ހައި ކޯޓުގެ ކުރީގެ ފަނޑިޔާރު ޝުއައިބު ހުސައިން ޒަކަރިއްޔާ މިއަދު ހަވީރުގެ ވަގުތެއްގައި އަވަހާރަވެއްޖެއެވެ. އެނގިފައިވާ ގޮތުގައި އޭނާ އަވަހާރަވެފައިވަނީ ކެންސަރު ބައްޔަށް ފަރުވާ ހޯއްދަވަމުން ގެންދަވަނިކޮށެވެ.

ޝުއައިބު ހުސައިން ޒަކަރިއްޔާ އަކީ ދިވެހިރާއްޖޭގެ ޝަރުޢީ ދާއިރާގައި ގިނަ ދުވަސްތަކެއް ވަންދެން ޚިދުމަތް ކުރައްވާފައިވާ ބޭފުޅެކެވެ. އޭނާ އެންމެ ފުރަތަމަ ފަނޑިޔާރުކަމުގެ މަޤާމާ ހަވާލުވެވަޑައިގަތީ 1999 ވަނަ އަހަރުގެ ޖޫން މަހުގެ 1 ވަނަ ދުވަހުއެވެ. އޭގެ ފަހުން، 2022 ވަނަ އަހަރުގެ މާރޗު މަހުގެ 26 ވަނަ ދުވަހު ހައި ކޯޓުގެ ފަނޑިޔާރުކަމަށް އައްޔަންކުރެވުނެވެ.

ޝުއައިބު ހުސައިން ޒަކަރިއްޔާ ވަނީ ހައި ކޯޓުގައި 11 އަހަރު ޚިދުމަތް ކުރައްވާފައެވެ. އޭނާ އަމިއްލަފުޅަށް އެދިވަޑައިގަތުމަކަށް 2022 ވަނަ އަހަރުގެ ނޮވެމްބަރު މަހުގެ 22 ވަނަ ދުވަހު ފަނޑިޔާރުކަމުގެ މަޤާމުން ރިޓަޔަރ ކުރެއްވިއެވެ. އެ އިރު އޭނާ ވަނީ ފަނޑިޔާރުކަމުގައި 20 އަހަރަށްވުރެ ގިނަ ދުވަސް ހޭދަކުރައްވާފައެވެ.

ތަޢުލީމީ ގޮތުން ބަލާއިރު، ޝުއައިބު ހުސައިން ޒަކަރިއްޔާ ވަނީ 1997 ވަނަ އަހަރު ޤަތަރު ޔުނިވަރސިޓީން ޤާނޫނާއި ޝަރީޢަތުގެ ރޮނގުން ފުރަތަމަ ޑިގްރީ ހާސިލުކުރައްވާފައެވެ. އަދި 2006 ވަނަ އަހަރު މެލޭޝިޔާގެ އިންޓަރނޭޝަނަލް އިސްލާމިކް ޔުނިވަރސިޓީން މާސްޓަރ އޮފް ކޮމްޕެރެޓިވް ލޯވ ހައްދަވާފައެވެ.

ހައި ކޯޓުގެ ފަނޑިޔާރުކަމުގެ އިތުރުން، ޝުއައިބު ހުސައިން ޒަކަރިއްޔާ ވަނީ ޖަސްޓިސް މިނިސްޓްރީގެ ލީގަލް އޮފިސަރުކަމާއި، ފެކަލްޓީ އޮފް އިސްލާމިކް ސްޓަޑީޒް އަދި ފެކަލްޓީ އޮފް ޝަރީޢާ އެންޑް ލޯގައި ލެކްޗަރަރެއްގެ ގޮތުގައިވެސް މަސައްކަތް ކުރައްވާފައެވެ. މީގެ އިތުރުން، އޭނާ ވަނީ ޚާއްޞަ ޤާޟީކަމާއި، ޢާއިލާއާބެހޭ ކޯޓުގެ ޤާޟީކަމާއި، މަދަނީ ކޯޓާއި ކުޑަކުދިންނާބެހޭ ކޯޓުގެ އިސްޤާޟީކަންވެސް ކުރައްވާފައެވެ.