އިމާރާތްކުރުމުގެ ސިނާއަތް ކުރިއެރުވުމަށް، އެ ދާއިރާއަށް ހާއްސަ ވުޒާރާއެއް އުފައްދަވާނެ ކަމަށް އިންތިހާބީ ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ޑރ. މުއިއްޒު މިހެން ވިދާޅުވީ މޯލްޑިވްސް ނޭޝަނަލް އެސޯސިއޭޝަން އޮފް ކޮންސްޓްރަކްޝަން އިންޑަސްޓްރީ (މަސީ) އިން ރޭ ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.
އެމަނިކުފާނުގެ ވާހަކައިގައި އިމާރާތްކުރުމުގެ ސިނާއަތަކީ ރައްޖޭގައި ދެވަނައަށް އެންމެ ބޮޑު ސިނާއަތް ކަން ފާހަގަކުރައްވައި ވިދާޅުވީ މި ސިނާއަތް ކުރިއެރުވުމަށް ސަރުކާރުތަކުން އެއްބާރުލުން ލިބުނު ނަމަވެސް، އަދިވެސް ސިނާއަތް ކުރިއެރުވުމަށް ކުރެވޭނެ އިތުރު އެހެން ގިނަ ކަންކަން އެބަ ހުރިކަމަށެވެ.
ރާއްޖޭގައި ބޮޑެތި ސިނާއަތްތަކަށް ވަކި ވުޒާރާތައް ހުންނަކަން ފާހަގަ ކުރައްވާ މުއިއްޒު ވިދާޅުވީ، ޓުއަރިޒަމަށް ވަކި ވުޒާރާއެއް، މަސްވެރިކަމަށް ވަކި ވުޒާރާއެއް އޮންނަ އިރު، ދަނޑުވެރިކަމަށް ވެސް ވަކި ވުޒާރާއެއް ބިނާ ކުރައްވާނެކަން އެ މަނިކުފާނު ހާމަކުރައްވާފައިވާ ކަމަށެވެ. ނަމަވެސް ކޮންސްޓަރަކްޝަން އިންޑަސްޓްރީ އޮންނަނީ އަބަދު ވެސް ކޮންމެ ވެސް ވުޒާތާއެއް ތެރެއަށް ލެވި ފޮރުވިފައި ކަމަށް މުއިއްޒު ވިދާޅުވިއެވެ.
"އެހެން ނަމަވެސް ބޭރަށް ނެރި، ކޮންސްޓްރަކްޝަން އިންޑަސްޓްރީ ވެސް ނަމުގައި ޝާމިލް ވާގޮތަށް އިރާދަކުރެއްވިއްޔާ ވުޒާރާއެއް ގާއިމް ކުރާނަން،" ޑރ. މުއިއްޒު ވިދާޅުވިއެވެ.
އެ މަނިކުފާނު ވިދާޅުވީ، މިކަމުގެ ސަބަބުން އެ ސިނާއަތުގެ ކަންކަމަށް ވަކިން ބޮޑު އިސްކަމެއް ދެވޭނެ ކަމަށެވެ. އަދި، ވަކި ވުޒާރާއެއް ބިނާކުރުމުން، ބޭރުގެ އެހެން ގައުމުތަކުން ހޯދަންޖެހޭ އެހީތައް ހޯދުމުގައި ވެސް ވަރަށް ބޮޑު ތަފާތެއް ފެންނާނެ ކަމަށް އެ މަނިކުފާނު ވިދާޅުވިއެވެ.
ޑރ މުއިއްޒު ވަނީ ކޮންސްޓްރެކްޝަން ދާއިރާ އިތުރަށް ފުޅާކޮށް ކުރިއެރުމަށް ގިނަ މަސައްކަތް ތަކެއް ކޮށްދެއްވާނެ ކަމުގެ ޔަގީންކަން އެދާއިރާގެ ބޭފުޅުންނަށް ދެއްވާފައެވެ.
ޚިޔާލު
އެންމެ ފުރަތަމަ ޚިޔާލު ދެއްވާ.