ސަމާލުވޭ! ސީއެމްޑީއޭގެ ނިޝާނާއި ނަން ބޭނުންކޮށްގެން އާންމުންނަށް އޮޅުވާލުމުގެ ޢަމަލުތަކެއް ހިންގަނީ!

ކެޕިޓަލް މާކެޓް ޑިވެލޮޕްމަންޓް އޮތޯރިޓީ (ސީއެމްޑީއޭ) ގެ ނަމާއި، ނިޝާން ބޭނުންކޮށްގެން އާންމުންނަށް އޮޅުވާލުމުގެ ޢަމަލުތަކެއް ހިންގަމުންދާކަން ފާހަގަކުރެވިފައިވާތީ އެކަމަށް ސަމާލުވުމަށް އެ އޮތޯރިޓީން އިލްތިމާސްކުރައްވައިފިއެވެ.

އެއޮތޯރިޓީން ވިދާޅުވީ ސީއެމްޑީއޭގެ ނަމުގައި ހިންގާ އޮންލައިން ޕޭޖެއްގައި އޮތޯރިޓީގެ ނަމާއި ނިޝާން އަދި އޮތޯރިޓީން ހުއްދަދީފައިވާ ކުންފުނިތަކުގެ ބްރޭންޑިންގ ބޭނުންކޮށްފައިވީނަމަވެސް، އެއީ އެއޮތޯރިޓީއާ އެއްވެސް ގުޅުމެއް އޮތް ޕޭޖެއް ނޫންކަމަށެވެ. އަދި އެ ޕޭޖުން އިންވެސްޓަރުންނާއި ޢާންމު ރައްޔިތުންނަށް އޮޅުވާލުމުގެ ޢަމަލުތަކެއް ހިންގަމުންދާކަން ފާހަގަވެފައިވާކަމަށްވެސް ސީއެމްޑީއޭއިން ވިދާޅުވެއެވެ.

ސީއެމްޑީއޭއިން އިތުރަށް ވިދާޅުވީ، އެ ޕޭޖާ ގުޅުންހުރި އެއްވެސް ފަރާތަކަށް ނުވަތަ ޖަމާޢަތަކަށް، ސީއެމްޑީއޭގެ ފަރާތުން ވާހަކަދެއްކުމަށް، މުޢާމަލާތްކުރުމަށް ނުވަތަ އެއްވެސް ވިޔަފާރިއެއް ހިންގުމުގެ ހުއްދަ ދީފައިނުވާނެ ކަމަށެވެ. ފޭސްބުކްގައި ބަޔަކު ސީއެމްޑީއޭއިން ހުއްދަ ދީފައިވާ ކުންފުނިތަކުގެ ބްރޭންޑިން ބޭނުންކޮށްގެން ގަސްތުގައި އާންމުނަށް އޮޅުވާލަމުންދާތީ، އެކަމަށް އިންވެސްޓަރުންނާއި އާންމުން ސަމާލުވުމަށް ވަނީ އެދިފައެވެ.

އެހެންކަމުން، އެ ޕޭޖާ އެއްވެސް މުޢާމަލާތެއް ނުކުރުމަށާއި، އަމިއްލަ އެއްވެސް މަޢުލޫމާތެއް ހިއްސާނުކުރުމަށް ސީއެމްޑީއޭއިން ވަނީ އިލްތިމާސްކުރައްވާފައެވެ. މީގެއިތުރުން އެޕޭޖުގައި ހާމަކޮށްފައިވާ މަޢުލޫމާތުގެ މައްޗަށް ބިނާކޮށް އެއްވެސް ޢަމަލެއް ނުކުރުމަށްވެސް ވަނީ އިރުޝާދުދެއްވާފައެވެ.

މިފަދަ ޢަމަލުތައް ހިންގާ ފަރާތްތައް ހުއްޓުވުމުގެ މަސައްކަތް ކުރަމުންދާކަން ހާމަކުރައްވައި ސީއެމްޑީއޭއިން ވިދާޅުވީ، ކެޕިޓަލް މާކެޓާގުޅޭ ސައްހަ މަޢުލޫމާތާއި ރަސްމީ އިޢުލާންތަކާއި އަދި ހުއްދަދީފައިވާ މާކެޓް ބައިވެރިންގެ ލިސްޓު އެއޮތޯރިޓީގެ ރަސްމީ ވެބްސައިޓް cmda.gov.mv މެދުވެރިކޮށް ލިބޭނެ ކަމަށެވެ.

ކެޕިޓަލް މާކެޓާގުޅޭ ގޮތުން އެއްވެސް ބާވަތެއްގެ ޝައްކުކުރެވޭ ކަމެއް ނުވަތަ އޮޅުވާލުމުގެ ގޮތުން މީސްމީޑިޔާ މެދުވެރިކޮށް ހިންގާ ކަމެއް ފާހަގަކުރެވިއްޖެނަމަ، ލަސްނުކޮށް އެއޮތޯރިޓީއަށް ރިޕޯޓްކުރުމަށްވެސް ސީއެމްޑީއޭއިން ވަނީ އިލްތިމާސްކުރައްވާފައެވެ.