ރަޖިސްޓްރީނުކޮށް ހުރި އުޅަނދުތައް ވީހާވެސް އަވަހަށް ޕާކު ކުރުމަށް ހާއްސަކޮށްފައިވާ ބިމަށް ގެނައުމަށް އަންގައިފި

މާލެ ސަރަހައްދުގައި ރަޖިސްޓްރީނުކޮށް ހުރި އުޅަނދުތައް ވީހާވެސް އަވަހަށް ހުޅުމާލޭގައި ހާއްސަކޮށްފައިވާ ބިމަށް ގެނައުމަށް ޓްރާންސްޕޯޓް މިނިސްޓްރީން އެދިއްޖެއެވެ.

ދަތުރުފަތުރާއި ބެހޭ ވުޒާރާއިން މިއަދު ކުރި އިއުލާނެއްގައި ބުނީ ރަޖިސްޓްރީ ނުކޮށް ބަންޑާރަ މަގުތަކުގައި ދުއްވާ އަދި ޕާކު ކުރާ އުޅަނދުތަކާއި އެހެން ޒޯނުތަކުގައި ރަޖިސްޓްރީ ކޮށްފައިވާ އުޅަނދުތައް "އޭ" ޒޯނުގައި ދުއްވާ ދުއްވުމާއި، ޕާކު ކުރުމާއި، ބޭނުންކުރުން ހުއްޓުވައި އެ އުޅަނދުތައް ގާނޫނާއި ގަވާއިދުތަކުގެ ތެރެއަށް ގެނައުމުގެ ފުރުސަތު ދިނުމުގެ ގޮތުން މަސައްކަތް ފަށާފައިވާ ކަމަށެވެ.

އެފަދަ އުޅަނދުތައް ޕާކު ކުރަން ހުޅުމާލޭގެ ލޮޓު ނަމްބަރު 452 ބިމުގައި ވަގުތީ ގޮތުން ބަހައްޓާނެ އިންތިޒާމުތައް ހަމަޖައްސާފައިވާ ކަމަށެވެ. މި ބިން ހުންނަނީ ހުޅުމާލެ ދެވަނަ ފިޔަވަހީގަ އެވެ. ދަތުރުފަތުރާ ބެހޭ ވުޒާރާއިން މި އިންތިޒާމުތައް ހަމަޖެއްސީ ހައުސިންގް ޑިވެލޮޕްމެންޓް ކޯޕަރޭޝަން، އެޗްޑީސީއާއެކު މަޝްވަރާކޮށްގެންނެވެ

އިއުލާންގައި ބުނީ އެއްގަމު ދަތުރުފަތުރުގެ ގާނޫނުގެ ދަށުން އެކުލަވާލާފައިވާ ގަވައިދުގައިވާ ގޮތުގެ މަތިން އުޅަނދާ ގުޅިގެން ފުރިހަމަ ކުރަން ޖެހޭ އެންމެހާ ކަންކަން ވީ އެންމެ އަވަސް ފުރުސަތެއްގައި ނިންމުމަށް އަންގާ ކަމަށެވެ.

މި އެންގުމާ ހިލާފުވާ އުޅަނދުތަކާ މެދުގައި ގާނޫނާއި ގަވައިދުގެ ދަށުން ފިޔަވަޅު އަޅާނެ ކަމަށް ވެސް އިއުލާންގައިވެއެވެ.

ހުޅުމާލެ ދެވަނަ ފިޔަވަހީގައި ހުންނަ މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) ފްލެޓު ކުރިމަތީގައި އޮންނަ 40،000 އަކަފޫޓުގެ ހުސް ބިން އެޗްޑީސީގެ ފަރާތުން ޓްރާންސްޕޯޓާ ހަވާލު ކުރީ މިދިޔަ ހަފްތާގައެވެ. މިއީ 200 ވަރަކަށް ކާރު ނޫނީ ހަތަރު ފުރޮޅުލީ އުޅަނދު ޕާކް ކުރެވޭނެ ޖާގަ ހުރި ބިމެކެވެ.