ރާއްޖޭގެ މާކެޓްގައި ތަޢައްޔަރުވެފައިވާ މާމުޔެއް ދައުރުވަމުންދާތީ އެ މާމުއިން ސަމާލުވުމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން އެދިއްޖެ އެވެ.
އެ އޮތޯރިޓީން ބުނީ އެ މާމުއިގައި ބޭހެއްގެ ދެ މާއްދާއެއް ހިމެނޭ ކަމަށެވެ.
މި ބާވަތް އެކުލެވޭ މާމުއި ރާއްޖޭގެ މާކެޓްގައި އެތެރެވަމުންދާކަމަށް އެ އޮތޯރީޓިން 2022 ވަނަ އަހަރުގެ ސެޕްޓެމްބަރު މަހުގެ 12 ވަނަ ދުވަހު ވެސް އާންމުންގެ ސަމާލުކަން ގެނެސްފައިވާ ކަމަށްވެސް ބުނެފައިވެއެވެ. އަދި އެފަދަ އުފެއްދުންތަކަކީ ޔޫއެސް އެފްޑީއޭއިން ރައްކާތެރިނޫން ކަމުގައި ފާހަގަކޮށްފައިވާ އުފެއްދުންތަކެއް ކަމަށް އެ އޮތޯރިޓީން ވަނީ ފާހަގަ ކޮށްފައެވެ.
އެގޮތުން އެމްއެފްޑީއޭއިން މިއަދު ނެރުނު އެލާޓެއްގައި ބުނީ ރާއްޖޭގައި އޮނަލައިންކޮށް ވިއްކަމުންދާ ބްލެކް ހޯސް ވައިޓަލް ހަނީ އަދި އެޓުމެކްސް ރޯޔަލް ހަނީ ފޯ ހިމް މާމުއިގައި ބޭހުގެ ދެ މާއްދާއެއް ފެނިފައިވާ ކަމަށެވެ. މާމުއި ހިމެނޭ ނުރައްކާތެރި ބާވަތަކީ ޓަޑަލަފިލް އަދި ސިލްޑެނަފިލް ގެ ބާވަތެއް ކަމަށް ވެސް ވަނީ ބުނެފައެވެ.
މީގެ އިތުރުން އެ އޮތޯރިޓީން ބުނީ އެފަދަ ތަކެތި ބޭނުން ކުރުމުގެ ސަބަބުން ލިބިދާނެ ސިއްހީ ގެއްލުންތަކުން ރައްޔިތުން ސަލާމަތް ކުރުމަށް ޓަކައި އިމްޕޯޓް ކުރުމާއި ވިއްކުމާއި އަދި ބޭނުން ކުރުމަކީ މަނާ ކަމެއް ކަމަށެވެ. ޑޮކްޓަރީ ބޭސް އަޅާފައި ހުންނަ އެފަދަ އުފެއްދުންތައް ބޭނުން ނުކުރުމަށާއި، އިންސާނާގެ ސިއްހަތަށް އެއިން ނުރައްކާތަކެއް ކުރިމަތިވެދާނެ ކަމަށެވެ. އަދި އެއީ ފުރާނައަށް ނުރައްކާވެދާނެ ފަދަ ކަމެއްކަމަށް ވެސް ބުނެފައި ވެއެވެ.
ޚިޔާލު
އެންމެ ފުރަތަމަ ޚިޔާލު ދެއްވާ.