ތިނަދޫ ސިޓީގައި ސަރުކާރުން ހެދި ފުޓްބޯޅަ ދަނޑުގެ އެއްބައި ފެނު އަޑީގައި

ތިނަދޫ ސިޓީގައި ޓާފު އަޅައި ތައްޔާރު ކުރި ފުޓްބޯޅަ ދަނޑެއް ރަސްމީކޮށް ހުޅުވިތާ ހަފުތާއެއް ނުވަނީސް ވެހުނު ވާރެއާއި އެކު ދަނޑުގެ އެއްބައި ގައި ފެންބޮނޑުވެ, އެ ފެން ބޭރު ނުވުމުގެ ސަބަބުން ނުކުޅެވޭ ވަރުވެއްޖެއެވެ.

ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް މީގެ ދެތިން ދުވަސް ކުރިން ކުރެއްވި ކެމްޕޭން ދަތުރު ފުޅުގައި ތިނަދޫ ސިޓީ އަށް ވަޑައިގެން ހުޅުއްވައި ދެއްވާ ގޮތަށް ހަދަމުން ދިޔަ މި ދަނޑުގައި ފެންބޮޑުވެފައިވަނީ އަރި މަތީގައި ހަދާފައިވާ ކާނު ތަކުން އެއްވެސް ގޮތަކަށް ފެން ބޭރު ނުވާތީ ކަމަށް އިއްޔެ އެ ދަނޑުގައި ކުޅެން ގޮސް ތިބި މީހުން ބުނެއެވެ. ޒުވާނުން ތަކެއް އެދިގެން ދަނޑުގެ ހާލަތު ބަލާ ލުމަށް ހުވަދޫ މީޑިއާ އިން ގޮސް ބޭލި އިރު ދަނޑުގެ ދެކުނު ފަރާތު ގޯލު ކައިރީން ފެށިގެން ކޯނަރު ނަގާ ހިސާބާއި އިރުމަތީ ފަރާތުގައި ވަނީ ވަރަށް ބޮޑަށް ފެންބޮޑުވެފައެވެ.

ތިނަދޫ ސިޓީގެ އާ ދަނޑު ފެންބޮޑުވެފައި ވާއިރަށް ތުއްތު ކުދިން ތަކެއް ފެނާ ކުޅެ މަޖާ ކުރަނީ

ޖުމްލަ 5,530,502.00 ރުފިޔާ ހަރަދުކޮށްގެން ޒަމާނީ ޓާފު ދަނޑެއްގެ ގޮތުގައި ތައްޔާރު ކޮށް ރޭގަނޑު ކުޅެވޭ ގޮތަށް ހަދާފައިވާ މި ދަނޑުގައި މައްސަލަ ތަކެއް ހުރި ކަމަށް ޔޫތު މިނިސްޓަރު އަހުމަދު މަހުލޫފް ވެސް ފާހަގަ ކުރައްވާފައިވާ އިރު އެތަނުގައި ހަދަން ޖެހޭ ޗޭންޖިން ރޫމް ތަކާއި ފާޚާނާ ތަކުގެ މަސައްކަތް ތަކާއި ދަނޑުގައި ކުރަން ޖެހޭ އިތުރު މަސައްކަތްތައްވެސް ނިމިފައިވާ ނުވާ ކަން ފާހަގަކުރެވެއެވެ. އަދި އެތަނުގައި ހަދަން ބަޔަކާ ހަވާލު ކޮއްފައި ކަމަށް ބުނާ ސިޑިބަރީގެ މަސައްކަތް އެއްވެސް ގޮތަކަށް ފަށާފައި ނުވެއެވެ. ތިނަދޫ ދެކުނު އަވަށުގައި ސަރުކާރުން ހަދަމުންދާ މި ދަނޑު ގެ މަސައްކަތް ކުރަމުން ގެންދާތާ މިހާރު ވަރަށް ގިނަ އަހަރު ތަކެއް ވަނީ ވެފައެވެ.

ތިނަދޫ ސިޓީގެ އާ ދަނޑު ގެ އިރުމަތީ ފަރާތު މިހާރު އޮތް ގޮތް.

ތިނަދޫ ސިޓީ ކައުންސިލްގެ އިސް ވެރިޔަކު ހުވަދޫ އަށް މަޢުލޫމާތު ދެއްވި ގޮތުގައި ދަނޑު ގެ މަސައްކަތް ނުނިމި ހުރި ނަމަވެސް އެތަން ހުޅުވީ ކުޅެވޭ ވަރު ވީމައެވެ. އަދި ދަނޑުގައި ރަނގަޅު ކުރަން ޖެހޭ ބައެއް މަސައްކަތް އެބަހުރި ކަމަށާއި އޭގެ ތެރޭގައި ފެން ހިނދާ ނިޒާމު ވެސް ހިމެނޭ ކަމަށް ވެސް އޭނާ ވިދާޅުވިއެވެ. އޭގެ އިތުރުން ދަނޑު މިވަގުތު އޮތީ ޔޫތު މިނިސްޓްރީ ގެ ދަށުގައި ކަމަށާއި ރޭގަނޑު ދަނޑު ދިއްލުމުން ހިގާނެ ޚަރަދު ކައުންސިލުން ނުދެއްކި ދާނެ ތީ އަދި އެ ތަނާ ޙަވާލު ވެ އެ ޒިއްމާ ނަގަން ނިންމާފައިނުވާކަމަށެވެ. އަދި ޔޫތު މިނިސްޓްރީގެ ދަށުން ތިނަދޫ ގައި ހިނގާ ޒޯން ސުޓޭޑިއަމް އާއި އެ ދަނޑު ބެލެހެއްޓުމަށް އެއްވެސް މުއާމަލާތެއް ނުކުރާ ކަމުގައި އެ ތަނުގެ އޮފިޝަލަކު ވަނީ މަޢުލޫމާތު ދީފައެވެ. އެހެންކަމުން ތިނަދޫގެ ޒުވާނުން އެތައް ފަހަރަކު ސަރުކާރުގައި އާދޭސް ކޮށްގެން ހަދަމުންދާ އާ ފުޓްބޯޅަދަނޑު ވެސް ސިފަވަނީ ބެލެހެއްޓުމެއް ނެތި ފަނާވެ ދާނެ ތަނެއްގެ ގޮތުގައި ކަމަށް ގިނަ ޒުވާނުން ދަނީ ބުނުމުންނެވެ.