ފަހި ދިރިއުޅުން ފުލެޓުތައް ބައްލަވައި، ފުލެޓުތައް ހަވާލުކުރުމުގެ މަސައްކަތް ދާ ގޮތް ރައީސް އޮޅުންފިލުއްވައިފި

ފަހި ދިރިއުޅުން ކޯޕަރޭޝަން (އެފްޑީސީ)އިން ހުޅުމާލޭ ދެވަނަ ފިޔަވަހީގައި ތަރައްގީކުރަމުން އަންނަ 4،000 ހައުސިން ޔުނިޓުގެ މަސައްކަތް ކުރިއަށްދާ ގޮތް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ބައްލަވައިލައްވައިފިއެވެ.

މިއަދު ހަވީރު އެ ސަރަހައްދަށް ކުރެއްވި ޒިޔާރަތުގައި ސަރުކާރުގެ ބައެއް ވަޒީރުންނާއި އެފްޑީސީގެ އިސްވެރިން ރައީސަށް މަރުހަބާ ދެންނެވިއެވެ. ރައީސް ވަނީ ހައުސިން ޔުނިޓުތަކުގެ ޓަވަރުތައް ހުރި ސަރަހައްދަށް ޒިޔާރަތްކުރައްވައި، ބައެއް ޓަވަރުތަކަށް ވަދެވަޑައިގެން މަސައްކަތް މިހާރު ގޮސްފައިވާ ހިސާބު އޮޅުންފިލުއްވާފައެވެ. މި ޒިޔާރަތުގައި ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބުވެސް ބައިވެރިވެވަޑައިގެންނެވިއެވެ.

ކުރީގެ ސަރުކާރުން އިންޑިޔާގެ އެގްޒިމް ބޭންކުން ލޯނު ނަގައިގެން ފެށި މި މަޝްރޫޢުގެ މަސައްކަތް، މި ސަރުކާރު ވެރިކަމާ ހަވާލުވިއިރު ނުނިމި އޮތްއިރު، މި އަހަރުގެ ސެޕްޓެންބަރު މަހުގެ ނިޔަލަށް ގިނަ ޔުނިޓުތައް ނިންމުމަށް ސަރުކާރުން އަންނަނީ މަސައްކަތްކުރަމުންނެވެ.

https://twitter.com/presidencymv/status/1935687463344935095?ref_src=twsrc%5Etfw%7Ctwcamp%5Etweetembed%7Ctwterm%5E1935687463344935095%7Ctwgr%5Ea8c6a50924614e4ad15b3c6dc64ac2fce9e6e68c%7Ctwcon%5Es1_&ref_url=https%3A%2F%2Fsababu.mv%2Fwp-admin%2Fpost.php%3Fpost%3D35267action%3Dedit

2023 ވަނަ އަހަރުގެ ރިޔާސީ އިންތިޚާބަށްފަހު ކުރީ ސަރުކާރުން 4،000 ޔުނިޓުގެ ހައްގުވެރިންގެ ލިސްޓެއް އާންމުކުރުމާ ގުޅިގެން، އެންޓި ކޮރަޕްޝަން ކޮމިޝަން (އޭސީސީ)އަށް ހުށަހެޅުނު ޝަކުވާތައް ބެލުމަށްފަހު، އެ ލިސްޓުގެ ބޮޑު ބައެއްގައި ހިމެނޭ ފަރާތްތަކަކީ ޝަރުތު ފުރިހަމަނުވާ ފަރާތްތަކެއްކަން ވަނީ ފާހަގަކުރެވިފައެވެ.

މި ސަރުކާރުން ވަނީ ކުރީ ސަރުކާރުން ނެރުނު ލިސްޓުގައި ހިމެނޭ ފަރާތްތަކުގެ ތެރެއިން، ކަނޑައެޅިގެން ދޮގު މަޢުލޫމާތު ދީފައިވާ ފަރާތްތައް ފިޔަވައި އެހެން ހުރިހާ ފަރާތްތަކަށް ފުލެޓު ދިނުމަށް ނިންމާފައެވެ. އަދި ފުލެޓު ނުލިބޭ ފަރާތްތަކަށް އެކަމުގެ ސަބަބު އަންގައިދިނުމަށްވެސް ވަނީ ނިންމާފައެވެ.