ދަނގަޑު އެއްޗެއް ބޭނުންކޮށްގެން އުމަރު ނަސީރުއަށް ހަމަލާދިފި

ރިޔާސީ އިންތިހާބުގައި އަމިއްލަ ގޮތުން ވާދަކުރައްވާ ކެންޑިޑޭޓް އުމަރު ނަސީރުއަށް ކެމްޕެއިންއާއި ގުޅިގެން ބޭއްވި ސައިކަލްބުރުގެ ތެރެއިން، ދަނގަޑު އެއްޗެއް ބޭނުންކޮށްގެން ހަމަލާދީފިއެވެ.

އެބޭފުޅާ މީސްމީޑިއާގައި ހިއްސާ ކުރެއްވި ޕޯސްޓެއްގައި ވިދާޅުވީ، މަސްތުވާތަކެތި ވިއްކާ ކަމަށް ތުޙުމަތުކުރެވޭ މީހަކު ދަނގަޑު އެއްޗެއް އެއްލައި މޫނު މަތީގައި ޖަހާފައިވާ ކަމަށެވެ. އަދި ހަމަލާ ދިނުމަށްފަހު އެމީހަކު އެތަނުން ފިލާފައިވާ ކަމަށްވެސް އުމަރު އޭނާގެ ރަސްމީ ފޭސްބުކް ޕޭޖްގައި ބުނެފައިވެއެވެ.

އުމަރު ވިދާޅުވިގޮތުގައި، އޭނާގެ ސެކިއުރިޓީގެ ގޮތުގައި ތިބި ސިފައިން ވަނީ އޭނާގެ ފޮޓޯ ފުލުހުންނާއި ހިއްސާ ކުރައްޥާފައެވެ. އަދި މި ހާދިސާގެ ސަބަބުން އޭނާއަށް އަނިޔާއެއް ލިބިފައި ނުވާ ކަމަށްވެސް އޭނާ ވިދާޅުވިއެވެ.

އެހެން ނަމަވެސް، އަދި މިހާތަނަށް، ފުލުހުންގެ ފަރާތުން މި މައްސަލައާއި ގުޅިގެން މީޑިއާއަށް އެއްވެސް ޖަވާބެއް ދެއްވާފައި ނުވެއެވެ.

އުމަރު ފާހަގަ ކޮށްލެވެނީ، ފާޅުގައި ގޭންގުތަކާއި، މާރަމާރީއާއި، ޑްރަގް ހުއްޓުވާނެ ކަމަށް ބުނާ މީހެއްގެ ގޮތުގައެވެ. އަދި ގޭންގުތައް ނައްތާލާނެ ކަމަށް އެކި ޕޯޑިއަމްތަކުގައި އުމަރު ވަނީ ގޮވާލާފައެވެ.

ދެ ޕާޓީގެ މެދުގައި ހިނގި ހަމަނުޖެހުމެއްގެ ތެރެއިން ކ. ގުރައީދޫގައިވެސް ވަނީި މިއަދު މާރާމާރީ ހިންގާ ދެ މީހެއްގެ ބޯ ފަޅާލާފައެވެ. އެމްޑީޕީއާއި ޕީޕީއެމްގެ ސަޕޯޓަރުންގެ ދެމެދު ހިނގި އެ މާރާމާރީގެ ތެރެއިން ފުލުހުން ވަނީ 22 އަހަރުގެ ޒުވާނަކު ފުލުހުންގެ ބެލުމުގެ ދަށަށް ގެންގޮސްފައެވެ.