ބާ ކައުންސިލްގެ އެސްޖީއަކަށް އުސްތާޒު ނިޝާތު

ދިވެހިރާއްޖޭގެ ބާ ކައުންސިލްގެ ސެކެރަޓަރީ ޖެނަރަލަކަށަ އުސްތާޒް މުހައްމަދު ނިޝާތު ހަމަޖައްސައިފިއެވެ.

އެ ކައުންސިލަށް އެސްޖީއަކު ހޯދުމަށް މިދިޔަ މަހުގެ ފަސް ވަނަ ދުވަހު ވެސް އިއުލާނުކުރި އެވެ.

ނަމަވެސް، އެ އިއުލާނަށް އެކަށީގެންވާ ވަރަށް ތަރުހީބު ލިބިފައި ނުވާތީ ބާ ކައުންސިލުން އަނެއްކާ ވެސް ވަނީ އެސްޖީއަކު ހޯދުމަށް އިއުލާނުކޮށްފައެވެ.

ބާ ކައުންސިލަށް އެސްޖީއަކު ކަނޑައަޅަނީ އެއް އަހަރު ދުވަހުގެ މުއްދަތަށެވެ. މުސާރައަށް މަހެއްގެ މައްޗަށް 40،500 ރުފިޔާ ލިބޭނެއެވެ. އަދި މަސައްކަތާ ގުޅުވައި އެހެނިހެން އެލެވެންސާއި ރޯދަ އެލެވެންސާއި ރާއްޖޭގެ ޕެންޝަނާ ބެހޭ ގާނޫނުގެ ދަށުން ލިބޭނެއެވެ. އުސްތާޒު ނިޝާތު ވަނީ މީގެ ކުރިން ބާކައުންސިލްގެ ޖެނަރަލް ކައުންސިލްގައި 5 އަހަރު ދުވަހު މަސައްކަތް ކުރައްވާފައެވެ. ބާކައުންސިލަށް އެސްޖީއަކު އައްޔަން ކުރެއްވި އިރު ބާ ކައުންސިލްގެ އެގްޒެކެޓިވް ކޮމިޓީގައި ބަންޑާރަ ނައިބަށް ނުހުންނެވޭ ގޮތަށް ގާނޫނީ ފަންނުގެ ގާނޫނަށް ގެނައި އިސްލާހު ރައްޔިތުންގެ މަޖިލީހުން ވަނީ ފާސްކޮށްފައެވެ.

ބާ ކައުންސިލްގެ އެގްޒެކެޓިވް ކޮމިޓީގައި މިހާރު ތިއްބަވަނީ ނުވަ މެންބަރުންނެވެ. އެއީ ބަންޑާރަ ނައިބާއި ގާނޫނީ ވަކީލުންގެ ތެރެއިން އިންތިހާބުކުރާ ރައީސާއި ނައިބު ރައީސް އަދި އިތުރު ހަ މެންބަރެކެވެ.

ސަރުކާރުގެ ފަރާތުން ހުޅުމާލެ އުތުރު ދާއިރާގެ ޕީއެންސީގެ މެންބަރު ހުސައިން ޝަރީފް ހުށަހެޅުއްވި ބިލު ކޮމިޓީން ފާސްކުރި ގޮތަށް މަޖިލީހުން މިއަދު ފާސްކޮށްފައިވަނީ ވޯޓުގައި ބައިވެރިވި 77 މެންބަރުންގެ އިއްތިފާގުންނެވެ.

އެ ބިލުްގައިވާ ގޮތުން، އެ ކައުންސިލްގެ އެގްޒެކެޓިވް ކޮމިޓީގައި ތިއްބަވާނީ ރައީސާއި ނައިބު ރައީސް އަދި އިތުރު ހަތް މެންބަރެކެވެ.

ބާ ކައުންސިލަށް ފުރިހަމަ މިނިވަންކަން ލިބޭނީ، ގާނޫނަށް އިސްލާހު ގެންނަން ހުށަހަޅާފައިވާ ގޮތަށް އެކްސްކޯ އިން ބަންޑާރަނައިބު އުނި ކުރުމުން ކަމަށް އެ ކައުންސިލުން ވަނީ ބުނެފަ އެވެ.