ޗާލު ދިވެހިރާއްޖެ އެވޯޑް: ރަށްރަށުގެ އިވެލުއޭޝަން ދަތުރުތައް ފަށައިފި

ޕަބްލިކް ސަރވިސް މީޑިއާ (ޕީއެސްއެމް) އިން ރާއްޖޭގެ ރަށްރަށަށް އަމާޒުކޮށްގެން ތަޢާރަފްކުރި "ޗާލު ދިވެހިރާއްޖެ އެވޯޑް" ގެ ރަށްރަށުގެ އިވެލުއޭޝަން ދަތުރުތައް ރަސްމީކޮށް ފަށައިފިއެވެ. މި ދަތުރުތަކުގައި ޕީއެސްއެމްގެ މެނޭޖިން ޑިރެކްޓަރ އަހުމަދު ޝަކީބްއާއި އެ ކުންފުނީގެ އިސްވެރިންގެ އިތުރުން އެވޯޑުގެ ފަނޑިޔާރުން ބައިވެރިވެވަޑައިގަންނަވައެވެ.

މި އެވޯޑަކީ ރާއްޖޭގެ ރަށްރަށުގެ ރައްޔިތުންގެ އިސްނެގުމާއެކު، ތިމާވެށި ޙިމާޔަތްކުރުމަށާއި، ދިވެހިންގެ މުއްސަނދި އާދަކާދައާއި ސަޤާފަތް ކުރިއެރުވުމަށް ރަށްރަށުން ކުރާ މަސައްކަތްތަކުގެ އަގުވަޒަންކުރުމަށް ދޭ އެވޯޑެކެވެ. ޖުމްލަ 7 ކެޓަގަރީއަކުން 50 ރަށަކުން މި އެވޯޑަށް ކުރިމަތިލާފައިވާއިރު، 11 އަތޮޅަކުން 14 ރަށެއް ވަނީ ދެވަނަ ބުރަށް ހޮވިފައެވެ.

ޕީއެސްއެމްގެ ބިޒްނަސް ޑިވެލޮޕްމަންޓު އެގްޒެކެޓިވް އައިޝަތު ލިވާ ޒިޔާދު ވިދާޅުވީ، އިވެލުއޭޝަން ދަތުރުގައި ދެވަނަ ބުރަށް ހޮވުނު 14 ރަށަށް ޒިޔާރަތްކުރާނެ ކަމަށެވެ. ފުރަތަމަ މަންޒިލެއްގެ ގޮތުން ކ. ގުރައިދޫއަށް ޒިޔާރަތްކޮށްފައިވާއިރު، މި ދަތުރުތަކުގައި ރަށްރަށުގެ ތަންތަން ބެލުމާއި އާންމު ރައްޔިތުންނާ ވާހަކަދައްކައި މަޢުލޫމާތު އެއްކުރާނެއެވެ.

އިންސާފުވެރި ނަތީޖާއަކަށް މިނިވަން އޮޑިޓެއް

އެވޯޑުގެ ނަތީޖާ ކަނޑައެޅުމުގައި ދެފުށް ފެންނަ ސިޔާސަތެއް ގެންގުޅުމަށްޓަކައި، މިނިވަން އޮޑިޓް ފާމެއް މެދުވެރިކޮށް ނަތީޖާ ވަޒަންކުރާނެ ކަމަށް ލިވާ ވިދާޅުވިއެވެ. "މި މަސައްކަތުގައި ޕީއެސްއެމްގެ އެއްވެސް ބައިވެރިވުމެއް ނޯންނާނެ،" ލިވާ ވިދާޅުވިއެވެ. މާކްސް ދިނުމުގައި ހަރަކާތްތެރިވާނީ އެ ދާއިރާތަކުގެ ތަޖުރިބާކާރުންނާއި މުސްތަޤިއްލު ފަނޑިޔާރުންނެވެ.

އެވޯޑުގެ ފައިނަލް ސްކޯ ކަނޑައެޅުމުގައި ފަނޑިޔާރުންގެ އިވެލުއޭޝަނަށް 60 އިންސައްތަ ދިނުމަށް ހަމަޖެހިފައިވާއިރު، ބާކީ 40 އިންސައްތަ ކަނޑައަޅާނީ އާންމުންގެ ވޯޓުންނެވެ. މިހާރު ހޮވިފައިވާ ގަދަ ފަސް ރަށުގެ ތެރޭގައި ރަސްގެތީމު، ނައިވައިދޫ، މަތިވެރި، ހިތަދޫ، ދަނގެތި، އުކުޅަސް، ކުޑަރިކިލު، ދިގުރަށް، ރިނބުދޫ، ކެޔޮދޫ، ފުވައްމުލައް ސިޓީ، ގުރައިދޫ، ހިންނަވަރު އަދި މަންދޫ ހިމެނެއެވެ.

މި އެވޯޑުގެ މައިގަނޑު މަޤްސަދަކީ ރަށްރަށުގެ ރައްޔިތުންގެ މެދުގައި ރަށަށް ލޯބިކުރުމުގެ ރޫޙު އާލާކޮށް، ދެމެހެއްޓެނިވި ތަރައްޤީއާއި ފަތުރުވެރިކަން ކުރިއެރުވުމަށް ހިތްވަރު ދިނުމެވެ. އަދި ރަށްރަށުން ހޯދާ ކާމިޔާބީތައް ޤައުމީ ފެންވަރުގައި ފާހަގަކޮށް އިޝްތިހާރު ކުރުމަކީވެސް މި ޕްރޮގްރާމުގެ އަމާޒެކެވެ.