ރައްޔިތުންގެ މަޖިލީހުން އަންނަ އަހަރަށް ލަފާކޮށް ހުށަހަޅާފައިވާ 56.6 ބިލިޔަން ރުފިޔާގެ ބަޖެޓަށް ބަހުސްކޮށް ނިންމާލައިފިއެވެ. މި ބަޖެޓު މަޖިލީހަށް ހުށަހެޅީ މިދިޔަ މަހުގެ 31 ވަނަ ދުވަހުއެވެ. އަދި ބަޖެޓަށް ބަހުސް ފެށީ މި މަހުގެ 12 ވަނަ ދުވަހުއެވެ.
ބަޖެޓު ބަހުސްގައި 77 މެންބަރުން ބައިވެރިވެ ވާހަކަފުޅު ދައްކަވާފައިވެއެވެ. ކޮންމެ މެންބަރަކަށް 15 މިނެޓުގެ ފުރުސަތެއް ދެވުނު މި ބަހުސްގައި ޖުމްލަ 14 ގަޑިއިރާއި 17 މިނެޓު ހޭދަވެފައިވެއެވެ.
ބަހުސްގައި ސަރުކާރު ތާއީދުކުރާ މެންބަރުން ބަޖެޓު ދިފާޢުކުރައްވާފައިވާއިރު، އިދިކޮޅު ފަރާތްތަކުން ބަޖެޓާމެދު ކަންބޮޑުވުން ފާޅުކޮށްފައިވެއެވެ. އިދިކޮޅު މެންބަރުން މައިގަނޑު ގޮތެއްގައި ކަންބޮޑުވުން ފާޅުކޮށްފައި ވަނީ ބަޖެޓުގައި ވަކިވަކި މަޝްރޫއުތަކަށް ޚަރަދުވާނެ ފައިސާގެ ތަފްސީލު ހިމަނާފައި ނެތުމާ ގުޅޭގޮތުންނެވެ.
ވިލިމާލޭ ދާއިރާގެ މެންބަރު މުހައްމަދު އިސްމާއީލް ވިދާޅުވެފައި ވަނީ ވަކިވަކި ތަފްސީލު ނުހިމެނި ނަމަވެސް، ދައުލަތަށް އާމްދަނީ އިތުރު ކުރެވޭނެ ގޮތްތަކާބެހޭ ތަފްސީލު ވަރަށް ސާފުކޮށް ބަޖެޓުގައި ހިމަނާފައިވާ ކަމަށެވެ.
ހުޅުމާލޭ އުތުރު ދާއިރާގެ މެންބަރު ހުސައިން ޝަރީފް ވިދާޅުވެފައިވަނީ ރައީސުލްޖުމްހޫރިއްޔާގެ މެނިފެސްޓޯގައި ހިމެނޭ ކަންކަން ފުއްދުމަށް ބޭނުންވާ ފައިސާ ބަޖެޓުގައި ހިމަނާފައިވާ ކަމަށެވެ.
އިމާރާތްކުރުމާއި ބިނާވެށި ތަރައްގީ ކުރުމުގެ ވަޒީރު ޑރ. ޢަބްދުﷲ މުއްޠަލިބް ވިދާޅުވެފައިވަނީ ކުރީގެ ސަރުކާރުތަކުން ބަޖެޓުގައި ވަކިވަކި މަޝްރޫއުތައް ހިމަނާފައިވަނީ ސިޔާސީ ބޭނުމަށް ކަމަށާއި، ފައިސާ ނެތި އެއްވެސް މަޝްރޫއެއް ކުރިއަށް ގެންދެވޭނެ ކަމަށް ނުދެކޭ ކަމަށެވެ.
މިހާރު ބަޖެޓު ބަހުސް ނިމި، ދެން އޮތީ ބަޖެޓު ކޮމިޓީން ބަޖެޓާމެދު ގޮތެއް ނިންމުމަށްފަހު، ކޮމިޓީ ރިޕޯޓު މަޖިލީހުގެ ތަޅުމަށް ހުށަހެޅުމެވެ. ބަޖެޓު ފާސް ކުރާނީ ކޮމިޓީ ރިޕޯޓު ހުށަހެޅުމުންނެވެ.
ޚިޔާލު
އެންމެ ފުރަތަމަ ޚިޔާލު ދެއްވާ.