގައިދޭ ލިޔުންތަކާއި ދެ ބޭފުޅެއްގެ ހެކިބަސް ހިމެނޭ ލިޔުން ހުށަހަޅަންޖެހޭނެ ކަމަށް މިނިސްޓްރީން ބުނެއެވެ. އެވޯޑު ލިބޭ ފަރާތްތައް ހޮވާނީ އެ ވުޒާރާއިން އެކުލަވާލާ ހާއްސަ ކޮމިޓީއަކުންނެވެ.

އެވޯޑުގެ އުސޫލާއި މާކްސް ދޭނެ މިންގަނޑުތަކުގެ އިތުރުން އެޕްލިކޭޝަން ފޯމު، މިނިސްޓްރީގެ ކައުންޓަރުންނާއި، ވެބްސައިޓުން އަދި އަތޮޅުތެރޭގައި ގާއިމްކޮށްފައިވާ ފެމިލީ އެންޑް ޗިލްޑްރަން ސާވިސް ސެންޓަރުތަކުން ލިބެން ހުންނާނެއެވެ. މީގެ އިތުރުން ހުޅުމާލޭގައި ހުންނަ އުމަރު ޒާހިރު އޮފީސް ބިލްޑިންގްގެ ކައުންޓަރުން ވެސް ފޯމު ލިބޭނެއެވެ.

މި އެވޯޑަށް ފޯމު ހުށަހެޅުމުގެ އެންމެ ފަހު ތާރީހަކީ އަންނަ އޮގަސްޓް މަހުގެ 30 ވަނަ ދުވަހުގެ މެންދުރު 13:00 އެވެ.