ޝަކުވާތައް ހުށަހަޅާފައި އެބަހުރި، އެކަމަކު ގޮތެއް ނިންމޭނީ އަންނަ ހަފްތާތެރޭގައި: އީސީގެ ރައީސް ފުއާދު

ރައްޔިތުންގެ މަޖިލީހުގެ އިންތިހާބީ ދާއިރާތައް ކަނޑައަޅާފައިވާ ގޮތާ ބެހޭގޮތުން 65 ޝަކުވާއެއް ލިބިފައިވާ ކަމަށާއި ނަމަވެސް ގޮތެއް ނިންމޭނީ އަންނަ ހަފްތާ ތެރޭގައި ކަމަށް އިލެކްޝަންސް ކޮމިޝަންގެ ރައީސް ފުއާދު ތައުފީގު ވިދާޅުވެއްޖެއެވެ.

އަންނަ އަހަރު ބާއްވާ މަޖިލިސް އިންތިހާބުގައި އިންތިހާބުކުރާ މެމްބަރުންގެ އަދަދު 93 އަށް އިތުރުކުރަން އިލެކްޝަންސް ކޮމިޝަނުން ކުރިން އޮތީ ނިންމައިފަ އެވެ. މިހާރު ތިއްބަވާ 87 މެމްބަރުންގެ ބަދަލުގައި 93 މެމްބަރުން އިތުރުކުރަން ނިންމީ އާބާދީ އަށް ބެލުމަށް ފަހު ބައެއް ދާއިރާތައް އިތުރުކުރަން ނިންމުމުންނެވެ.

އިލެކްޝަންސް ކޮމިޝަނުގެ ރައީސް ފުއާދު ތައުފީގު "ހުވަދޫ" ނޫހަށް މައުލޫމާތު ދެއްވަމުން ވިދާޅުވީ އެ ކޮމިޝަނުން ދާއިރާތައް ކަނޑައެޅި ގޮތާ ބެހޭގޮތުން ޝަކުވާ ހުށަހަޅަން ހުޅުވައިލުމުން 65 ޝަކުވާއެއް ލިބުނުއިރު އޭގެ ތެރެއިން އެންމެ ގިނައީ އަލަށް އުފައްދަން ނިންމާފައިވާ އައްޑޫ ފޭދޫ އުތުރު ދާއިރާގެ ޝަކުވާތައް ކަމަށެވެ. އެ ދާއިރާއާ ބެހޭގޮތުން ވަނީ 44 ޝަކުވާއެއް ހުށަހަޅާފައެވެ.

މާލޭގެ ދެ ދާއިރާއަކާއި އައްޑޫގެ ބައެއް ދާއިރާތަކުގެ އިތުރުން އަތޮޅު ތެރޭގެ ބައެއް ދާއިރާތަކާ ބެހޭގޮތުން ވެސް ޝަކުވާ ހުށަހަޅާފައިވާކަން ފާހަގަ ކުރައްވަމުން އީސީގެ ރައީސް ފުއާދު ތައުފީގު ވިދާޅުވީ އެ ޝަކުވާތަކާ މެދު އަންނަ މަހުގެ ފަސް ވަނަ ދުވަހުގެ ކުރިން އެ ކޮމިޝަނުން ގޮތެއް ނިންމާނެ ކަމަށެވެ.

ރައްޔިތުންގެ މަޖިލީހުގެ އިންތިހާބީ ދާއިރާތަކުގެ ގާނޫނު ބުނާގޮތުން އިންތިހާބީ ދާއިރާތައް ކަނޑައަޅާނީ އާބާދީ އަށް ބެލުމަށް ފަހު އެވެ. އެހެންވެ، ކޮންމެ މަޖިލިސް އިންތިހާބެއްގައި ދާއިރާތަކުގެ އަދަދު ދަނީ އިތުރުވަމުންނެވެ.