މިދިޔަ ސަރުކާރުގައި ހިންގި ބިންވެރިޔާއާއި، ގެދޮރުވެރިޔާ ސްކީމްގެ ދަށުން ގޯތި އަދި ފްލެޓު ލިބޭނެކަމަށް ލިސްޓުގައި އޮތް އެންމެނަށް އެތަންތަން ލިބޭނެކަމުގެ ޔަޤީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވައިފިއެވެ. މިދިޔަ ސަރުކާރުގައި މާލެ ރައްޔިތުންނަށް ޚާއްސަކޮށް ގޯތި ދޫކުރުމަށް ހިންގި މަޝްރޫޢުގެ ފުރަތަމަ ފިޔަވަހީގައި، 9001 ގޯތި ދޫކޮށްފައިވެއެވެ. އަދި ހުޅުމާލޭގައި ޢިމާރާތްކުރަމުންދާ 4000 ފްލެޓު ލިބޭނެ މީހުންގެ ލިސްޓެއްވެސް ޢާންމުކުރިއެވެ. އެ ލިސްޓުގައި 13 ހާހަށްވުރެ ގިނަ މީހުން ޝަރުތު ހަމަވާކަމަށް ކަނޑައަޅައި، އޭގެ ތެރެއިން 4000 ފްލެޓު ލިބޭނެ މީހުންނަށް ފްލެޓުގެ ލިޔުންވެސް އޮތީ ހަވާލުކޮށްފައެވެ. ނަމަވެސް އެކަމުގައި ޤާނޫނީ ގޮތުން ސުވާލު އުފެދޭ ކަންކަން ހުރިކަމަށް ގެދޮރުވެރިކަމާ ބެހޭ ވަޒީރު ވަނީ ވިދާޅުވިއެވެ. ރައީސުލްޖުމްހޫރިއްޔާގެ އޮފީހުގައި ނޫސްވެރިންނާއި ބައްދަލުކުރައްވާ ވާހަކަފުޅު ދައްކަވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، އެއްވެސް މީހެއްގެ އަތުން ގޯއްޗާއި ފްލެޓު އަތުނުލާނެކަމަށެވެ. އެގޮތުން ފްލެޓު ނުވަތަ ގޯތި ލިބުނުކަމުގެ ރަސްމީ ލިޔުން ލިބިފައި ނެތްނަމަވެސް، ގެޒެޓުކުރި ލިސްޓުގައި ނަން އޮވެއްޖެނަމަ އެމީހަކަށް އެތަނެއް ލިބޭނެކަމުގެ ޔަޤީންކަން ރައީސް ދެއްވިއެވެ.
"އަޅުގަނޑު ދެންނެވިން އެއްވެސް މީހަކަށް ފްލެޓެއް ގޯއްޗެއް ލިބުނު ތަނަކުން އެ ލިބު ގޮއްޗެއް ނޫނީ ފްލެޓެއް އެމީހެއްގެ އަތުން އަތުނުލާނަމޭ. ރަސްމީކޮށް ގެޒޓު ކުރެވިފައި އޮވެއްޖެއްޔާ އެއޮތީ އެމީހާއަށް ލިބިފަ. އަދި ލިޔުން ނުލިބިވެސް ހުރދާނެ ބައެއް ފަރާތްތަކަށް. ރަޖިސްޓްރި ނުހެދިވެސް އޮވެދާނެ. އެއީ އަދި އެހެންކަމެއް. އެހެންވީމަ ފައިނަލް ލިސްޓެއް ގެޒެޓު ކުރެވިފަ އޮވެއްޖެއްޔާ އެއޮތީ ސަރުކާރުގެ ނިންމެވުމެއް. ސަރުކާރުގެ ނިންމެވުމެއް އޮވެއްޖެއްޔާ ލިބޭނެ. އެއަކަށް ބަދަލެއް ނާންނާނެ." ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ
ރައީސް ވަނީ ކުރީ ސަރުކާރުން ގޯތީގެ ރަޖިސްޓްރީ ހަދައިދޭ ޤަވާއިދަށް ގެންނެވި ބަދަލާގުޅޭގޮތުންވެސް ވާހަކަފުޅު ދައްކަވާފައެވެ.
ޚިޔާލު
އެންމެ ފުރަތަމަ ޚިޔާލު ދެއްވާ.