އެމެރިކާގެ ހަވާއީގައި ބޭއްވި 26 ވަނަ "އިންޑޯ ޕެސިފިކް ޗީފްސް އޮފް ޑިފެންސް ކޮންފަރެންސް"ގައި ޗީފް އޮފް ޑިފެންސް ފޯސް، މޭޖަރ ޖެނެރަލް އިބްރާހީމް ޙިލްމީ ބައިވެރިވެވަޑައިގެންފިއެވެ.
އިންޑޯ ޕެސިފިކް ޗީފްސް އޮފް ޑިފެންސް ކޮންފަރެންސް ފެށީ މި މަހުގެ 20 ވަނަ ދުވަހުއެވެ.
ޔޫއެސް އިންޑޯ ޕެސިފިކް ކޮމާންޑްގެ ކޮމާންޑަރ، އެޑްމިރަލް ސެމިއުލް ޖޭ ޕަޕަރޯ ހޯސްޓްކޮށްދެއްވި މި ކޮންފަރެންސްގައި އޭޝިއާ، ޕެސިފިކް އައިލެންޑްސް، ޔޫރަޕް، އުތުރު އެމެރިކާ އަދި ދެކުނު އެމެރިކާގެ ގައުމުތަކުގެ އެންމެ އިސް އަސްކަރީ ލީޑަރުންނާއި މަންދޫބުން ބައިވެރިވެވަޑައިގެންނެވިއެވެ.
މި ކޮންފަރެންސްގައި ސަރަހައްދީ ސަލާމަތީ ކަންކަމާބެހޭ ގޮތުން މި ކޮންފަރެންސްގައި މަޝްވަރާ ކުރައްވާފައިވެއެވެ. އަދި ކުރިއަށް އޮތްތަނުގައި ގައުމުތަކުން ގުޅިގެން އެއްބާރުލުން ދެވޭނެ ދާއިރާތަކާ ގުޅޭ ގޮތުން ވާހަކަ މަޝްވަރާ ކުރައްވާފައިވެއެވެ.
"ދަ ފިއުޗާ އިންޑޯ-ޕެސިފިކް: ބިލްޑިންގ އަ ރެސިލިއަންޓް އެންޑް އިންޓަކަނެކްޓެޑް ރީޖަން" ގެ ނަމުގައި ތިން ދުވަހުގެ މުއްދަތަށް ކުރިއަށް ގެންދިޔަ ކޮންފަރެންސްގައި 28 ގައުމަކާއި، މަލްޓިނޭޝަނަލް އޯގަނައިޒޭޝަންތަކުން ވަނީ ތަމްސީލުކޮށްފައެވެ.
މި ކޮންފަރެންސްގެ ހަވާސާގައި ޗީފް އޮފް ޑިފެންސް ފޯސް، މޭޖަރ ޖެނެރަލް ޙިލްމީ ވަނީ ޔޫއެސް އިންޑޯ ޕެސިފިކް ކޮމާންޑްގެ ކޮމާންޑަރ، އެޑްމިރަލް ސެމިއުލް ޖޭ ޕަޕަރޯ ބައްދަލުކުރައްވައިފައެވެ. އެ ބައްދަލުވުމުގައި އިންޑޯ ޕެސިފިކް ކޮމާންޑްގެ ތެރެއިން ދިވެހި އަސްކަރިއްޔާގެ ކެޕޭސިޓީ ވަރުގަދަކުރުމަށާއި ތަރައްގީކުރުމުގެ ދާއިރާތަކާ ބެހޭގޮތުން މަޝްވަރާކުރެއްވިއެވެ.
މި ކޮންފަރެންސްގައި ބައިވެރިވެވަޑައިގެންނެވުމަށްފަހު ޗީފް އޮފް ޑިފެންސް ފޯސް، ޙިލްމީ މިއަދު ވަނީ ރާއްޖެ ވަޑައިގެންފައެވެ.
ޚިޔާލު
އެންމެ ފުރަތަމަ ޚިޔާލު ދެއްވާ.