ފިކުރީގޮތުން ދިމާވާ އެއް ބްލަޑްގްރޫޕެއްގެ މީހުން އެބަތިބި ކަމަށާއި އެހެންނަމަވެސް ބްލަޑްގްރޫޕް އެއްގޮތްވުމަކީ ދެބެންނަށް ވާންޖެހޭ ސަބަބެއް ނޫންކަމަށް ރިޔާސީ އިންތިހާބުގައި އަމިއްލަ ގޮތުން ވާދަކުރެއްވި އުމަރުނަސީރު ވިދާޅުވެއްޖެއެވެ. ރިޔާސީ އިންތިހާބުގެ ދެވަނަ ބުރުގައި އުމަރުގެ "ނިއު ޑިރެކްޝަން" ޓީމުން ނިންމާ ނިންމުން ހާމަކުރުމަށް ކެމްޕޭން ސްޓޫޑިއޯ ގައި އޮތް ލައިވް އިވެންޓެއްގައި އުމަރު ވަނީ، ރިޔާސީ އިންތިހާބުގެ ދެވަނަ ބުރަށް ވާދަކުރައްވާ އެމްޑީޕީ އަދި ޕީޕީއެމް/ޕީއެންސީގެ ދެ ކެންޑިޑޭޓުންގެ ތެރެއިން އެއްވެސް ފަރާތަކަށް ވަކީން ތާއީދުނުކުރައްވާކަމަށް އިއުލާން ކުރައްވާފައެވެ. އަދި ރާއްޖެއަށް އޮތް އެންމެ ބޮޑު އެއް މައްސަލައަކީ ރާއްޖޭގައި އިންޑިއާ ސިފައިން ތިބުން ކަން ފާހަގަކުރައްވައި އުމަރު ވިދާޅުވީ ސަރުކާރަށް ވަދެ ހަނުހުރުމުގެ ބަދަލުގައި ސަރުކާރާ ނުގުޅި އެ މައްސަލާގައި އަޑުއުފުލަން އިދިކޮޅުގައި ހުންނެވުން ހިޔާރު ކުރައްވާކަމަށެވެ. އެއްވެސް ފަރާތަކަށް ވަކީން ތާއީދު ނުކުރެއްވިކަމުގައި ވިޔަސް އެބޭފުޅާއާ ފިކުރީގޮތުން ދިމާވާ ބައެއް ޕާޓީ އެބަހުރިކަމަށާއި، އެއް ބްލަޑްގްރޫޕެއްގެ މީހުން އެބަތިބި ކަމަށް ހާމަކުރައްވަމުން އުމަރު ވިދާޅުވީ، ބްލަޑް ގްރޫޕް އެއްގޮތް ވުމަކީ ދެބެންނަށް ވާން ޖެހޭ ސަބަބެއް ނޫންކަމުގައެވެ. އުމަރުގެ ވާހަކަ ފެށްޓެވީ ރިޔާސީ އިންތިހާބުގެ ފުރަތަމަ ބުރަށްފަހު ސަޕޯޓަރުންނާ ބައްދަލު ކޮށްލާ ފުރަތަމަ ރޭ ކަމުން މަސައްކަތް ކޮށްދެއްވި ވޯޓު ދެއްވި ހުރިހާ ފަރާތްތަކަށްޝުކުރު ދަންނަވަމުންނެވެ. އުމަރު ވިދާޅުވީ އޭނާގެ ސަޕޯޓަރުންނާއި ވޯޓަސް ތާއީދު ކުރައްވާ ފަރާތްތަކުން ކުރެއްވި މަސައްކަތްތައް ފާހަގަކުރައްވައި، ހާއްސަކޮށް ސޯޝާލްމީޑީޔާގައި ނުވެސް ދަންނަ ފަރާތްތަކުން ކޮށްދެއްވި އަމިއްލަ މަސައްކަތްތައް ފާހަގަކުރައްވައި، ޓިކްޓޮކް، ފޭސްބުކް ޕޯސްޓުތަކާއި ވީޑިޔޯތައް މެދުވެރިކޮށް ސަޕޯޓުދެއްވި ހުރިހާ ފަރާތްތަކަށްވެސް ހާއްސަ ޝުކުރެއް ދަންނަވާފައެވެ. އުމަރު ވިދާޅުވީ އެ މަސައްކަތްތަކުގެ އާހިރު ނަތީޖާއަކީ އާދަޔާހިލާފު ކާމިޔާބީ ކަމަށެވެ. ދިމާވާ މީހުން ދައްކާ ވާހަކަތަކުންނާއި އަންނަ މެސެޖުތަކުން މޮޅުވީހެންވެސް ހީވާކަމަށެވެ. މިކާމިޔާބީގެ ސަބަބުން، އެކުގައި މަސައްކަތް ކުރާ ބޭފުޅުން ގާތު "އިންތިހާބެއްގައި ބަލިވެފަ އެކަމަކު ކާމިޔާބުވިކަމުގެ އިހުސާސްވާބައެއް އަޅުގަނޑުމެން ނޫނީ ނުތިބޭނެ،" ކަމަށް ވިދާޅުވާ ކަމަށެވެ. މިފަހަރުގެ އިންތިހާބަކީ އާދަޔާހިލާފު އިންތިހާބެއްކަން ފާހަގަކުރައްވައި އުމަރު ވިދާޅުވީ މި އިންތިހާބުގައި އުމަރާއި އުމަރުގެ ޓީމުން ކުރި މަސައްކަތަށް ދިވެހި ރާއްޖޭގެ އެކި ހިސާބުތަކުން ދިން ތަރުހީބަށް ބަލާއިރު، އެތައް އެތައް ލައްކައަކުން ހަރަދުކުރި ފަރާތްތަކަށްވުރެ އުމަރަށް ލިބިވަޑައިގެންނެވި ވޯޓު ގިނަކަމާއި ރައްޔިތުންގެ ހިތްތަކުން ލިބުނު ޖާގައާއި ލޯބި ބޮޑުކަމަށެވެ. ބޮޑެތި ޖަގަހަތައް ހުޅުވައިގެން ކެރަމްކުޅެ، ލަވަޖަހައި ހެދިޔަކަސް އަދި ސިޔާސީ މަސައްކަތްތަކެއް ނުކުރެއްވޭނެކަމަށް ވެސް އުމަރު ވިދާޅުވިއެވެ. އެހެނެއްކަމަކު، ސިޔާސީ މެސެޖެއްހިފައިގެން އަޒުމާއި ހިތްވަރާއެކުގައި ބަޔަކު މަސައްކަތް ކޮށްފިއްޔާ އެކަމެއް ކާމިޔާބުވާނެކަމުގެ ފުރިހަމަ މިސާލެއް މިއިންތިހާބުން ފެނިގެން ދިޔަކަމަން ފާހަގަކުރައްވައި ވިދާޅުވީ އޭނާއަށް ލިބިވަޑައިގެންނެވި ކާމިޔާބީން އެކަން ހާމަވާކަމަށެވެ.
"މިފަހަރުގެ މި އިންތިހާބުގައި އާދަޔާހިލާފު، އަޅުގަނޑުމެން ހަރަދު ކުރީ ލައްކައެއްހާ ރުފިޔާ. ތައްޔާރުކުރީ ސަތޭކަވިހި ހުދު ބެނާ، އަޅުގަނޑުމެން ތައްޔާރުކުރީ 200 ޓީޝާޓް، ކަރުދާހުން ޕޯސްޓަރެއް ޕްރިންޓު ނުކުރަން، ކެންވާސް ތައްޔާރު ނުކުރަން، އެއްވެސް މަގެއްގައި ދިދަ ފައްޗެއް ނުދަމަން، އެކަމަކު އަޅުގަނޑުމެންނަށް ވުރެ ފަހަތަށްދިޔަ އެތައް މިލިއަނުން ހަރަދުކުރި ބަޔަކު، މީގެއިން ޔަގީންވި ކަމަކީ ޖަގަހަތަކާއެއްޗެއްސަކީ ބޭކާރު ޖަގަހަތައް ހަދާފައި ލަވަޖަހައި ކެރަމް ކުޅުނަސް ސިޔާސީ މަސައްކަތެއް ނުކުރެވޭނެކަން، އެކަމަކު ސިޔާސީ މެސެޖެއް ހިފައިގެން އަޒުމާ ހިތްވަރާއެކުގައި ބަޔަކު މަސައްކަތް