މޯލްޑިވްސް ޕޮލިޓެކްނިކުން ގައުމަށް ބޭނުންވާ އެކި ދާއިރާތަކުން 400 އަށްވުރެ ގިނަ ދަރިވަރަކު ތަމްރީނުވެއްޖެއެވެ.
މިދިޔަ ބުރާސްފަތި ދުވަހުގެރޭ ދިވެހިރާއްޖޭގެ ގައުމީ ޔުނިވާސިޓީ (އެމްއެންޔޫ) ގައި ބޭއްވި މޯލްޑިވްސް ޕޮލިޓެކްނިކްގެ 2024 ވަނަ އަހަރުގެ ދަސްވެނިވުމުގެ ރަސްމިއްޔާތުގައި ގްރެފިކް ޑިޒައިން، އިލެކްޓްރިޝަން، އިންޖީން ރިޕެއަރ، އޮފިސް މެނޭޖްމަންޓް، ވުޑް ޓަރނިންގ، ފެޝަން ޑިޒައިން، އާކިޓެކްޗަރ ފަދަ އެތައް ދާއިރާއެއްގެ ކޯސްތަކަކުން ދަރިވަރުން ދަސްވެނިވެފައެވެ.
އެގޮތުން 324 ފިރިހެން ދަރިވަރުންނާއި 107 އަންހެން ދަރިވަރުންނާއެކު ޖުމްލަ 431 ދަރިވަރުން ވަނީ ދަސްވެނިވެފައެވެ.
ދަސްވެނިވި ދަރިވަރުންގެ ތެރޭގައި، އައްޑޫ ސިޓީ ހިތަދޫ، ގއ. ވިލިނގިލި، ގދ. ގައްދޫ އަދި ހއ. ދިއްދޫ ކެމްޕަސްގެ ދަރިވަރުން ހިމެނެއެވެ.
ދަސްވެނިވުމުގެ ރަސްމިއްޔާތުގައި، އެކި ދާއިރާތަކުން ތަމްރީނުވެފައިވާ 22 ދަރިވަރުން ވަނީ ޚާއްސަ އެވޯޑް ވެސް ހާސިލުކޮށްފައެވެ.
މި ރަސްމިއްޔާތު ޝަރަފްވެރިކޮށްދެއްވައި ދެއްކެވި ވާހަކަފުޅުގައި އިމާރާތްކުރުމާއި ބިނާރާބެހޭ ވުޒާރާގެ ވަޒީރު ޑރ. ޢަބްދުﷲ މުއްޠަލިބް ވިދާޅުވީ ޓެކްނިކަލް ދާއިރާތަކުން ގައުމަށް ޚިދުމަތް ކުރާނެ ޒުވާނުން ނެރުމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވަރަށް އިސްކަންދެއްވާ ކަމަށެވެ.
މޯލްޑިވްސް ޕޮލިޓެކްނިކަކީ 1975 ވަނަ އަހަރު ވީ.ޓީސީގެ ނަމުގައި އުފެދުނު އިންސްޓިޓިއުޓެކެވެ. 2010 ގައި ރައީސުލްޖުމްހޫރިއްޔާ ނެރުއްވި ގަރާރެއްގެ ދަށުން "މޯލްޑިވްސް ޕޮލިޓެކްނިކް" ނަމަށް ބަދަލްކުރެވި ވޮކޭޝަނަލް ޓްރެއިންނިންގ ކޯސްތައް ހިންގުމަށް ވަނީ މަތިކުރެވިފައެވެ.
ޚިޔާލު
އެންމެ ފުރަތަމަ ޚިޔާލު ދެއްވާ.