ހައުސިން މިނިސްޓްރީގައި ރޯވި އަލިފާންގަނޑުގެ ބޮޑުބައި ނިއްވާލެވިއްޖެ، ބޭނުން ނުކުރެވޭވަރަށް އިމާރާތް ވަނީ އަނދާފައި

މިއަދު ހެނދުނު ހައުސިން މިނިސްޓްރީގައި ރޯވި އަލިފާންގަނޑުގެ ބޮޑުބައި ނިއްވާލެވިފައިވާކަމަށް އެމްއެންޑީއެފް ފަޔަރ އެންޑް ރެސްކިއުއިން ހާމަކޮށްފިއެވެ.

އެމްއެންޑީއެފުން މައުލޫމާތު ދޭ ގޮތުގައި ޓިނު ބިލްޑިންގ ވަރަށް ބޮޑަށް އަނދާ ހުލިވެފައިވާ ކަމަށާއި، އެ ބިލްޑިންގގެ 90 އިންސައްތަ މިހާރު ނިއްވާލެވިފައިވާ ކަމަށެވެ. ނަމަވެސް، ގްރީން ބިލްޑިންގގެ 2 ވަނަ އަދި 3 ވަނަ ފަންގިފިލާގައި އަދިވެސް އަލިފާން ވަނީ ރޯވެފައިކަންވެސް ފާހަގަކުރިއެވެ. އަދި ޓިނު ބިލްޑިންގގެ އޮޕޮޒިޓަށް ވާގޮތަށް ހުރި "މަހުމާ ވިލާ" ގައި ކޮންމެވެސް ވަރަކަށް އަލިފާން ހިފައިފައިވާކަމަށް ވެސް އެމްއެންޑީއެފުން ހާމަކޮށްފައިވެއެވެ.

އެމްއެންޑީއެފް ފަޔަރ އެންޑް ރެސްކިއުގެ އިންސިޑެންޓް ކޮމާންޑަރ ވިދާޅުވިގޮތުގައި، ހައުސިން މިނިސްޓްރީގައި އަލިފާނުގެ ހާދިސާއެއް ހިނގައިގެން އުޅޭކަމުގެ މައުލޫމާތު އެމްއެންޑީއެފް ފަޔަރ އެންޑް ރެސްކިއުއަށް ލިބިފައިވަނީ މިއަދު ހެނދުނު 6:27 ހާއިރުއެވެ. މައުލޫމާތު ލިބުނު ހިސާބުން ފެށިގެން އެމްއެންޑީއެފްއިން އެ ސަރަހައްދުގައި މަސައްކަތްކުރަން ފަށާފައިވާކަމަށް އެމަނިކުފާނު ވިދާޅުވިއެވެ.

"މިހާރުވެސް ފަޔަރ ފައިޓް ކުރުމުގެ މަސައްކަތް ކުރަމުންދަނީ. އެއްކޮށް އަލިފާން ނިއްވާ ލެވުނީއެއް ނޫން. މިހާރުވެސް ޓީމްތައް އެތެރެއަށް ވަދެގެން މަސައްކަތްކުރަމުންދަނީ. މިހާރު ވިސްނުން މިހުރީ ރޯވެފައި ހުރި ދިމާތަކަށް އިތުރަށް ފެން ޖަހައިގެން އެތެރެއަށް ޓީމްތައް ވައްދައިގެން މަސައްކަތްކުރުމަށް" އިންސިޑެންޓް ކޮމާންޑަރ ވިދާޅުވިއެވެ.

އެމްއެންޑީއެފްއިން ވިދާޅުވިގޮތުގައި، މި އިމާރާތަކީ ސްޓީލް ސްޓްރަކްޗަރއަކަށްވާތީ އިމާރާތް ވަރަށް ބަލިކަށިވެފައިވެއެވެ. އަލިފާން ނިއްވުމުގެ މަސައްކަތުގައި އެމްއެންޑީއެފްގެ އިތުރުން އެމްއޭސީއެލްއާއި އެމްޕީއެލް އަދި އެކިއެކި ވުޒާރާގެ މުވައްޒަފުންނާއި، އެންޑީއެމްއޭ، އަދި ރެޑް ކްރެސެންޓްގެ އެހީތެރިކަން ލިބިފައިވާކަމަށް އެމްއެންޑީއެފްއިން ވަނީ ވިދާޅުވެފައެވެ.

މި ހާދިސާގައި އެއްވެސް މީހަކަށް އަނިޔާވެފައިވާކަމުގެ މައުލޫމާތެއް މިވަގުތު ލިބިފައެއް ނުވެއެވެ.