ރަށު އެކްސްޕޯ 2025 ގައި ބައިވެރިވާ ކޮލަމާފުށީގެ ސްޓޯލްއަށް ޒިޔާރަތްކުރާ ފަރާތްތަކަށް ހާއްސަ ފުރުސަތުތަކެއް ހުޅުވާލައިފިއެވެ.
މީގެ ތެރޭގައި ދެ މީހަކަށް ހިލޭ ދަތުރުކުރުމުގެ ފުރުސަތާއި، ކެއުމުގެ އިންތިޒާމުތަކާއި އަދި ފަޅުރަށްތަކުގައި ކޭމްޕް ކުރުމުގެ ފުރުސަތު ހިމެނެއެވެ.
މި އަހަރުގެ ފެބްރުއަރީ 13 އިން 15 އަށް ހުޅުމާލޭ ސެންޓްރަލް ޕާކުގައި ބޭއްވުމަށް ހަމަޖެހިފައިވާ މި އެކްސްޕޯގައި، ކޮލަމާފުށީގެ ސްޓޯލްގައި މަޝްހޫރު ޑައިވަރ ސެންޑީ ބައިވެރިވެ، އޭނާގެ ހުވަދޫގެ ދަތުރުތަކުގައި، ހާއްސަކޮށް ކޮލަމާފުށިން ލިބުނު ތަޖުރިބާތައް ހިއްސާކުރުމަށް ވަނީ ހަމަޖެހިފައެވެ.
ހުވަދު އަތޮޅުގެ ވަކި ރަށެއްގެ ގޮތުގައި އޮންނަ ކޮލަމާފުއްޓަކީ، ރަށުގެ ދެފަރާތުގަޔާއި ކުރިމަތީގައި ގިނަ އަދަދެއްގެ ފަޅުރަށްތައް އޮންނަ ރަށެކެވެ. އަދި ހުވަދޫ ކަނޑު ހުރަސްކޮށް ހުވަދު އަތޮޅަށް ވަންނައިރު ފެންނަ ފުރަތަމަ މީހުން ދިރިއުޅޭ ރަށަކީވެސް ކޮލަމާފުށްޓެވެ.
ރާއްޖޭގައި މިހާރު އޮތް ހަމައެކަނި ހޯރަ އަރާ ރަށް ކަމުގައިވާ 'ހިތައިދޫ' އަށް ތިރިކުރާ ހޯރަތައް ބަލައިލުމުގެ ފުރުސަތުވެސް ދެ ފަރާތަކަށް ހިލޭ ލިބިގެންދާނެ ކަމަށް ކޮލަމާފުށީ ކައުންސިލުން މަޢުލޫމާތު ދެއެވެ.
"ދަ ޓްރެވަލް ގައިޒް" އިން އިންތިޒާމްކުރާ މި އެކްސްޕޯގެ މައިގަނޑު މަޤްޞަދަކީ ދިވެހިރާއްޖޭގެ ރަށްތަކުގެ ޤުދުރަތީ ރީތިކަމާއި، އަގުހުރި ސަގާފަތް އެއްތަނަކުން ދައްކުވައިދިނުމާއި، އަތޮޅުތަކުގެ ވަކިވަކި ރަށްތައް ފަތުރުވެރިކަމުގެ މަންޒިލުތަކެއްގެ ގޮތުގައި އިޝްތިހާރުކޮށް، ރަށްފުށުގެ ފަތުރުވެރިކަން ކުރިއެރުވުމަށް މަގުފަހިކޮށްދިނުމެވެ.
ޚިޔާލު
އެންމެ ފުރަތަމަ ޚިޔާލު ދެއްވާ.