އެގާރައަހަރުގެ ޖަލުހުކުމް ގޭގެބަންދަށް ބަދަލުކުރުމަށްފަހު، ގޭގެ ބަންދުން ވަކިގޮތްތަކެއްގެ މަތިން ޝަރުތުތަކެއް ކަނޑައަޅައި، ކުރީގެ ރައީސް އަބްދުﷲ ޔާމީން ގެއިން ބޭރަށް ނުކުންނެވުމުގެ ހުއްދަ ދިނީ ބޭސްފަރުވާގެ ކަންކަމަށް އެކަނި ކަމަށާއި އެމަނިކުފާނުގެ ހަރަކާތްތައް މޮނިޓާ ކުރާނެ ކަމަށް މޯލްޑިވްސް ކަރެކްޝަނަލް ސާވިސް އިން ބުނެފިއެވެ.
މާފުށީ ޖަލުގައި ހުކުމް ތަންފީޒުކުރައްވަމުން ގެންދަވަނިކޮށް ޔާމން ގެއަށް ބަދަލު ކުރީ މި މަހުގެ ކުރީކޮޅެވެ. އޭގެ ފަހުން، ކަރެކްޝަންސް އިން މިދިޔަ ހޮނިހިރު ދުވަހު ވަނީ ޔާމީނުގެ ބަންދަށް އަނެއްކާ ވެސް ލުޔެއް ދީ، އެ އިދާރާއަށް އެންގުމަށްފަހު މެޑިކަލް ކަންކަމުގައި ގެއިން ބޭރަށް ވަޑައިގަތުމުގެ ހުއްދަ ދީފައެވެ. ނަމަވެސް، އެ ލުއި ދިނުމާއެކު ޔާމީން ވަނީ ޕީޕީއެމްގެ އޮފީހަށް ރޭ ވަޑައިގެން ޕާޓީގެ މެމްބަރުންނާ ބައްދަލުކުރައްވައިފައެވެ.
ކަރެކްޝަންސްގެ މީޑިއާ އޮފިޝަލަކު ވިދާޅުވީ މެޑިކަލް ކަންކަމުގައި ޔާމީނަށް ގެއިން ބޭރަށް ނުކުމެވަޑައިގަނެވޭނީ ވެސް އެ އިދާރާއަށް އެންގުމަށްފަހު ކަމަށެވެ. އަދި ޔާމީން ގެއަށް ބަދަލު ކުރީ އިގުރާރެއްގައި ސޮއި ކުރުމަށް ފަހުގައި ކަމަށާއި އެއާ ހިލާފު ވާނަމަ، ފިޔަވަޅު އަޅާނެ ކަމަށް އޭނާ ވިދާޅުވިއެވެ.
ޚިޔާލު
އެންމެ ފުރަތަމަ ޚިޔާލު ދެއްވާ.