ނޮވެމްބަރު 17ގެ ކުރިން 4000 ފްލެޓު ލިބޭ މީހުންނާއެކު ކޮންޓްރެކްޓްގައި ސޮއިކުރާނެ

މިހާރުގެ ރައީސް އިބްރާހީމް މުހައްމަދު ސާލިހުގެ ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން، ހުޅުމާލޭގައި އިމާރާތްކުރަމުންދާ 4000 ފްލެޓު ލިބޭ މީހުންނާއެކު މިވެރިކަން ނިމުމުގެ ކުރިން ސޮއިކުރާނެކަމަށް ޕްލޭނިން މިނިސްޓްރީން ބުނެފިއެވެ.

ހުޅުމާލޭގައި އިމާރާތްކުރާ ހަތަރު ހާސް ފްލެޓު ލިބޭ މީހުންގެ ދާއިމީ ލިސްޓު މިހާރު އާންމުކޮށްފައިވި ނަމަވެސް ފްލެޓު ލިބޭ މީހުންގެ ލިސްޓު އަދި ތަރުތީބުކޮށްފައެއް ނުވެއެވެ.

މިހާރު ނިމެމުންދާ 4000 ޔުނިޓް ލިބޭ މީހުންގެ ލިސްޓް ވަރަށް އަވަހަށް ޔަގީންވާނެކަމަށް ޕްލޭނިން މިނިސްޓްރީން ވަނީ ބުނެފައެވެ. އެގޮތުން އަންނަ މަހުގެ 17 ގެ ކުރިން އެ ލިސްޓް ނެރެ، 4000 ޔުނިޓްގެ މަޝްރޫޢުއިން ފްލެޓް ލިބޭ މީހުންނާއެކު ކޮންޓްރެކްޓްގައި ސޮއިކޮށްވެސް ނިންމާނެކަމަށް ވެސް ޕްލޭނިން މިނިސްޓްރީން ވަނީ ބުނެފައެވެ.

ގެދޮރުވެރިޔާ ސްކީމްގެ ދަށުން ފްލެޓަށް ކުރިމަތިލާން ހުޅުވައިލުމުން 20،000 އަށް ވުރެ ގިނަ މީހުން ފޯމު ހުށަހެޅިއެވެ. ސަރުކާރުން އިއުލާން ކޮށްފައިވާ ގޮތުގައި ޝަރުތު ހަމަވާ އެންމެންނަށް ފްލެޓް ދޭނެއެވެ

ހުޅުމާލޭގައި 8،000 ފްލެޓުގެ މަސައްކަތް ކުރަމުން އަންނަ ކަމަަށް ފަހި ދިރިއުޅުން ކޯޕަރޭޝަނުން ބުނެއެވެ. އޭގެ އިތުރުން 4،000 ފްލެޓް އަޅަން އިންޑިއާގެ ކަލްޕަޓަރު ޕްރޮޖެކްޓްސް އިންޓަނޭޝަނަލް ލިމިޓެޑް ނަމަކަށް ކިޔާ ކުންފުންޏަކާ 2.5 ބިލިއަން ރުފިޔާއަށް ވަނީ ހަވާލުކޮށްފައެވެ.

ފަހި ދިރިއުޅުން ކޯޕަރޭޝަނުން ބުނި ގޮތުގައި މިހާތަނަށް ގިނަ ޓަވަރުތަކެއްގެ މަަސައްކަތް ވަނީ ނިމުމުގެ މަރުހަލާގަ އެވެ. ސަރުކާރުން ބުނެފައި ވަނީ މި ދައުރު ނިމުމުގެ ކުރިން ފްލެޓްތަކުގައި މީހުން ދިރިއުޅެން ފަށާނެ ކަމަށެވެ.