މޯލްޑިވްސް ކަސްޓަމްސް ސާވިސްގެ ގާނޫނީ މަސްއޫލިއްޔަތުތަކާއި ޒިންމާތަކާ ގުޅޭގޮތުން ސޯޝަލް މީޑިއާގައި ދައުރުވަމުންދާ ނުރަނގަޅު ވާހަކަތަކާ ގުޅިގެން، އެ މުއައްސަސާއިން ކަންބޮޑުވުން ފާޅުކޮށްފިއެވެ. ކަސްޓަމްސްއިން މިކަމާ ގުޅޭގޮތުން ހާއްސަ ނޫސްބަޔާނެއް ނެރެފައިވަނީ އެ މުއައްސަސާގެ އަގުވެއްޓޭ ގޮތަށް ފަތުރަމުންދާ ވާހަކަތަކަށް ރައްދު ދިނުމުގެ ގޮތުންނެވެ.
ކަސްޓަމްސްއިން ނެރުނު ބަޔާނުގައި ބަޔާންކޮށްފައިވާ ގޮތުގައި، ރާއްޖެއަށް އިމްޕޯޓްކުރާ މުދަލާއި، ފަސިންޖަރުންނާއި، ރާއްޖެއިން ބޭރުން އަންނަ އުޅަނދުފަހަރު ބަލައިފާސްކުރުމަކީ ކަސްޓަމްސްގެ ގާނޫނުގެ ދަށުން އެ މުއައްސަސާއާ މަތިކުރެވިފައިވާ ގާނޫނީ ޒިންމާއެކެވެ. މި މަސައްކަތް ކުރިއަށް ގެންދަނީ ބަނދަރުތަކުގައި ގާއިމުކޮށްފައިވާ ވަސީލަތްތައް ބޭނުންކޮށްގެން، ލިބޭ މައުލޫމާތާއި ހޯދުންތަކަށް ރިއާޔަތްކޮށް، ގާނޫނާއި ގަވާއިދުގެ ތެރެއިން ކަމަށް އެ މުއައްސަސާއިން ބުނެއެވެ.
މިގޮތަށް ބަލައިފާސްކުރުމުގެ މައިގަނޑު މަގްސަދަކީ ރާއްޖެއަށް އެތެރެކުރުން މަނާ ތަކެތި ބޯޑަރުން ހިފެހެއްޓުމާއި، ދިވެހި ރައްޔިތުންނާއި މުޖުތަމަޢުގެ ސަލާމަތާއި ރައްކާތެރިކަން ކަށަވަރުކުރުމެވެ. މި ސަރުކާރުން ބޯޑަރުގެ ސަލާމަތަށް ހާއްސަ އިސްކަމެއް ދެއްވާއިރު، ކަސްޓަމްސްއިން ދަނީ މި މަސައްކަތްތައް ހަރުދަނާކަމާއެކު ކުރަމުންނެވެ.
ޚިޔާލު
އެންމެ ފުރަތަމަ ޚިޔާލު ދެއްވާ.