މިނިސްޓަރީ އޮފް ޔޫތު އެމްޕަވަމެންޓް އިންފޮމޭޝަން އެންޑް އާޓްސް އަކީ މުޅިން އައުމިނިސްޓާރީއެއްކަމަށާއި ދެ މިނިސްޓްރީ ބަދަލުކުރުމުގައި މުދާތަކެއް ގެއްލުނުކަމުގެ ތުހުމަތުތަކެއް ކުރަމުންދާތީ އެއީ އެއްވެސް ހަގީގަތެއް ނެތް ދޮގު ވާހަކަތަކެއްކަމަށް މިނިސްޓަރ އޮފް ޔޫތު އެމްޕަވަމެންޓް އިންފޮމޭޝަން އެންޑް އާޓްސް އިބްރާޙީމް ވަހީދު (އަސްވާޑު) ވިދާޅުވެއްޖެއެވެ.
މިއަދު ކުރިއަށް ގެންދިޔަ ނޫސްވެރިންގެ ބައްދަލުވުމުގައި ނޫސްވެރިއަކު ކުރެއްވި ސުވާލެއްގެ ޖަވާބު ދެއްވަމުން މިނިސްޓާރ އިބްރާހީމް ވަހީދު ވިދާޅުވީ ޔޫތު މިނިސްޓަރިއަކީ އެހެން މިނިސްޓަރީއެއް ބައިކޮށްފައި އޮތް ތަނެކޭ ބުނާކަމަށްވާނަމަ ތިން މިނިސްޓަރީއެއް ބައިކުރި މިނިސްޓަރީއެކޭ ބުނެވޭނެ ކަމަށެވެ. ސަބަބަކީ ޔޫތު އެމްޕަވަމެންޓް ބަޔަކީ ސްޕޯޓްސް މިނިސްޓްރީގައި އޮތް ޖަމިއްޔާ ރަޖިސްޓަރީކުރުމުގައި ބައިކަމަށާއި އިންފޮމޭޝަން ބަޔަކީ ހޯމްމިނިސްޓަރީގައި އޮޮތް ނޫސްމަޖައްލާ ރަޖިސްޓްރީކުރުމުގެ ބައިކަމަށާއި އަދި އާޓްސް އަކީ ކުރީގެ ހެރިޓޭޖްގައި އޮތް އާޓްސްގެ ދަށުން ހިންގާފައިވާ ބައިތައް ކަމަށާއި އެހެންކަމުން ޔޫތުމިނިސްޓަރީއަކީ މި ތިން މިނިސްޓަރީއިންް ބައިތައް ހިމެނިގެން އެކުލަވާލާފައިވާ މުޅިން އައު މިނިސްޓަރީއެއްކަމަށެވެ.
އަދި މި މިނިސްޓްރީތަކުން ޔޫތު އުފެއްދުމަށް ދޫކުރި ސެކްޝަންތަކުގެ ސްޓާފުންނާއި މުދާތައް ޔޫތުމިނިސްޓަރީގެ އެ ސެކްޝަނަކަށް ލިބުނު ކަމަށެވެ. ދިވެހި ސިވިސްސާވަންޓުންނަކީ އަބުުރުވެރި ބައެއްކަމަށާއި އަދި ކޮންމެ ވެރިކަމެއްގައިވެސް އެއްތަނުން އަނެއްތަނަށް ބަދަލުކުރިއަސް، އެބޭފުޅުންގެ ހިދުމަތް ގައުމަށް އަބަދުވެސް ލިބި ލިބި ތިބޭ ބައެއްކަމަށާއި އެހެންކމުން މި މައްސަލައަކީ އެމަނިކުފާނު ގަބޫލުފުޅު ކުރައްވާ ގޮތުގައި ކަމާބެހޭ މުއައްސަސާތަކުން އިތުރަށް ބައްލަވައި އޮޅުން ފިލުވަން ޖެހޭ މައްސަލައެއްކަމަށް މިނިސްޓަ އިބްރާހިމް ވަހީދު ވިދާޅުވިއެވެ.
ޚިޔާލު
އެންމެ ފުރަތަމަ ޚިޔާލު ދެއްވާ.