ސައުދީގެ ތެލުގެ ވަސީލަތްތަކަށް އަމާޒުކޮށްދިން ހަމަލާ، ރާއްޖެއިން ކުށްވެރިކޮށްފި

ސައުދީ އަރަބިއްޔާގެ ތެލުގެ ވަސީލަތްތަކަށް އަމާޒުކޮށް ދިން ހަމަލާތައް ދިވެހި ސަރުކާރުން ކުށްވެރިކޮށްފިއެވެ.

އިރުމަތީ ޕްރޮވިންސާއި ވެރިރަށް ރިޔާދާއި ތެލުގެ ވަސީލަތްތަކަށް އަމާޒުކޮށް ދިން ޑްރޯން ހަމަލާތަކެއް ނާކާމިޔާބުކޮށްފައިވާ ކަމަށް ސައުދީގެ ޑިފެންސް މިނިސްޓްރީން ހޯމަ ދުވަހު ހާމަކުރުމުން، ދިވެހިރާއްޖޭގެ ފޮރިން މިނިސްޓްރީން ނެރުއްވި ބަޔާނެއްގައި ވަނީ އެއީ ސަރަހައްދީ ހަމަޖެހުމަށް އޮތް ނުރައްކަލެއްގެ ގޮތުގައި ސިފަކޮށް، ހަރުކަށި އިބާރާތަކުން ކުށްވެރިކޮށްފައެވެ.

ދިވެހި ސަރުކާރުން ވަނީ ރާއްޖެ އޮންނާނީ ސައުދީ އަރަބިއްޔާއާއެކުކަން ފާހަގަކޮށް، އެ ގައުމުގެ ސަލާމަތާއި އިސްތިގުލާލު ރައްކާތެރިކުރުމަށް އަޅާ ކޮންމެ ފިޔަވަޅަކަށް ތާއީދުކުރާނެ ކަމަށް ބުނެފައެވެ.

ސައުދީއަށް ހަމަލާތައް އަމާޒުކޮށްފައިވަނީ، އެމެރިކާއާއި އީރާނުން ވަރުގަދަ ހަމަލާތައް ބަދަލުކުރާތާ ދެ ހަފުތާ ވުމަށް ފަހު، ހަމަލާތައް މެދުކަނޑާލައިފައި ވަނިކޮށެވެ.

އެމެރިކާއިން ހަމަލާތައް މެދުކަނޑާލުމުން، އީރާނުން ވަނީ އެ ގައުމުން، އެމެރިކާއަށް ވާގިވެރިވާ ގައުމުތަކަށް ހަމަލާ ދިނުން ހުއްޓާލައިފައިވާ ކަމަށް ވެސް ބުނެފައެވެ.

ސައުދީއިން ތުހުމަތު ކުރާ ގޮތުގައި، އެ ގައުމުގެ އިރުމަތީ ޕްރޮވިންސާއި ވެރިރަށް ރިޔާދާއި ތެލުގެ ވަސީލަތްތަކަށް އަމާޒުކޮށް ދިން ޑްރޯން ހަމަލާތައް ދީފައިވަނީ، އީރާނުން ވާގިވެރިވާ ޖަމާއަތަކުން، އިރާގުގައި ތިބެގެންނެވެ.