ކުރިއަށް އޮތް 20 ވަނަ ރައްޔިތުންގެ މަޖިލީހުގެ އިންތިޚާބުގައި މެދުހެންވޭރު ދާއިރާއަށް އަމިއްލަގޮތުން ވާދަކުރައްވާ ހަސަން ޝިޔާމްގެ ކެންޑިޑެސީ ބާތިލުކުރަން ސުޕްރީމް ކޯޓުން މިއަދު ހުކުމްކޮށްފިއެވެ.
ހަސަން ޝިޔާމް ކުރިޔަށް އޮތް މަޖިލިސް އިންތިޚާބުގައި ވާދަކުރުމަށް ޝަރުތު ފުރިހަމަ ނުވާކަމަށް ހުކުމް ކޮށްފައިވަނީ، ސުޕްރީމް ކޯޓުގައި އެ މައްސަލަ ބެއްލެވި ތިން ފަނޑިޔާރުންގެ އިއްތިފާގުންނެވެ. މި ހުކުމުގައި ވަނީ މަޖިލީސް އިންތިޚާބުގައި ވާދަކުރުމުގެ ޝަރުތު ހަސަންގެ ކިބައިގައި ފުރިހަމަނުވާ ކަމަށް ކަނޑައަޅައި، އޭނާގެ ކެންޑިޑެސީ ބާތިލުކޮށްފައެވެ.
މި މައްސަލަ ބެއްލެވީ ފަނޑިޔާރު ޑރ. މުހައްމަދު އިބްރާހީމްއާއި ފަނޑިޔާރު ހުސްނުއްސުއޫދު، އަދި ފަނޑިޔާރު އައިޝާ ޝުޖޫންއެވެ. ރިޔާސާތުގައި އިންނެވީ ފަނޑިޔާރު ޑރ. މުހައްމަދު އިބްރާހީމްއެވެ.
ޝިޔާމްގެ ކެންޑިޑެސީ ބާތިލުކުރަން ހުށަހެޅީ މެދުހެންވޭރު ދާއިރާއަށް ވާދަކުރައްވާ އެ ދާއިރާގެ މިހާރުގެ ވެސް މެންބަރު އަލީ އާޒިމްގެ ކޮއްކޮއެއް ހ. ކްއީން، އިލްޔާސް އަހުމަދެވެ.
އޭނާ ހުށަހެޅުއްވި މައްސަލާގައި ބުނެފައިވަނީ ހަސަންގެ މައްޗަށް ސާބިތު ދަރަންޏެއް ސާބިތުވާ ކަމަށެވެ. އަދި އޭނާ އެދިފައިވަނީ، ހަސަންގެ ކެންޑިޑެސީ ބާތިލުކޮށް ދިނުމަށެވެ.
ހަސަން މެދުހެންވޭރު ދާއިރާއަށް އެންމެ ފުރަތަމަ ކެމްޕޭން ކުރަންފަށާފައިވަނީ ޕީޕީއެމް/ޕީއެންސީގެ ޓިކެޓް ކަށަވަރު ކުރުމަށެވެ. އެހެންނަމަވެސް އޭނާ ހިމެނިގެންދިޔައީ ޕީއެންސީންގެ ޓިކެޓަށް ޝަރުތު ފުރިހަމަ ނުވާކަމަށް އެޕާޓީން ސިޓީ ފޮނުވި ކެނޑިޑޭޓުންގެ ތެރޭގައެވެ. އެހެންނަމަވެސް ފަހުން ހުރިހާ ފަރާތްކަށް ޕީއެންސީގެ ޕްރައިމަރީގައި ވާދަކުރެވޭ ގޮތަށް ހަމަޖެއްސި ނަމަވެސް އޭނާ އިންތިޚާބުގައި ވާދަކުރެއްވުމަށް ނިންމީ މިނިވަން ކެނޑިޑޭޓެއްގެ ގޮތުގައެވެ.
ޚިޔާލު
އެންމެ ފުރަތަމަ ޚިޔާލު ދެއްވާ.