އަލިފާނުގެ އަނެއްހާދިސާ، އިވްނިންގކެފޭބަދިގެ ރޯވެއްޖެ

މިރޭ އިރާކޮޅު މާލެސިޓީގެ އޯކިޑުމަގުގައި ހުންނަ އިވްނިންގް ކެފޭގެ ބަދިގޭގައި ރޯވެެއްޖެއެވެ.

ރޯވީ އިވްނިންގ ކެފޭގެ ބަދިގޭގައި ނަމަވެސް އެކެފޭގެ މަތީގަ ޑެގް އަޅައިގެން ހަދާފައި ހުރި ބިދޭސީންގެ އެކޮމޮޑޭޝަން ބްލޮކުގައި ރޯވެފައި ވާތީ، އެތަނުގެ ފާރާ އިންވެގެން ހުރި ގެތަކުގެ މީހުން ހުސްކުރުމަށް ފުރަތަމަވެސް މަސައްކަތް ވަނީ ފަށާފައެވެ.

ސަރަހައްދުގައި އެމްއެންޑީއެފް ފަޔާ އެންޑް ރެސްކިއު އާއި ފުލުހުން ދަނީ ހަރަކާތްތެރިވަމުންނެވެ. އިވްނިންގ ކެފޭގެ ބަދިގޭގެ ފާރާ އިންވެގެން ހުރި ގޭބީސީތަކުގެ މައުލޫމާތު ނެގުމާއިއެކު އެ ގެތަކުގެ މީހުން ގޭގެއިން ބޭރު ކުރުމުގެ މަސައްކަތް ދަނީ ކުރެވެމުންނެވެ.

ގެތަކުން އާއިލާތައް ބޭރަށް ނެރެވިފައި

އަދި ކެފޭގެ ވަށައިގެން ހުރި ގެތަކުން މިހާރު ވަނީ މީހުން ހުސްކުރެވިފައެވެ.

ހާލަތު ދެރަވި މީހަކު ގެންދަނީ ފޮޓޯ: ޝާމިން

މަންޒަރު ފެނުނު ބައެއް އުމުރުން ދުވަސްވީ މީހުން ހެއަށް ގޮތް ވެ އެމްބިއުލާންސުގައި ވަނީ ގެންދެވިފައެެވެ.

މީހުން ރައްކާތެރިކަމާއެކު ނެރެވުމަށްފަހު މިހާރު ގޭގެއަށް ވަނުމުގެ ހުއްދަ ދޭން ފަށައިފިއެވެ. އެއްވެސް މީހަކަށް މިހާދިސާގައި ގެއްލުމެއް ލިބިފައިވާ ކަމަކަށް އަދި މައުލޫމާތެއް ނުލިބެއެވެ.

އަލިފާންގަނޑު ކޮންޓްރޯލް ކުރެވި މީގެ އިރުކޮޅެއް ކުރިން ނިވާލެވިއްޖެ ކަމަށް އެމްއެންޑީއެފުން މައުލޫމާތު ލިބިފައިވެއެވެ. އަދި މިހާރު އިތުރު އެއްވެސް ނުރައްކަލެއް އޮތްތޯވެސް ބަލާ ޗެކްކޮށްފައިވާ ކަމަށްވެސް މައުލޫމާތު ލިބެއެވެ.

ފަހަކަށް އައިސް މާލޭގެ އެކި ހިސާބުތަކުގައި ކުއްލި އަލިފާނުގެ ހާދިސާތައް ދަނީ ހިނގަމުންނެވެ.