ބަނޑޭރިކޮށީގެ އެޕާޓްމެންޓެއްގެ ތެރޭގައި މަރުވެފައި އޮއްވައި ފެނުނު ހައްމާދުގެ ހަށިގަނޑު ވަޅުލައިފި

ބަނޑޭރިކޮށީގެ އެޕާޓްމެންޓެއްގެ ތެރޭގައި މަރުވެފައި އޮއްވައި ފެނުނު ހައްމާދު ސައީދުގެ ހަށިގަނޑު ވަޅުލައިފިއެވެ.

މި މަހު 13 ވަނަ ދުވަހު ބަނޑޭރިކޮށީގެ އެޕާޓްމެންޓެއްގެ ތެރެއިން މަރުވެފައި އޮއްވާ ފެނުނު ގދ. ހޯޑެއްދޫ، ވިލިނގިލީގެ ހައްމާދު ސަޢީދުގެ ހަށިގަނޑު މިއަދު ވަޅުލާފައިވާ ކަމަށާއި ހައްމާދުގެ ހަށިގަނޑު ވަޅުލާފައި މިވަނީ މަރުވެފައި އޮއްވައި ފެނުނުތާ 12 ދުވަސްފަހުން، ހުޅުމާލެ ސަހަރާގައެވެ.

ފުލުހުން ބުނީ ބަނޑޭރިކޮށީގައި ހުރި ގެއެއްގެ ތެރެއިން، ހައްމާދު ސަޢީދު، މަރުވެފައި އޮތްކަން އެނގުނީ ފުލުހުންނަށް ލިބުނު މައުލޫމާތަކާއި ގުޅިގެން ބަނޑޭރި ކޮށީގައި ހުރި އެޕާޓްމަންޓެއް ހޯދުމުން ކަމަށެވެ.

ފުލުހުން ބުނެފައި ވަނީ، ހައްމާދު މަރުވެފައި އޮއްވައި ފެނުނު އެޕާޓްމަންޓަކީ ބޭނުން ކުރަމުންދާ ތަނެއް ނޫންކަން ކަމުގައެެވެ.

ހައްމާދު މަރުވި ސަބަބު ހޯދުމަށް ޕޯސްޓްމޯޓަމް ހެދުމަށް، ހަށިގަނޑު މިދިޔަ ހޯމަ ދުވަހު އިންޑިޔާއަށް ފޮނުވިއެވެ. އެހެންނަމަވެސް މި ޕޯސްޓުމޯޓަމާ ގުޅޭ އެއްވެސް މައުލޫމާތެއް އަދި ފުލުހުން ހާމަކޮށްފައެއް ނުވެއެވެ.