ގިނަ އަދަދެއްގެ ބައިވެރިންނާއިއެކު 'އަންހެންވެރިންގެ ސައްލާ' ފަށައިފި

ގިނަ އަދަދެއްގެ ބައިވެރިންނާއިއެކު 'އަންހެންވެރިންގެ ސައްލާ' ފަށައިފި އެވެ،

މިއަދު ހެނދުނު އިސްރަށްވެހިންގެ ނާދީ ހޯލްގައި "އަންހެންވެރިންގެ ސައްލާ" ގެ ނަމުގައި ބޭއްވޭ މަސައްކަތު ބައްދަލުވުން ފައްޓަވައިދެއްވީ ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުހައްމަދެވެ.

މާދަމާގެ ނިޔަލަށް ކުރިއަށްދާ މި ސައްލާއަކީ ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވުޒާރާއިން އިންތިޒާމުކޮށްގެން އަންހެނުންގެ ތަރައްގީއަށް މަސައްކަތްކުރާ ކޮމިޓީތަކަށް ޚާއްސަކޮށްގެން ބާއްވާ ފުރަތަމަ މަސައްކަތު ބައްދަލުވުމެވެ.

މި ސައްލާގައި މާލެ އަތޮޅު، އަރިއަތޮޅު އުތުރުބުރި، އަރިއަތޮޅު ދެކުނުބުރި، ފެލިދެއަތޮޅު، މުލަކަތޮޅު އަދި މާލޭ ސިޓީގެ އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުން ޖުމްލަ 59 މެންބަރުން ބައިވެރިވެވަޑައިގަންނަވައެވެ.

އެ ވުޒާރާއިން މަޢުލޫމާތު ދެއްވިގޮތުގައި، މި ސައްލާ ބޭއްވުމުގެ މައިގަނޑު މަޤްޞަދަކީ ރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމާ ބެހޭ ޤާނޫނުގެ ދަށުން އުފެދިފައިވާ އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ ހިންގުން ހަރުދަނާކޮށް، އެ ކޮމިޓީތައް ބާރުވެރި ކުރުމެވެ.

މި ދެ ދުވަހުގެ މަސައްކަތު ބައްދަލުވުމުގައި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކަށް ކުރިމަތިވާ ގޮންޖެހުންތަކާއި، އެ ކަންކަން ހައްލުކުރުމަށް ކުރެވިދާނެ މަސައްކަތްތަކާއި، މާލީ ގޮތުން ކޮމިޓީތައް ބާރުވެރިކުރުމަށް އެޅިދާނެ ފިޔަވަޅުތަކާ ގުޅޭގޮތުން މަޝްވަރާކުރެވޭނެ ކަމަށް އެ ވުޒާރާއިން ވަނީ ހާމަކުރައްވާފައެވެ.