ހުޅުމާލޭގައި، ބާރުސްޕީޑެއްގައި ދުއްވި ކާރެއް ފުރޮޅާލައި އެކްސިޑެންޓެއް ހިނގައިފި

ހުޅުމާލޭގައި ބާރު ސްޕީޑުގައި ދުއްވި ކާރެއް, ކޮންޓްރޯލުން ނެއްޓިގެންގޮސް ފުރޮޅާލައި އެކްސިޑެންޓެއް ހިނގައިފިއެވެ.

މީސްމީޑިއާގައި ދައުރުވަމުން އަންނަ ވީޑިއޯތަކުން ފެންނަ ގޮތުގައި ކާރު ފުރޮޅާލާފައިވަނީ ހުޅުމާލޭ ސެންޓްރަލް ޕާކު ކައިރިންނެވެ. ވީޑިއޯތަކުން ފެންނަ ގޮތުގައި ކާރު ފުރޮޅާލައިގެން ގޮސް ހުއްޓިފައި އޮތީ ސެންޓްރަލް ޕާކު ތެރޭގައެވެ.

މިހާދިސާ ހިނގި ވަގުތުގައި ކާރުގައި 5 މީހަކި ތިބި ކަމުގެ މައުލޫމާތު ލިބިފައިވެއެވެ.

މިހާދިސާއާއި ގުޅިގެން ފުލުހުން ބުނެފައި ވަނީ އެކްސިޑެންޓް ހިނގި ކަމުގެ ރިޕޯޓު ލިބިފައި ވަނީ މިއަދު ފަތިހު 5:35 ހާއިރު ކަމަށެވެ.

އެކްސިޑެންޓުވި ކާރުގެ ފަހަތުގައި އިން އަންހެނަކަށް އަނިޔާވެގެން ހުޅުމާލޭ ހޮސްޕިޓަލުގައި ފަރުވާދެމުންދާ ކަމަށާއި އޭނާއަށް ސީރިއަސް އަނިޔާތަކެއް ނުވާ ކަމަށް އެ ހޮސްޕިޓަލާ ހަވާލާދީ ފުލުހުން ވަނީ ބުނެފައެވެ.

އެކްސިޑެންޓުވި ކާރު ދުއްވަން އިން މީހާގެ ލައިސަންސް ހިފަހައްޓާފައިވާއިރު، ކާރު ޓޯ ކޮށްފައިވާ ކަމަށް ވެސް ފުލުހުން ވަނީ ބުނެފައެވެ.