ދިރިއުޅުން ނޫން އެހެނިހެން ބޭނުންތަކަށް ދޫކުރާ ބިންތަކާ ބެހޭ އައު ޤަވާއިދު އާންމު ކޮށްފި

ދިރިއުޅުން ނޫން އެހެނިހެން ބޭނުންތަކަށް ދޫކުރާ ބިންތައް ދޫކުރުމުގައި ޢަމަލުކުރަންޖެހޭ އިޖުރާތުތައް ކަނޑައަޅައި، ބިމާ ބެހޭ ޤާނޫނުގެ ދަށުން އެކަމުގެ ޤަވާއިދު އެކުލަވާލައި މިއަދު ވަނީ އާންމުކޮށްފައެވެ. މި ޤަވާއިދު ހިންގައި ތަންފީޒުކުރުމުގެ ޒިންމާ މަތިކޮށްފައިވަނީ މިނިސްޓްރީ އޮފް ހައުސިންގ، ލޭންޑް އެންޑް އަރބަން ޑިވެލޮޕްމަންޓަށެވެ.

މި ޤަވާއިދު ހިނގާނީ ދިރިއުޅުމުގެ ބޭނުން ފިޔަވައި އެހެނިހެން ބޭނުންތަކަށް ކައުންސިލްތަކާއި ވުޒާރާތަކުން އަދި ދައުލަތުގެ އެކި އިދާރާތަކުން ދޫކުރާ ނުވަތަ ހަވާލުކުރާ ބިންތަކުގެ މައްޗަށެވެ. ޤަވާއިދުގެ މައިގަނޑު މަޤުޞަދަކީ ބިން ދޫކުރެވޭނެ އުސޫލުތަކާއި، ބިމުގެ ރަޖިސްޓްރީ ދޫކުރުމާއި، ބިމާ ގުޅޭ ޙައްޤުތަކާއި ބިން ނަގާ ފަރާތްތަކުގެ މަސްއޫލިއްޔަތުތައް ސާފުކޮށް ބަޔާންކުރުމެވެ.

އައު ޤަވާއިދުގައިވާ ގޮތުން، ލޯކަލް ކައުންސިލްތަކުގެ އިޚްތިޞާޞްގެ ތެރޭގައި ހިމެނޭ އަދި ކައުންސިލުގެ މިލްކުވެރިކަމުގައިވާ ބިންތައް ދޫކުރާނީ އެ ކައުންސިލަކުންނެވެ. އެ ނޫން ބިންތައް ދޫކުރުމުގެ ބާރު ލިބިގެންވަނީ ކަމާބެހޭ ވުޒާރާއަށެވެ. މި ހުރިހާ މުޢާމަލާތްތަކެއްވެސް ހިނގަންވާނީ ރައީސުލްޖުމްހޫރިއްޔާ ކަނޑައަޅުއްވާ ސިޔާސަތުތަކާ އެއްގޮތްވާ ގޮތުގެ މަތިންނެވެ.

ބިން ކުއްޔަށް ދޫކުރާ އެންމެ ކުޑަ އަގާއި، ވިއްކާ އަގު އަދި އާންމު ޚިދުމަތްތަކަށް ދޫކުރާ ބިންތަކުގެ އަގު ކަނޑައެޅުމަށްޓަކައި 9 މެންބަރުންގެ ލޭންޑް ވެލުއޭޝަން ކޮމިޓީއެއް އުފެއްދުމަށް ޤަވާއިދުގައި ވަނީ ކަނޑައަޅާފައެވެ. މި ކޮމިޓީގައި މާލީ، އިޤްތިޞާދީ، މަސްވެރިކަން، ފަތުރުވެރިކަން، އިމާރާތްކުރުން އަދި ދަނޑުވެރިކަމާ ބެހޭ ވުޒާރާތަކުގެ އިތުރުން އެލް.ޖީ.އޭ ގެ މެންބަރުން ހިމެނޭނެއެވެ. އަގު ކަނޑައެޅުމުގައި ރަށުގެ އިޤްތިޞާދީ ފުދުންތެރިކަމާއި ބިމުގެ ޑިމާންޑަށް ބަލަންޖެހެއެވެ.

މި ޤަވާއިދުގެ ދަށުން ދޫކުރާ ނުވަތަ ވިއްކާ ހުރިހާ ބިންތަކުގެ މައުލޫމާތު ހިމެނޭ ދަފްތަރެއް ކައުންސިލްތަކުން ނުވަތަ މިނިސްޓްރީން ބަލަހައްޓަން ޖެހޭނެއެވެ. ޤަވާއިދަށް ޢަމަލުކުރަން ފެށުމުގެ ކުރިން ހަދާފައިވާ ރަޖިސްޓަރީތައް ބާޠިލު ނުވި ނަމަވެސް، ކުރިއަށް އޮތް 6 މަސްދުވަހުގެ ތެރޭގައި ބިމުގެ ދަފްތަރު އަދާހަމަކުރަން ޖެހޭނެ ކަމަށް ޤަވާއިދުގައި ބަޔާންކޮށްފައިވެއެވެ.

ދިވެހިރާއްޖޭގެ ބިމާ ބެހޭ ޤާނޫނަކީ 2003 ވަނަ އަހަރުން ފެށިގެން ޢަމަލުކުރަމުން އަންނަ ޤާނޫނެކެވެ. މި އައު ޤަވާއިދާއެކު ބިން ބޭނުންކުރުމުގެ އިޖުރާތުތައް އިތުރަށް ހަރުދަނާވެގެންދާނެ ކަމަށް ބެލެވެއެވެ.