13 އަހަރުގެ ކުއްޖާއަށް ޖިންސީ ގޯނާ ކުރި މައްސަލައިގައި މީހަކު ހައްޔަރު ކޮށްފި

އުތުރު ރަށެއްގައި 13 އަހަރުގެ އަންހެން ކުއްޖަކަށް ޖިންސީ ގޯނާ ކުރި މައްސަލައިގައި މީހަކު ހައްޔަރު ކޮށްފިއެވެ.

މި މައްސަލައާއި ގުޅިގެން މިއަދު ހައްޔަރުކޮށްފައި ވަނީ 27 އަހަރުގެ ދިވެހި ފިރިހެނަކު ކަމުގައި ފުލުހުން ވަނީ މައުލޫމާތު ދީފައެވެ.

އުތުރުގެ ރަށެއްގައި 13 އަހަރުގެ ކުއްޖަކަށް މަސްތުވާތަކެތި ދީގެން އެކުއްޖާއަށް ޖިންސީ ގޯނާ ކުރި މައްސަލައެއް ފެންމަތިވެފައިވަނީ އިއްޔެެގައެވެ. އިއްޔެ ފުލުހުން ބުނި ގޮތުގައި (ކުއްޖާގެ ރައްކާތެރިކަަމަށްޓަކައި ނަމާއި ވަނަވަރު ސިއްރުކޮށްފައި،) ކުޑަކުއްޖަކަށް ޖިންސީ ގޯނާ ކުރި މައްސަލައެއް މި މަހުގެ 19 ވަނަ ދުވަހު ނޯތު ޕޮލިސް ޑިވިޒަނަށް ރިޕޯޓުކޮށްފައިވާ ކަމަށެވެ.

މައުލޫމާތު ލިބިފައިވާ ގޮތުގައި މިމީހާ ހޯދުމުގެ މަސައްކަތް ޖެހިގެން އައި 20 މެއި ގައި ފުލުހުން ވަނީ މަސައްކަތް ފަށާފައެވެ.

ނޯތު ޕޮލިސް ޑިވިޒަންގައި ހިމެނެނީ ނ. އަތޮޅު، ރ. އަތޮޅު، ބ. އަތޮޅު، އަދި ޅ. އަތޮޅުގެ ރަށްތަކެވެ.

ހަމަމިއާއެކު މިއަދު، (މީގެ ކުރީގެ ގަޑިއެއްގައި) ނޯތު ޕޮލިސް ޑިވިޝަންގައި ހިމެނޭ ރަށެއްގެ 27 އަހަރުގެ މީހަކު ހޯދަން ފުލުހުން ވަނީ އިއުލާނުކޮށްފައެވެ. އެހެންނަމަވެސް މިއީ މި އަންހެންކުއްޖާގެ މައްސަލައާ ގުޅިގެން ހޯދަމުންދާ މީހެއްކަމަށް އެނގިފައެއް ނެތެވެ.