ކޮށްފިއްޔާމު އެކަމުން ކާމިޔާބު ވާނެކަމުގެ ފުރިހަމަ މިސާލެއް މިފހަރު ފެނިގެން މިދިޔަައީ. ވަކިން ހާއްސަކޮށް ތެދުވެރިކަމާއި އަމާނާތްތެރިކަމާއި ފައިސާ ދޫކޮށްލާފައި އަމާނާތްތްތެރިކަމަށް ވޯޓުދޭ ތެދުވެރިން ސިޔާސީމައިދާނުގައި ތިބިކަން ސާބިތުވެގެން ދިޔައީ ވޯޓުދެއްވި މަސައްކަތްކޮށްދެއްވި ފަރާތްތަކަށް ފަށްފަށަށް ޝުކުރުދަންނަވަން،" އުމަރު ނަސީރު
ކޮންމެ ޕާޓީއެއްގެ ވެރިކަމެއް އަޔަސް އެބަޔަކު އަމިއްލައަށް ވެރިކަމެއް ކުރުމުގެ ފުރުސަތު ދޭންޖެހޭ ކަމަށް ގަބޫލުކުރައްވާ ކަމަށެވެ. އަދި އެހެންޕާޓީތަކުން ވެރިކަމަށް އަންނަ ޕާޓީ ތެރެއަށް ވަދެ އެމިނިސްޓަރީ، މި މިނިސްޓަރީ ހަދައިގެންވާނެ ކަމަށް ގަބޫލު ނުކުރައްވާކަމަށް އުމަރު ވަނީ ވިދާޅުވެފައެވެ. އުމަރު ވިދާޅުވި ގޮތުގައި މިފަހަރު ވެރިކަމަށް އަންނަ ބަޔަކަށް ޝަކުވާ ކުރާނެ ފުރުސަތެއް ނޯންނާނެއެވެ. މިވެނިކަމެއް ކޮށްނުދެވުނީ ކޯލިޝަންގެ އެވެނިބަޔަކު މިވެނި ގޮތަކަށް ތިބުމުން ކަމަށް ބުނެވިގެންނުވާނެކަމަށެވެ. އެހެންކަމުން ނިންމަވާފައި ވަނީ އެއްވެސް ކެންޑިޑޭޓަކާއެކު އެއްވެސް ޕާޓީއަކާއެކު ކޯލިޝަން ނުހެއްދެވުމަށް ކަމަށާއި ލިބިވަޑައިގެންނެވި ކާމިޔާބާއެކު، އެހިޔާލާއި އެފިކުރުގައި ދެން އަންނަ އިންތިހާބަކުން ރައްޔިތުންނާ ބައްދަލު ކުރައްވާނެކަމަށް އުމަރުވަނީ ވިދާޅުވެފައެވެ.
ޚިޔާލު (3)
ވާދަކުރެވުނު އަދަދަށް ބަލާއިރު އަދިމޮޅެތިވާހަކަ ދައްކަން ކާރިވެސް ނުވޭ. ޚުރީގަތިބި 2 މީހުންހޯދި ވޯޓަށްބަލާއިރު އެހާރަގަޅު ނަތީޖާއެއްވެސް ނުނެތެވޭ. މާގަދަބަސް ބުނެގެން ވޯޓ ނުވެސްލިބޭނެ. އޭގެ ހެކި ޤާސިމަށް އެލިބުނުވޯޓަކީ.
ފުރިފައި ހުރި އެއްޗެއް ގުޑުގުޑެއް ނާޅާނެ. އީމާންކަމުގެ އާރުން ދިރުން ލިބިފައިވާ ގަހެއް މަރުވާނެގޮތެއް ނޯންނާނެ.
ޢުމަރުގެ ސްޓޭންޑް ބަރާބަރު....28 ގައި ޢުމަރާއެކު މިތިބީ...ޢުމަރު އެއީ ފޮނި ކަނޑަނީ ކަމަށް ތިޔަ ބުނަނީ ޢުމަރު ދެކެ ރުޅި އަންނާތީ..ވަކި ކޮޅަކަށް ގޮސް ހުސްވެފައި ހުރީމާ..ގައުމާދޭތެރޭ ނުވިސްނާ ލިބޭ މަންފާއާހެދި މޮޔަވެފަ ހުރީމާ..އުމަރު ގަދަބަހެއް ނުބުނޭ.