އެމެރިކާގެ ޔުނައިޓެޑް ސްޓޭޓްސް އޭޖެންސީ ފޮރ އިންޓަރނޭޝަނަލް ޑިވެލޮޕްމެންޓް (ޔޫއެސްއެއިޑް) އިން ރާއްޖެއަށް 4.4 މިލިއަން ޑޮލަރުގެ އެހީއެއް ދޭން ނިންމައިފިއެވެ.
ޔޫއެސްއެއިޑްއިން ނެރުނު ބަޔާނެއްގައި ބުނީ ރާއްޖޭގެ ޑިމޮކްރަސީ ކުރިއެރުވުމަށްޓަކައި 4.4 މިލިއަން ޑޮލަރުގެ އެހީއެއް ދޭން ނިންމާފައިވާ ކަމަށެވެ.
ޔޫއެސްއެއިޑް އިން ބުނީ އޭގެތެރެއިން 3 މިލިއަން ޑޮލަރު ދޭން ނިންމާފައިވަނީ މީޑިއާ ލިޓްރެސީ ޕްރޮގްރާމިން ހަރުދަނާ ކުރުމަށާއި އިންފޮމޭޝަން ރެޒިލިއަންސް އިތުރުކުރުމަށް ކުރެވޭ މަސައްކަތްތަކަށް އެއްބާރުލުން ދިނުމަށާއި ޕަބްލިކް އަދި މީޑިއާގެ ދާއިރާގައި ދެފުށް ފެންނަ ނިޒާމެއް ގާއިމު ކުރުމަށް ކަމަށެވެ.
ބާކީ 1.4 މިލިއަން ޑޮލަރު ދޭން ނިންމާފައިވަނީ ޑިމޮކްރެޓިކް ހައްގުތަކަށް ހޭލުންތެރިކަން އިތުރުކުރުމަށާއި ސިވިކް އެންގޭޖްމަންޓާއި ލޯކަލް ކައުންސިލުތަކާ ގުޅިގެން ކުރިއަށްގެންދާ މަސައްކަތްތަކަށާއި އަންހެނުންގެ ތަރައްގީއަށް ކަމަށް ޔޫއެސްއެއިޑް އިން ބުންޏެވެ.
ޔޫއެސްއެއިޑް އިން މި އެހީ ދޭން ނިންމިއިރު، އދ. ގެ އާންމު މަޖިލީހުގެ 79 ވަނަ ސެޝަންގެ ހަވާސާގައި ރައީސުލްޖުމްހޫރިއްޔާ ވަނީ ޔޫއެސްއެއިޑްގެ އެޑްމިނިސްޓްރޭޓަރ ސަމަންތާ ޕަވަރއާ ބައްދަލުކުރައްވައިފައެވެ.
އެ ބައްދަލުވުމުގައި ދެ ބޭފުޅުން ވަނީ، ދެ ފަރާތުގެ މަސްލަހަތު ހިމެނޭ ތަފާތު މައްސަލަތަކާމެދު އެކުގައި މަސައްކަތް ކުރައްވައި، ދެ ފަރާތަށް ފައިދާވާނޭ ފަދަ މަސައްކަތްތަކުގައި އެއްބާރުލުންދޭނޭކަމުގެ ޔަގީންކަން ދެއްވައިފައެވެ.
ޚިޔާލު
އެންމެ ފުރަތަމަ ޚިޔާލު ދެއްވާ.