ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު އެ މަގާމުން ވަކިކުރުމަށް މަޖިލީހަށް ހުށަހެޅުމަށް އެމްޑީޕީގެ ޕާލިމެންޓްރީ ގްރޫޕުން ފާސްކޮށްފި އެވެ.
ނަޝީދު މަގާމުން ވަކިކުރުމަށް މަޖިލިހަށް ހުށަހެޅުމަށް ފާސްކުރީ ރައްޔިތުންގެ މަޖިލީހުގެ އިދާރާގައި މިއަދު ކުރިއަށްދިޔަ އެމްޑީޕީގެ ޕީޖީ ބައްދަލުވުމުގައެވެ އެ ގޮތަށް ފާސްކުރީ، އެ ބައްދަލުވުމުގައި ބައިވެރިވެވަޑައިގެންނެވި ހުރިހާ މެންބަރުންގެ އިއްތިފާގުންނެވެ.
މިއީ، މި އަހަރުގެ ތެރޭގައި އެމްޑީޕީން ނަޝީދު މަގާމުން ވަކިކުރަން މައްސަލަ ހުށަހަޅާ ދެ ވަނަ ފަހަރެވެެ. އެމްޑީޕީން، އިއްޔެ ވަނީ ރައީސް ނަޝީދު އިތުބާރު ނެތްކަމަށް ހުށަހަޅަން ބޭނުންވާ ސޮއި ހޯދާފައެވެ. އެމްޑީޕީގެ އޮފިޝަލުން އިއްޔެ ވިދާޅުވީ ރައީސް ނަޝީދު މަގާމުން ދުރުކުރަން ބޭނުންވާ މިންވަރަށް ސޮއި ލިބިފަވާ ކަމަށެވެ.
ރައީސް ނަޝީދު މަގާމުން ދުރުކުރުމަށް މަޖިލީހަށް ހުށަހަޅަން ޖެހެނީ މަދުވެގެން 22 ސޮޔާއެކުގައި ކަމަށްވީއިރު އިއްޔެ އެމްޑީޕީން ވަނީ (22އަށްވުރެ މާގިނައިން) 30 އަށްވުރެ ގިނަ ސޮއި ހަމަކޮށްފައެވެ.
ނަޝީދު މަގާމުން ވަކިކުރާތީ، ޑިމޮކްރެޓުން ވަނީ 'ވައްކަން'ތައް ބެލުމަށް ގޮވާލާފައެވެ. އެމްޑީޕީގެ މެންބަރުން މިހާރު ގަބޫލު ކުރައްވަނީ، އެ ޕާޓީ އަކީ މަޖިލީހުގެ މެޖޯރިޓީ ޕާޓީއަށް ވުމުން، ރިޔާސަތުގައި ވެސް އިންނަވަން ޖެހޭނީ އެމްޑީޕީގެ މެންބަރެއް ކަމަށެވެ. އަދި ނަޝީދު މަޖިލީސް ހިންގަވަމުން ގެންދަވާ ގޮތާ މެދު ވެސް އެ މެންބަރުންގެ ނުރުހުން އެބަ އޮތެވެ.
މަޖިލީހުގެ ރައީސްގެ އިތުބާރު ނެތް ކަމުގެ މައްސަލަ ހުށަހަޅޭނީ، މަޖިލީހުގެ ޖުމްލަ މެންބަރުންގެ ހަތަރު ބައިކުޅަ އެއް ބައި ނުވަތަ 22 މެންބަރުންނަށް ވުރެ މަދު ނޫން އަދަދެއްގެ މެންބަރުންގެ ސޮޔާ އެކު އެވެ. އަދި މަގާމުން ވަކިކުރެވޭނީ، މަގާމުން ވަކިކުރުމުގެ ގަރާރެއް މަޖިލީސް ޖަލްސާއަށް ހާޒިރުވެ، ވޯޓްގައި ބައިވެރިވި މެންބަރުންގެ އަގުލަބިއްޔަތުން ފާސްކޮށްގެންނެވެ.
ޚިޔާލު
އެންމެ ފުރަތަމަ ޚިޔާލު ދެއްވާ.