ގއ ގެމަނަފުށީ ޒުވާނުން އެރަށް އިސްތިހާރުކުރުމަށް އަނެެއްކާވެސް ތަފާތު ކަމެއް ކޮށްފިއެވެ.
ގެމަނަފުށްޓަކީ އަބަދުވެސް ރަށުގެ ރީތިކަން ދައްކާލަން ކުޅަދާނަ ޒުވާނުން ތިބި ރަށެކެވެ. ތަފާތު ގޮތަކަށް ރަށް އިސްތިހާރު ކުރުމަކީ އެރަށުގެ ޒުވާނުންނަށް ލިބޭ އުފަލެކެވެ. އެގޮތުން މިފަހަރު އަނެއްކާވެސް މިކޮށްލީ ތަފާތު ކަމެކެވެ. ގެމަނަފުށި މިފަހަރު އަޅާލީ އިގިރޭސިބަހުން ކަނޑު އަޑީގައެވެ.
ސްނޯރކްލިން އަށް ލޯބި ކުރާ ފަރާތްތަކަށް ޔަގީނުންވެސް މިއީ ތަފާތު އަދި ހިތްގައިމު މަންޒަރަކަށް ވެގެންދާނެއެވެ. "ކޮރަލް ގާޑަން" ގެ ނަމުން ނަންދީފައިވާ މި ހިތްގައިމު މަންޒަރަކީ ގެމަނަފުށީ ސަންރައިސް ބީޗް ރީފް އާދިމާލުން މޫދުގަ އެރަށުގެ ނަން އެޅުމަށްފަހު ހަދާލާފައިވާ ޑައިވިންގ ޕޮއިންޓެކެވެ.
ގެމަނަފުށްޓަކީ ލޯކަލް ޓުއަރިޒަމަށް އެރަށް އިސްތިހާރު ކުރުމުގައި ވަރަށް ބޮޑަށް އިސްކަންދޭ ޒުވާނުންތަކެއް ދިރިއުޅޭ ރަށެކެވެ. އެގޮތުން މީގެ ކުރިންވެސް އެރަށުގެ ޒުވާނުންވަނީ އެރަށުގެ އެކި ސަރަހައްދު ތަކުގައި ހިތްގައިމު މާހައުލުތައް ހަދާފައެވެ. މޫދަށް އެރިލާ އާއިލާއާ އެކީ ވަގުތު ހޭދަކޮށްލަން އެންމެ އެކަށޭނެ ގޮތަކަށް އެތަންތަން ތަރައްގީ ކޮށްފައެވެ. ގިނަ ބައެއްގެ އެހީއާއި އެރަށުގެ ޒުވާނުންގެ ހިތްވަރުންނެވެ.
މިހާރު އެރަށުގެ ޒުވާނުންގެ މިސްރާބު މިހުރީ މުޅިންވެސް ކަނޑުއަޑީގެ މަންޒަރުތަކަށެވެ. އެގޮތުން ދާދިފަހުން އެރަށު ޒުވާނުންތަކެއް ވަނީ އެރަށުގެ މޫދުއަޑީގައި އުދޯއްޔެއްވެސް ހަރުކޮށްފައެވެ. ޒުވާނުންގެ އެއްބާރުލުމާއި ބުރަ މަސައްކަތުން ކަމެއް ކޮށްފިއްޔާ ކޮންމެ ކަމަކީވެސް ކާމިޔާބު ވާނެ ކަމެއްކަން ގެމަނަފުށީ ޒުވާނުން ސާބިތުކޮށްދީފިއެވެ.
ޚިޔާލު
އެންމެ ފުރަތަމަ ޚިޔާލު ދެއްވާ.