ޑރ އަބްދުއްސަމަދު މެމޯރިއަލް ހޮސްޕިޓަލުން "އިހެމުން'' ނަމުގައި ކެމްޕޭނެއް ފަށައިފި

"އިހެމުން'' ނަމުގައި ޑރ އަބަދުއްސަމަދު މެމޯރިއަލް ހޮސްޕިޓަލުން ހާއްސަ ކެމްޕޭނެއް ފަށައިފިއެވެ.

ޑރ އަބްދުއްސަމަދު މެމޯރިއަލް ހޮސްޕިޓަލުގައި މަސައްކަތްކުރައްވާ ހުރިހާ މުވައްޒަފުން އަދި ގދ އަތޮޅުގެ ހުރިހާ ސިއްޙީ މަރުކަޒުތަކުގައި މަސައްކަތްކުރައްވާ މުވައްޒަފުންނަށް އަމާޒުކޮށްގެން '' އިހެމުން '' ނަމުހައި ފެށި މި ޙާއްސަ ކެމްޕޭން އިފްތިތާހް ފަށާފައި ވަނީ ހޮސްޕިޓަލުގެ ގޯތިތެރޭގައި އެކަމަށްޓަކައި މިއަދު ބޭއްވުނު ރަސްމިއްޔާތެއްގައެވެ. މި ކެމްޕެއިން އިފްތިތާހްކޮށްދެއްވީ ހޮސްޕިޓަލުގެ ގަވަރނިންގ ބޯޑުގެ ޗެއަރ ޑރ ލައުޝާ މުޙައްމަދު އަދި ހޮސްޕިޓަލުގެ ޑެޕިއުޓީ ސީއީއޯ އަބްދުލް އަޒީޒް ރިފާއުއެވެ.

ހުވަދޫ ނޫހަށް މަޢުލޫމާތު ދެއްވަމުން ޑރ. އަބްދުއްސަމަދު މެމޯރިއަލް ހޮސްޕިޓަލުގެ މީޑިއާ އޮފިޝަލް ސާލިމް އަލީ ވިދާޅުވީ މިއީ ހޮސްޕިޓަލް އަދި ސިއްހީ މަރުކަޒުތަކުގައި މަސައްކަތްކުރައްވާ މުވައްޒަފުންގެ ހުނަރާއި ގާބިލްކަން އިތުރުކޮށް ބަލިމީހުންނަށް ފޯރުކޮށްދޭ ޚިދުމަތުގެ ފެންވަރު ރަގަޅުކުރުމުގެ އިތުރުން ޚިދުމަތް ލިބިގަތުމަށްޓަކައި ހޮސްޕިޓަލަށް ނުވަތަ މަރުކަޒަށް އަންނަ ބަލިމީހުންނާއި ރައްޓެހި މާހައުލެއްގައި ހިނިތުންވުމާއި އޯގާތެރިކަމާއެކު ފޯރުކޮށްދޭ ޚިދުމަތަކަށް ބަދަލުކުރުމުގެ މަގްސަދުގައި އިފްތިތާހްކުރެވުނު ޕްރޮގްރާމެއް ކަމަށެވެ.

މިރަސްމިއްޔާތުގައި ވާހަކަފުޅު ހޮސްޕިޓަލުގެ ޑެޕިއުޓީ ސީއީއޯ އަބްދުލް އަޒީޒް ރިފާއު މިފަދަ ޕްރޮގްރާމެއްގެ މުހިންމުކަން ފާހަގަ ކުރައްވައި ވިދާޅުވީ ، ޚިދުމަތެއް ލިބިގަތުމަށްޓަކައި ހޮސްޕިޓަލަށް އަންނަ ބަލިމީހުންނާއި ބައްދަލުކުރާގޮތް މިކެމްޕެއިންގެ ސަބަބުން ބަދަލުވެގެން ދާނެކަމަށާއި، ހިނިތުންވުމާއެކު ބަލިމީހުންނަށް ކިޔާ މަރުހަބާއިންވެސް ތަސައްވުރަށް ރަގަޅު ބަދަލެއް ގެނެސްދޭނެ ކަމަށެވެ. އަދި ހޮސްޕިޓަލުގެ މުޅިވެއްޓަކީވެސް ބަލިމީހުންނާއި ރައްޓެހި، ބަލިމީހުންނަށް އޯގާތެރިކަމާއެކު އަޅާލާނެ މުވައްޒަފުންތަކެއް ތިބި ވެއްޓަކަށް ބަދަލުވެގެން ދިއުމުގެ ބާރަކަށް މިކެމްޕެއިން ވެގެންދާނެކަމަށް ވެސް އޭނާ ވިދާޅުވިއެވެ.

ހޮސްޕިޓަލުގެ އިތުރުން ގދ. އަތޮޅުގެ ހުރިހާ ސިއްހީ މަރުކަޒުތަކުގައިވެސް މި ކެމްޕެއިން މިއަދު ވަނީ އިފްތިތާހްކޮށްފައެވެ.