އައްޑޫސިޓީ ނޭޗަރ ޕާކު ސަރަހައްދަށް ލެއްގި ކޯމަހެއް ކަނޑަށް ދޫކޮށް ލައިފި

އައްޑޫސިޓީ ނޭޗަރ ޕާކު ސަރަހައްދަށް ލެއްގި ކޯމަހެއް، ރައްކާތެރިކަމާއި އެކީ ކަނޑަށް ދޫކޮށް ލައިފި އެވެ.

އެނގިފައިވާ ގޮތުގައި މި ކޯމަސް ލައްގާފައިވަނީއިއްޔެގެ ވަގުތެއްގައި އައްޑޫސިޓީގެ ނޭޗަރު ޕާކު ސަރަހައްދަށެވެ. އެ ކޯމަސް ރައްކާތެރިކަމާއި އެކީ ކަނޑަށް ދޫކޮށްލާފައިވާ ކަމަށް ނޭޗަރ ޕާކުން ވަނީ ބުނެފައެވެ.

ނޭޗަރ ޕާކުން ފޭސްބުކުގައި ކުރި ޕޯސްޓެއްގައި ބުނީ، އެސަރަހައްދުގެ ގޮނޑުދޮށަށް ކޯމަހެއް ލައްގާފައިވާ މައުލޫމާތު އިއްޔެ ހަވީރު 18:07 އެހާކަންހާއިރު ލިބިފައިވާ ކަމަށާއި އެ މައުލޫމާތު ލިބުމާއި އެކީ ނޭޗަރ ޕާކުގެ މުވައްޒަފުންތައް އެސަރަހައްދަށް ދިޔަ ކަމަށެވެ.

މުވައްޒަފުންތައް އެސަރަހައްދަށް ގޮސް، ލޮނު ފެން ކޯމަހަށް ލިބޭ ގޮތް ހެދި ކަމަށެވެ. ހަމަމިއާއެކު މުވައްޒަފުންގެ ފުރާނަ އަތްމައްޗަށް ލައިގެން، އެތަކެއް މަސައްކަތުން، އެ ކޯމަސް ކަނޑަށް ދޫކުރެވިފައިވާ ކަމަށެވެ.

ކޯމަސް ކަނޑަށް ދޫކުރެވިފައިވަނީ ރޭ 19:40 އެހާކަންހާއިރު ކަމަށް ވެސް ނޭޗަރު ޕާކުން ވަނީ ބުނެފައެވެ.

ނޭޗަރ ޕާކުން ބުނީ، ކޯމަސް ކަނޑަށް ދޫކުރި ނަމަވެސް، އެކި ސަބަބުތަކާ ހުރެ ކޯމަސް އަލުން އެއްވެސް ސަރަހައްދަކަށް ލައްގާތޯ ބަލަމުން އަންނާނެ ކަމަށެވެ.