އިސްލާމީ ޝަރީޢާއާ އެއްގޮތަށް ސްޓޫޑެންޓް ލޯނުތައް ދޫކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމެވި ނިންމެވުމަށް ރާއްޖޭގެ ގިނަ ދީނީ އިލްމުވެރިން ތަޢުރީފު ކުރައްވައިފިއެވެ.
މި ނިންމެވުމަކީ ވަރަށް ރަނގަޅު ނިންމެވުމެއް ކަމަށް އެ ބޭފުޅުން ވިދާޅުވެފައިވެއެވެ.
ރޭގެ ވަގުތެއްގައި ރައީސް މުޢިއްޒު އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ، ރާއްޖެއާއި ރާއްޖެއިން ބޭރުގައި މަތީ ތަޢުލީމާއި ތަމްރީނު ހޯދުމަށް ދޫކުރާ އަދި ދޫކޮށްފައިވާ ލޯނުތަކަކީ، އިސްލާމީ ހަމަތަކަށް ފެތޭ، "ޝަރީޢާ ކޮމްޕްލަޔަންޓް" ލޯނުތަކަކަށް ހެދުމަށް ބައެއް ފިޔަވަޅުތައް ތަންފީޒު ކުރުމަށް ކަމާބެހޭ ފަރާތްތަކަށް އަންގަވާފައިވާ ކަމަށެވެ.
މި ނިންމެވުމުގެ ދަށުން، ސްޓޫޑެންޓް ލޯނުތަކުގައި ހިމެނޭ 1% އެޑްމިނިސްޓްރޭޓިވް ފީ އުވާލުމަށާއި، ލޯނުގެ ގޮތުގައި ދޫކުރާ ފައިސާގެ އިތުރުން އެއްވެސް މިންވަރެއް އިތުރަށް ނުނެގުމަށް ރައީސް ވަނީ އަންގަވާފައެވެ. އަދި ކުރިން ލޯނު ނަގާފައިވާ ފަރާތްތަކުގެ ލޯނު އަދަދުތައް ވެސް މި އުސޫލާ އެއްގޮތަށް އަލުން ބަދަލުކުރުމަށް އަންގަވާފައިވެއެވެ.
އިސްލާމިކް ޔުނިވަރސިޓީގެ ވައިސް ޗާންސެލަރ ޑރ. ޢަލީ ޒާހިރު ބިން ސަޢީދު ޤާސިމް ވިދާޅުވެފައިވަނީ މިއީ ދީނަށް ލޯބިކުރާ ކޮންމެ މީހަކު އުފާވާނެ ކަމެއް ކަމަށެވެ. އަދި ޖަމްޢިއްޔަތުއްސަލަފްގެ ނައިބު ރައީސް ޝައިޚް އަޙްމަދު ސަމީރު އިބްރާހީމް ވިދާޅުވެފައިވަނީ މިއީ އިސްލާމީ އުސޫލަށް ކަންކަން ބައްޓަންކުރެއްވުމުގައި ރައީސް އެޅުއްވި ވަރަށް ހެޔޮ ފިޔަވަޅެއް ކަމަށެވެ.
މީގެ އިތުރުން، ޝައިޚް ޝަފީޢު ޢަބްދުﷲ ވެސް ވަނީ މި ނިންމެވުމަށް ތަޢުރީފުކުރައްވާ، މިއީ ދިވެހި ދަރިވަރުންނަށް ލިބިގެންދިޔަ ވަރަށް އުފާވެރި ޚަބަރެއް ކަމުގައި ވިދާޅުވެފައެވެ.
މިދިޔަ އަހަރު ސަރުކާރުން ދޫކުރި ސްޓޫޑެންޓް ލޯނު 1,015 ދަރިވަރަކަށް ލިބިފައިވާއިރު، އެއީ އަސްލު 500 ދަރިވަރަކަށް ދޫކުރަން ނިންމާފައިވާ ލޯނު ޕްރޮގްރާމެކެވެ. ނަމަވެސް ރައީސް މުޢިއްޒު ވަނީ ޝަރުޠު ހަމަވާ އެންމެންނަށް ލޯނު ދޫކުރުމަށް ނިންމަވާފައެވެ.
ޚިޔާލު
އެންމެ ފުރަތަމަ ޚިޔާލު ދެއްވާ.